Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 18 Bible Online

ግብረ ሐዋርያት 18 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 18

¹ወእምዝ ወፅአ ጳውሎስ እምአቴና ወሖረ ቆሮንቶስ።

² ወረከበ አሐደ አይሁዳዌ ዘስሙ አቂላ ወሀገሩ ጳንጦስ ወበጽሐ ሶቤሃ እምኢጣልያ ወብእሲቱ ጵርስቅላ እስመ አዘዘ ቀላውዴዎስ ይስድዱ አይሁደ እምሮሜ።

³ ወመጽአ ኀቤሆሙ እስመ ያኀብር ግብረ ሥራሆሙ እስመ ገበርተ ሰቀላ እሙንቱ ወአሐዱ ኪኖሙ ወነበረ ኀቤሆሙ ኅቡረ ወይትጌበሩ ክዳናተ ሰቀላ።

⁴ወጳውሎስ ይትዋቀሦሙ በምኵራብ በኵሉ ሰናብት ወያአምኖሙ ለአይሁድ ወለአረሚ።

⁵ ወወረዱ እመቄዶንያ ሲላስ ወጢሞቴዎስ ወነገሮሙ ጳውሎስ ለአይሁድ ወአስምዖሙ ከመ ኢየሱስ ውእቱ ክርስቶስ።

⁶ ወተዋቀሥዎ ወፀረፉ ወእምዝ ነገፈ አልባሲሁ ወይቤሎሙ ደምክሙ ላዕለ ርእስክሙ ንጹሕ አነ እንከ እምደመ ኵልክሙ እምይእዜሰ አሐውር መንገለ አሕዛብ።

⁷ወኀሊፎ እምህየ ቦአ ቤተ ኢዮስጦስ ብእሲ ፈራሄ እግዚአብሔር ወቤቱ ጎረ ምኵራብ።

⁸ወቀርስጶስሂ መጋቤ ምኵራብ አምነ ምስለ ኵሉ ሰብአ ቤቱ በእግዚእነ ኢየሱስ ክርስቶስ ወብዙኃን እምሰብአ ቆሮንቶስ ሰሚዖሙ አምኑ ወተጠምቁ።

⁹ ወይቤሎ እግዚእነ ለጳውሎስ በራእየ ሌሊት ኢትፍራህ ንግር ወኢታርምም።

¹⁰ እስመ ሀለውኩ አነ ምስሌከ ወአልቦ ዘያሐምመከ እስመ ብዙኅ ሕዝብ ብየ ውስተ ዛቲ ሀገር።

¹¹ወነበረ ጳውሎስ ዓመተ፥ ወስድስተ አውራኀ እንዘ ይሜህሮሙ ቃለ እግዚአብሔር በቆሮንቶስ።

¹²ወተባጽሕዎ አይሁድ ለጳውሎስ ኀበ ጋልዮስ መልአከ አካይያ ወአምጽእዎ ኀበ ዐውድ።

¹³ወይቤልዎ በዘአልቦ ሕግ ይሜህር ለሰብእ ያምልክዎ ለእግዚአብሔር።

¹⁴ ወፈቂዶ ጳውሎስ ይክሥት አፉሁ ወይንግሮሙ አውሥአ መልአክ ጋልዮስ ለአይሁድ ወይቤሎሙ አንትሙ አይሁድ ለእመ ቦ ዘገፍዐክሙ ወቦ ካልእ ጌጋይ እምአስተዋቀሥኩክሙ ወእምአጽማዕኩክሙ።

¹⁵ ወእመሰ ትትካሐዱ በእንተ ቃል ወበእንተ ሕግክሙ ወበእንተ አስማተ ሰብእ ለሊክሙ አእምሩ አንሰ ኢይፈቅድ እስማዕ ዘከመዝ ነገረ።

¹⁶ወሰደድዎሙ እምኀበ ዐውድ።

¹⁷ ወአኀዝዎ ኵሎሙ አረማውያን ለሶስቴንስ መጋቤ ምኵራብ ወዘበጥዎ በኀበ ዐውድ ወኢያኅዘኖ ለጋልዮስ ወኢምንተኒ በእንቲኣሁ።

¹⁸ ወነበረ ጳውሎስ ዓዲ ኅዳጠ መዋዕለ ኀበ ቢጹ ወፈነውዎ በሰላም ወነገደ በባሕር ከመ ይሑር ሶርያ ወሀለዉ ምስሌሁ ጵርስቅላ ወአቂላ ወተላፀየ ርእሶ በውስተ ክንክራኦስ እስመ ብፅዐት ቦ።

¹⁹ወበጽሑ ኤፌሶን ወኀደጎሙ ህየ ወውእቱሰ ቦአ ምኵራበ ወተዋቀሦሙ ለአይሁድ።

²⁰ወአስተብቍዕዎ ይንበር ብዙኀ መዋዕለ ወኢፈቀደ።

²¹ ወእምዝ ሶበ ፈነውዎ ይቤሎሙ እገብእ ካዕበ ለእመ ፈቀደ እግዚአብሔር ወባሕቱ ይእዜሰ እፈቅድ ከመ እግበር በዓለ ዘይመጽእ በኢየሩሳሌም።

²²ወነገደ በባሕር ወወረደ ቂሳርያ ወዐርገ ቤተ ክርስቲያን ወተአምኆሙ ወሖረ አንጾኪያ።

²³ወነበረ ኅዳጠ መዋዕለ ወወፅአ ወሖረ ወኀለፈ በበንስቲት በብሔረ ፍርግያ ወገላትያ ወአጽንዖሙ ለኵሎሙ አርድእት እለ ሀለዉ ህየ ላዕለ አሚን በእግዚእነ ክርስቶስ።

²⁴ ወሀሎ አሐዱ ብእሲ አይሁዳዊ ዘስሙ አጵሎስ ዘእስክንድርያ ብእሲ ጠቢብ ወየአምር መጽሐፈ።

²⁵ወበጽሐ ኤፌሶን ወይክል ተናግሮ ወምሁር ፍኖተ እግዚአብሔር ወጸሓቂ በመንፈሱ ይንግር ወይምሀር በእንተ ኢየሱስ ክርስቶስ ወዳእሙ በጥምቀተ ዮሐንስ ተጠምቀ።

²⁶ወውእቱ አኀዘ ይንግር ገሃደ በምኵራብ ወሰምዕዎ ጵርስቅላ ወአቂላ ወአቅረብዎ ኀበ ማኅደሮሙ ወአጠየቅዎ ፍኖተ እግዚአብሔር ፍጹመ።

²⁷ወፈቀደ ይሑር አካይያ ወአብጽሕዎ ቢጹ ወጸሐፉ ሎቱ ኀበ አርድእት ይትወከፍዎ ወበጺሖ ኀቤሆሙ ነገሮሙ ብዙኀ ለእለ አምኑ በጸጋ እግዚአብሔር ወረድኦሙ ለመሃይምናን ዐቢየ ረድኤተ።

²⁸እስመ ይትጋደሎሙ ለአይሁድ ፈድፋደ በቅድመ ኵሉ ሕዝብ እንዘ ሀለዉ ጉብኣን ገሃደ ወያበጽሕ ሎሙ እምውስተ መጻሕፍት በእንተ ኢየሱስ ከመ ውእቱ ክርስቶስ።