Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 2 Bible Online

ግብረ ሐዋርያት 2 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 2

¹ ወአመ ተፈጸመ መዋዕለ ጰንጠቈስጤ እንዘ ሀለዉ ኵሎሙ ኅቡረ አሐተኔ።

²መጽአ ግብተ እምሰማይ ድምፅ ከመ ድምፀ ነፋሰ ዐውሎ ወመልአ ኵሎ ቤተ ኀበ ሀለዉ ይነብሩ።

³ ወአስተርአይዎሙ ልሳናተ እሳት[3] ክፉላት ከመ እሳት ዘይትከፈል ወነበረ ዲበ ኵሎሙ።

⁴ ወተመልኡ ኵሎሙ መንፈሰ ኀይል ወአኀዙ ይንብቡ ዘዘዚኣሆሙ በነገረ ኵሉ በሐውርት በከመ ወሀቦሙ መንፈስ ቅዱስ ይንብቡ።

⁵ ወሀለዉ በኢየሩሳሌም ሰብእ ኄራን አይሁድ ይነብሩ እምኵሉ አሕዛብ ዘመትሕተ ሰማይ።

⁶ወሰሚዖሙ ዘንተ ቃለ ተጋብኡ ኵሎሙ ድንጉፃኒሆሙ ወኀጥኡ ዘይብሉ እስመ ሰምዕዎሙ ይነብቡ ኵሎሙ በነገረ በሐውርቲሆሙ።

⁷ወደንገፁ ወአንከሩ ወይቤሉ አኮኑ ሰብአ ገሊላ እሉ ኵሎሙ።

⁸እፎኑ እንከ ንሰምዖሙ ይነብቡ በነገረ ኵሉ በሐውርቲነ እንዘ ፍጥረትነ ጳርቴ ወሜድ ወኢላሜጤ።

⁹ወእለሂ ይነብሩ ማእከለ አፍላግ ይሁዳ ወቀጶዶቅያ ወፋንጦስ።

¹⁰ወእስያ ወፍርግያ ወጵንፍልያ ወግብጽ ወደወለ ልብያ ወእለሂ እምቀርኔን ወእለሂ መጽኡ እምሮሜ አይሁድ ፈላስያን።

¹¹ወእለሂ እምቀርጤስ ወዐረብ ወናሁ ንሰምዖሙ ይነብቡ በነገረ በሐውርቲነ ዕበያቲሁ ለእግዚአብሔር።

¹²ወደንገፁ ኵሎሙ ወኀጥኡ ዘይብሉ ወተባሀሉ በበይናቲሆሙ ምንትኑ እንጋ ዝ።

¹³ወመንፈቆሙሰ ሰሐቅዎሙ ወይቤሉ እሉሰ ጻዕፈ ጸግቡ ወሰክሩ።

¹⁴ወቆመ ጴጥሮስ ምስለ ዐሠርቱ ወአሐዱ ወከልሐ በቃሉ ወይቤ አንትሙ ሰብአ ይሁዳ ወእለሂ ትነብሩ ኢየሩሳሌም ኵልክሙ አእምሩ ዘንተ ወስምዑኒ ቃልየ።

¹⁵አኮ ከመ ትትሔዘብዎሙ አንትሙ ስኩራን እሙንቱ እንዘ ትብሉ እስመ ነግህ ብሔሩ ወሶቤሁ ሠለስቱ ሰዓት።

¹⁶ አላ ዝ ውእቱ ዘይቤ ኢዩኤል ነቢይ።

¹⁷«ወይከውን እምድኅረዝ መዋዕል ይቤ እግዚአብሔር እሰውጥ እምነ መንፈስየ ዲበ ኵሉ ዘሥጋ ወይትኔበዩ ደቂቅክሙ ወአዋልዲክሙ ወወራዙቲክሙ ራእየ ይሬእዩ ወሊቃውንቲክሙ ሕልመ የሐልሙ።

¹⁸ወላዕለ አግብርትየ ወአእማትየ እክዑ እምነ መንፈስየ ወይእተ አሚረ ይትኔበዩ።

¹⁹ወእሁብ ትእምርተ በሰማይ በላዕሉ ወመንክረ በምድር በታሕቱ ደመ ወእሳተ ወጢሰ።

²⁰ፀሓይኒ ይጸልም ወወርኅኒ ደመ ይከውን ዘእንበለ ትብጻሕ ዕለተ እግዚአብሔር ዐባይ ወግርምት።

²¹ ወኵሉ ዘጸውዐ ስመ እግዚአብሔር ይድኅን።»

²² ስምዑ ሰብአ እስራኤል ዘንተ ነገረ ኢየሱስሃ ናዝራዌ ብእሴ ዘአርአየክሙ እግዚአብሔር በኀይል ወበተአምር ወበመንክር ዘገብረ እግዚአብሔር በእደዊሁ በማእከሌክሙ ዘከመ ርኢክምዎ።

²³ በሥርዐተ ምክሩ ወበአእምሮቱ ለእግዚአብሔር ወመጠውክምዎ ውስተ እደ ኃጥኣን ወሰቀልክምዎ ወቀተልክምዎ።

²⁴ ወእግዚአብሔር አንሥኦ እምዉታን ፈቲሖ ማእሰሪሁ ለሞት እስመ ኢይክል እኂዞቶ ሞት።

²⁵ ወዳዊትኒ ይቤ በእንቲኣሁ «ዘልፈ እሬእዮ ለእግዚአብሔር ቅድሜየ ውእቱ በኵሉ ጊዜ እስመ በየማንየ ውእቱ ከመ ኢይትሀወክ።

²⁶ወበእንተዝ ተፈሥሐ ልብየ ወተኀሥየ ልሳንየ።

²⁷ወዓዲ በተስፋሁ ኀደረ ሥጋየ እስመ ኢተኀድጋ ውስተ ሲኦል ለነፍስየ ወኢትሁቦ ለጻድቅከ ይርአይ ሙስና።

²⁸ወመራሕከኒ ፍኖተ ሕይወት ወአጽገብከኒ ሐሤተ ምስለ ገጽከ ወትፍሥሕት ውስተ የማንከ ለዝሉፉ።»

²⁹ ታበውሑኒሁ እንከ ኦ ሰብእ እንግርክሙ ክሡተ በእንተ ዳዊት ርእሰ አበው ከመሂ ሞተ ወተቀብረ ወኀቤነ ሀሎ መቃብሪሁ እስከ ዮም።

³⁰ እስመ ነቢይ ውእቱ ወአእመረ ከመ በመሐላ መሐለ ሎቱ እግዚአብሔር ከመ እምፍሬ ከርሡ ያነብር ዲበ መንበሩ።

³¹አቅዲሙ አእሚሮ ነገረ ከመ ይትነሣእ ክርስቶስ እምዉታን ወከመ ኢትትኀደግ ውስተ ሲኦል ነፍስቱ ወከመሂ ኢይሬእያ ለሙስና።

³²ሎቱ ለኢየሱስ አንሥኦ እግዚአብሔር ወንሕነ ኵልነ ሰማዕቱ።

³³ወይእዜሰ ከመ በየማነ እግዚአብሔር ተለዐለ ነሢኦ እምኀበ አቡሁ ዘአሰፈወ መንፈሰ ቅዱሰ ሶጦ ለዝ ዘትሬእዩ ወዘትሰምዑ።

³⁴ቦኑ ዳዊት ዐርገ ሰማየ ኢይቤኑ ለሊሁ ዳዊት በመንፈስ ቅዱስ።

³⁵«ይቤሎ እግዚእ ለእግዚእየ ንበር በየማንየ እስከ አገብኦሙ ለጸላእትከ ታሕተ መከየደ እገሪከ።»

³⁶ጥዩቀ እንከ ያእምሩ ኵሉ ቤተ እስራኤል ከመ እግዚአኒ ወመሲሐኒ ረሰዮ እግዚአብሔር ለውእቱ ኢየሱስ ክርስቶስ ዘአንትሙ ሰቀልክምዎ።

³⁷ ወሰሚዖሙ ተከሥተ ልቦሙ ወይቤልዎሙ ለጴጥሮስ ወለቢጹ ሐዋርያት ምንተ ንግበር አኀዊነ።

³⁸ ወይቤሎሙ ጴጥሮስ ነስሑ ወተጠመቁ ኵልክሙ በስሙ ለኢየሱስ ክርስቶስ ወይትኀደግ ለክሙ ኀጢአትክሙ ወትነሥኡ ጸጋሁ ለመንፈስ ቅዱስ።

³⁹እስመ ለክሙ ውእቱ ተስፋሁ ወለውሉድክሙ ወለኵሎሙ እለ ርኁቃን እለ ይጼውዖሙ እግዚአብሔር አምላክነ።

⁴⁰ወባዕደኒ ብዙኀ ነገረ ነገሮሙ ወገሠጾሙ ወይቤሎሙ አድኅኑ ነፍሰክሙ እምዝ ዓለም እኩይ።

⁴¹ወተወክፉ ቃሎ ወተጠምቁ ወተወሰኩ በይእቲ ዕለት መጠነ ሠላሳ ምእት ነፍስ።

⁴²ወነበሩ ይፀመዱ ትምህርተ ሐዋርያት ወኅቡረ ይባርኩ ማእደ በውስተ ጸሎት።

⁴³ወፈርሆሙ ኵሉ ዘነፍስ ወብዙኅ ተኣምር ወመንክር ይከውን በእደዊሆሙ ለሐዋርያት።

⁴⁴ ወኵሎሙ እለ አምኑ ኅቡረ ይነብሩ ወድሙር ኵሉ ንዋዮሙ።

⁴⁵ወጥሪቶሙ[4] ይሠይጡ ወይሁቡ ለነዳያን በከመ መፍቅዱ ለለአሐዱ።

⁴⁶ ወኵሎ አሚረ ይፀመዱ በአሐዱ ነፍስ ወበአሐዱ ኅሊና ውስተ ቤተ መቅደስ ወይባርኩ ማእደ በውስተ አብያት ወይሴሰዩ ሲሳዮሙ በትፍሥሕት ወበየዋሃተ ልብ ወየአኵቱ እግዚአብሔርሃ።

⁴⁷ወቦሙ ሞገስ በኀበ ኵሉ ሕዝብ ወእንተ ጸብሐት ይዌስክ እግዚአብሔር ዲቤሆሙ ለእለ የሐይዉ።