Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 20 Bible Online

ግብረ ሐዋርያት 20 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 20

¹ ወእምድኅረ ኀልቀ ሀከክ ጸውዐ ጳውሎስ አርዳኢሁ ወመሀሮሙ ወሰዐሞሙ ወወፅአ ወሖረ መቄዶንያ።

²ወኀለፈ እንተ ውእቱ በሐውርት ወብዙኀ መሀሮሙ በቃሉ ወእምዝ ሖረ ኤልዳ።

³ወነበረ በህየ ሠለስተ አውራኀ ወተማከሩ አይሁድ ዲቤሁ ወፈቀደ ይሑር ብሔረ ሶርያ ወመከረ ይሠወጥ መቄዶንያ።

⁴ ወሖሩ ምስሌሁ ሱሲ ጴጥሮስ ዘሀገረ ቤርያ ወእምተሰሎንቄ አርስጥሮኮስ ወሲኮንዱስ ወጋይዮስ ደርቤያዊ ወጢሞቴዎስ ዘእምልስጥራን ወእምእስያ ቲኪቆስ ወጥሮፊሞስ።

⁵ ወእሙንቱ ሖሩ ቅድሜነ ወጸንሑነ ውስተ ጢሮአዳ።

⁶ወንሕነሰ ነገድነ እምድኅረ ፋሲካ እምፊልጵስዩስ ወበጻሕነ ኀቤሆሙ ውስተ ጢሮአዳ በባሕር በኀምስቱ ዕለት ወነበርነ ህየ ሰቡዐ መዋዕለ።

⁷ ወበዕለተ እሑድ እንዘ ጉቡኣን ንሕነ ከመ ንባርክ ማእደ ወይነግሮሙ ጳውሎስ እስመ በሳኒታ ይገይሥ ወአንኀ ነገረ እስከ መንፈቀ ሌሊት።

⁸ወብዙኅ መኃትው ውስተ ውእቱ ጽርሕ ኀበ ሀሎነ ጉቡኣን።

⁹ወእንዘ ይነብር አሐዱ ወልድ ወሬዛ ውስተ መስኮት ዘስሙ አውጤክስ ደቀሰ ወኖመ ዐቢየ ንዋመ ወእንዘ ይነግር ጳውሎስ ብዙኀ ጐንደየ ወእምኀበ ይነውም ውእቱ ወልድ ጸድፈ እምተሥላስ ታሕተ ወአንሥእዎ በድኖ።

¹⁰ ወወረደ ጳውሎስ ወነሥኦ ኀቤሁ ወይቤሎሙ ኢትደንግፁ ሀለወት ነፍሱ ላዕሌሁ።

¹¹ወእምዝ ዐርገ ወአዕረጎ ምስሌሁ ወነበረ ወባረከ ማእደ ወወሀቦ ለወሬዛ እምነ ማእድ ወብዙኀ ነገሮሙ ወጐንደየ እስከ ጎሕ።

¹²ወእምዝ ወፅአ ጌሠመ ወአወፈዮሙ ውእተ ወልደ ሕያዎ ወተፈሥሑ ፈድፋደ።

¹³ወንሕነሰ ዐረግነ ሐመረ ወሖርነ አሶን እስመ እምህየ ፈቀድነ ንትቀበሎ ለጳውሎስ እስመ ከመዝ ተናገረነ ከመ ይመጽእ በእግር ወተቀበልናሁ።

¹⁴ወበጻሕነ አሶን ወነሣእናሁ ዲበ ሐመር ወሖርነ ሚልጢኒን።

¹⁵ወእምህየ ነገድነ በሳኒታ ወበጻሕነ አንጢቅክስዩ ወበሳኒታ ኀለፍነ እንተ አሞን ወነበርነ ትሮጊሊዮም ወእምድኅረ ውእቱ ዕለት በጻሕነ መሊጡ።

¹⁶ እስመ አጥብዐ ጳውሎስ ከመ ይሑር ኤፌሶን ከመ ኢይጐንዲ ውስተ እስያ ወጐጕአ ለእመ ይትከሃሎ ይብጻሕ ኢየሩሳሌም ለጰንጠቈስጤ።

¹⁷ወእምነ መሊጡ ለአከ ኤፌሶን ይጸውዕዎሙ ለቀሲሳን እለ ቤተ ክርስቲያን።

¹⁸ ወበጺሖሙ ኀቤሁ ይቤሎሙ ለሊክሙ ተአምሩ እምአመ መጻእኩ እስያ ዘከመ ነበርኩ ኀቤክሙ በኵሉ መዋዕል።

¹⁹እንዘ እትቀነይ ለእግዚአብሔር ወእሰርሕ በኵሉ ሕማም ወአንብዕ ወመንሱትሂ ዘረከበኒ እምአይሁድ።

²⁰ወአልቦ ዘሰወርኩክሙ እምኵሉ ዘይደልወክሙ ዘኢነገርኩክሙ ወዘኢመሀርኩክሙ።

²¹እንዘ አሰምዖሙ ለአይሁድ ክሡተ ወለአረሚኒ በአፍኣኒ ወበውስጥኒ ከመ ይትጋነዩ ወይነስሑ ለእግዚአብሔር ወይእመኑ በእግዚእነ ኢየሱስ ክርስቶስ።

²² ወይእዜኒ ናሁ ተዐሠርኩ በመንፈስየ እሑር ኢየሩሳሌም ወኢየአምር ዘይረክበኒ በውስቴታ።

²³ ወባሕቱ አስምዐ ሊተ መንፈስ ቅዱስ በበአህጉር እንዘ ይብል ሕማም ወመዋቅሕት ይጸንሐከ።

²⁴ ወባሕቱ ኢየሐስባ ለነፍስየ ወኢምንተኒ ዳእሙ ከመ እፈጽም መልእክትየ ወእሰልጥ ግብርየ ዘነሣእኩ እምኀበ እግዚእነ ኢየሱስ ክርስቶስ ከመ እምሀር ወእስብክ ወንጌለ ጸጋሁ ለእግዚአብሔር።

²⁵ወይእዜኒ ናሁ አነ አእመርኩ ከመ ኢትሬኢዩኒ ገጽየ እንከ አንትሙ ኵልክሙ እለ ሰበኩ ለክሙ በእንተ መንግሥተ እግዚአብሔር።

²⁶ ወናሁ አሰምዕ ለክሙ ዮም በዛቲ ዕለት ከመ ንጹሕ አነ እምደመ ኵልክሙ።

²⁷ወአልቦ ዘኀባእኩክሙ ወዘኢነገርኩክሙ ኵሎ ምክሮ ለእግዚአብሔር።

²⁸ ወይእዜኒ ዕቀቡ ርእሰክሙ ወኵሎ መራዕየ ዘሎቱ ሤመክሙ መንፈስ ቅዱስ ጳጳሳተ ከመ ትርዐዩ ቤተ ክርስቲያኑ ለእግዚአብሔር እንተ አጥረያ በደሙ።

²⁹ ወአነ አአምር ከመ ይመጽኡ እምድኅሬየ ተኵላት መሠጥ እለ ኢይምህክዋ ለመርዔት።

³⁰ወእምውስቴትክሙ ይትነሥኡ ዕደው እለ ይሜህሩ ጠዋየ ነገረ ከመ ያግብእዎሙ ለአርድእት[22] ኀቤሆሙ።

³¹ወይእዜኒ ትግሁ ወተዘከሩ ከመ ሠለስተ ዓመተ ኢነትገ አንብዕየ ሌሊተ ወመዓልተ እንዘ እሜህረክሙ ለኵልክሙ።

³²ወይእዜኒ አማሕፀንኩክሙ ኀበ እግዚአብሔር ወለቃለ ጸጋሁ ዘይክል ሐኒጾተክሙ ወየሀብክሙ ርስተ ምስለ ኵሎሙ ቅዱሳን።

³³ ተአምሩ ከመ ኢተሰቈቁ ንዋየክሙ ኢወርቀ ወኢብሩረ ወኢአልባሰ ኢነሣእኩ ወኢ እምኀበ አሐዱሂ እምኔክሙ።

³⁴ ለሊክሙ ተአምሩ ኢለትካዝየ ወኢለእለ ምስሌየ አላ ተቀንያ እላንቱ እደውየ።

³⁵ እስመ ከማሁ ይደልወነ ከመ በጻማነ ወበተግባርነ ንትወከፎሙ ለድኩማን ወዘንተ መሀርኩክሙ ተዘከሩ ቃሎ ለእግዚእነ ዘይቤ «ብፁዕ ዘይሁብ እምዘይነሥእ።»

³⁶ ወዘንተ ብሂሎ ሰገደ ወጸለየ ምስለ ኵሎሙ እለ ሀለዉ ምስሌሁ።

³⁷ወብዙኀ በከዩ ኵሎሙ ወሐቀፍዎ ክሣዶ ለጳውሎስ ወሰዐምዎ እንዘ ይቴክዙ ወፈድፋደሰ እስመ ይቤሎሙ ኢትሬእዩኒ እንከ ገጽየ።

³⁸ወአስተፋነውዎ ወዐርገ ሐመረ።