Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 19 Bible Online

ግብረ ሐዋርያት 19 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 19

¹ ወእምዝ እንዘ አጵሎስ ሀሎ ቆሮንቶስ ኀለፈ ጳውሎስ እንተ ላዕላይ ደወል ወበጽሐ ኤፌሶን ወረከበ በህየ ኅዳጣነ አርድእተ።

²ወይቤሎሙ ቦኑ ዘነሣእክሙ መንፈሰ ቅዱሰ እምዘ አመንክሙ ወይቤልዎ ኢሰማዕናሁ ጥቀ ከመ ቦ መንፈስ ቅዱስ።

³ወይቤሎሙ በምንትኑ እንከ ተጠመቅሙ ወይቤልዎ በጥምቀተ ዮሐንስ።

⁴ ወይቤሎሙ ጳውሎስ ዮሐንስ አጥመቀ በጥምቀተ ንስሓ እንዘ ይሰብክ ከመ ይእመኑ በዘይመጽእ እምድኅሬሁ ዘውእቱ ኢየሱስ ክርስቶስ።

⁵ወሰሚዖሙ ተጠምቁ በስሙ ለእግዚእነ ኢየሱስ ክርስቶስ።

⁶ ወወደየ እዴሁ ጳውሎስ ዲቤሆሙ ወወረደ መንፈስ ቅዱስ ላዕሌሆሙ ወነበቡ በነገረ ኵሉ በሐውርት፥ ወተነበዩ።

⁷ወየአክሉ ኵሎሙ ዐሠርተ ወክልኤተ ዕደወ።

⁸ወቦአ ጳውሎስ ምኵራበ ወነገረ ገሃደ ወነበረ ሠለስተ አውራኀ ይትዋቀሦሙ ወያአምኖሙ በእንተ መንግሥተ እግዚአብሔር።

⁹ ወቦ እለ ክሕዱ ወተንሥኡ ወአሕሠሙ ዲበ ትምህርት ዘእግዚአብሔር በቅድመ ጉባኤ አሕዛብ ወኀደጎሙ ጳውሎስ ወነሥኦሙ ለአርድእት ወኵሎ አሚረ ይነግሮሙ በቤቱ ለመምህር ብእሲ ዘስሙ ጢራኖስ ወበ ምኵናነ መላእክት።

¹⁰ወጐንደየ ከመዝ ክልኤ ዓመተ እስከ ሰምዑ ኵሎሙ እለ ይነብሩ እስያ ቃለ እግዚአብሔር አይሁድ ወአረሚ።

¹¹ ወዐቢየ ኀይለ ይገብር እግዚአብሔር በእደዊሁ ለጳውሎስ።

¹² ወይወስዱ እምጽንፈ ልብሱ ወሰበኑ መቲሮሙ ወያነብሩ ዲበ ድዉያን ወየሐይዉ ወአጋንንት እኩያን ይወፅኡ።

¹³ ወቦ እለ አኀዙ እምአይሁድ ይዑዱ ወይርቅዩ ወይጼውዑ ሎሙ ለአጋንንት እኩያን በስመ እግዚእነ ኢየሱስ ክርስቶስ ወይቤልዎሙ ናምሕለክሙ በስሙ ለኢየሱስ ዘጳውሎስ ይሜህር በስሙ።

¹⁴ወእሉ እለ ከመዝ ይገብሩ አይሁድ እሙንቱ ደቂቀ ሊቀ ካህናት ዘስሙ አስቄዋ ወሰብዐቱ እሙንቱ።

¹⁵ወተሰጥዎሙ ውእቱ ጋኔን እኩይ ወይቤሎሙ በኢየሱስኒ አአምን ወለጳውሎስኒ አአምሮ አንትሙኬ እንከ መኑ አንትሙ።

¹⁶ወአብደ ላዕሌሆሙ ውእቱ ዘጋኔን እኩይ ወኀየሎሙ ወሞኦሙ ወአቍሰሎሙ ወፈቅዖሙ ወሰደዶሙ እምውእቱ ቤት።

¹⁷ወተሰምዐ ዝ ነገር በኀበ ኵሎሙ አይሁድ ወአረሚ እለ ይነብሩ ኤፌሶን ወፈርሁ ኵሎሙ ወአዕበዩ ስመ እግዚእነ ኢየሱስ።

¹⁸ወኵሎሙ እለ አምኑ ይመጽኡ ወይኔስሑ በእንተ ዘገብሩ ኀጢአተ።

¹⁹ ወብዙኃን መሠርያን ያስተጋብኡ ወያመጽኡ ወያውዕዩ መጻሕፍቲሆሙ በቅድመ ኵሉ ሕዝብ ወሐሳበ ሤጡ ለዘአውዐዩ ኀምስቱ እልፍ ድርህመ ብሩር።

²⁰ ወከመዝ ጸንዐ ቃለ እግዚአብሔር ወዐብየ ወኀየለ።

²¹ ወእምዝ ተፈጺሞ ዝንቱ ኀለየ ጳውሎስ በመንፈሱ ይኅልፍ እንተ መቄዶንያ ወአካይያ ወይሑር ኢየሩሳሌም ወይቤ በጺሕየ ህየ ይደልወኒ እርአያ ለሮሜ።

²² ወፈነወ ለመቄዶንያ ክልኤተ እም እለ ይትለአክዎ ጤሞቴዎስሃ ወአርስጦስሃ ወውእቱ ጳውሎስ ነበረ እስያ ብዙኀ መዋዕለ።

²³ ወበውእቱ መዋዕል ዐቢይ ሁከት ኮነ በእንተዝ ትምህርት ላዕለ እለ አምኑ በእግዚእነ።

²⁴ ወሀሎ ህየ አሐዱ ብእሲ ዘስሙ ድሜጥሮስ ነሃቤ ብሩር ወይገብር ሥዕላተ ወአምሳላተ ብሩር ጣዖተ ለአርጤምስ ወያስተጌብሮሙ ለኪነት ወይሁቦሙ ብዙኀ ንዋየ ወያረብኆሙ።

²⁵ወአስተጋብኦሙ ለኵሉ ኪነት ወለእለ ይነብሩ ምስሌሆሙ ወአንገለጉ ወይቤሎሙ አንትሙ አኀዊነ ለሊክሙ ተአምሩ ከመ በዝ ተግባርነ ውእቱ ምርካብነ።

²⁶ወናሁ ዘከመ ትሬእዩ ወዘከመ ትሰምዑ አኮ ባሕቲቶ ኤፌሶን አላ ኵሎ እስያ አስሐተ ዝ ጳውሎስ ብዙኃነ አሕዛበ ወይቤሎሙ ኢኮኑ አማልክተ እለ በእደ ሰብእ ይትገበሩ።

²⁷ወዓዲ አኮ በዝ ባሕቲቱ ዘንትመነሶ ዓዲ ለምኵራበ አርጤምስኒ ሀለዋ ይሰዐር ክብራ ወይትነሠት ዕበያ እንተ እስያኒ ወኵሉ ዓለም ያመልካ።

²⁸ወሰሚዖሙ ተምዑ ወከልሑ በዐቢይ ቃል ወይቤሉ ሰንበት ዕበያ ለአርጤምስ እንተ ኤፌሶን።

²⁹ወተሀውኩ ኵሉ ሀገር ወሮጹ ኀበ መካነ ተውኔት ኅቡረ ወሰሐብዎሙ ለጋይዮስ ወለአርስጥሮኮስ ዕደው መቄዶናውያን አዕርክቱ ለጳውሎስ።

³⁰ወፈቀደ ጳውሎስ ይባእ ማእከለ አሕዛብ ወከልእዎ አርድእት።

³¹ወእለሂ እምእስያ አዕርክቱ ለአኩ ኀቤሁ ኢይባእ ማእከለ አሕዛብ አስተብቍዕዎ።

³²ወጐንደዩ እንዘ ይኬልሑ ሕዝብ እለ ሀለዉ ህየ መካነ ተውኔት ወቦ እለ ይኬልሑ በካልእ ነገር ወእለሰ ይበዝኁ እምኔሆሙ ኢየአምሩ በእንተ ምንት አንገለጉ።

³³ወሕዝበ አይሁድ እለ ሀለዉ ህየ አንሥኡ እምኔሆሙ ብእሴ አይሁዳዌ ዘስሙ እስክንድሮስ ወተንሢኦ ቀጸበ በእዴሁ ወፈቀደ ይውቅሥ ለዐውድ።

³⁴ወአእሚሮሙ ከመ አይሁዳዊ ውእቱ ከልሑ ኵሎሙ በአሐዱ ቃል መጠነ ክልኤ ሰዓት እንዘ ይብሉ ሰንበት ዕበያ ለአርጤምስ እንተ ኤፌሶን።

³⁵ወእምዝ ተንሥአ ጸሓፌ ሀገር ወአስተጋብኦሙ ለአሕዛብ ወይቤሎሙ ስምዑ ሰብአ ኤፌሶን መኑ ሰብእ ዘኢየአምራ ለሀገረ ኤፌሶን ከመ ይእቲ እንተ አርጤምስ ዐባይ ወጣዖታ ዘወረደ እምሰማይ።

³⁶ወበእንተዝ ይመስለኒ አልቦ ዘይክል ተቃውሞታ ለዛቲ ወይእዜኒ ርቱዕ በድቡት ንግበሮ ለዝ ወአኮ በሀከክ ወበትዝልፍት።

³⁷ናሁ ተባጻሕክምዎሙ ለእሉ ሰብእ ዘኢሰረቁ ቤተ አማልክቲነ ወኢፀረፉ ዲበ አማልክቲነ።

³⁸ወእመሰ ቦ ተስናን ድሜጥሮስ ምስለ ኪነት ለይትዋቀሡ በበይናቲሆሙ ናሁ መኰንን ውስተ ሀገር።

³⁹ወእመሰ ባዕድ ማኅሠሥ ብክሙ ዘበእንተ ሕግክሙ ንነሥት ዐውደ።

⁴⁰እስመ ንትመነሶ ዮም በዘአምጻእክሙ ለነ ሀከከ ዘአልቦ ጌጋይ ወአልብነ ዘንትዋቀሥ በእንተዝ ሀከክ ወዘንተ ብሂሎ ነሠተ ዐውደ።