Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 22 Bible Online

ግብረ ሐዋርያት 22 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 22

¹ ስምዑ አኀዊነ ወአበዊነ ዘእወቅሥ ለክሙ ይእዜ።

² ወሶበ ሰምዑ ከመ በዕብራይስጥ ይነግሮሙ ፈድፋደ አጽምዕዎ።

³ ወይቤሎሙ ጳውሎስ አንሰ ብእሲ አይሁዳዊ አነ ወተወለድኩ በሀገረ ጠርሴስ ዘቂልቅያ ወልህቁ በዛቲ ሀገር በታሕተ እገሪሁ ለገማልያል ወተምህርኩ በሕገ አበውየ ወኮንኩ ቀናኤ ለእግዚአብሔር ከመ ኵልክሙ አንትሙ ዮም።

⁴ ወሰደድክዎሙ ወቀተልክዎሙ እንዘ እሞቅሖሙ ለዕደዊሆሙ ወለአንስቲያሆሙ።

⁵ወየአምሩ ሊቃነ ካህናት ወረበናት ኵሎሙ እለ ነሣእኩ እምኀቤሆሙ መጽሐፈ መባሕት ከመ እሑር ኀበ አኀው እለ በደማስቆ ከመ አምጽኦሙ ለእለ ሀለዉ ህየ ወአእትዎሙ ሙቁሓኒሆሙ ኢየሩሳሌም ይትኰነኑ።

⁶ ወእምዝ እንዘ አሐውር ደማስቆ አልጺቅየ ኀበ ሀገር ሶበ ይከውን ቀትረ ግብተ በረቀ መብረቅ ዐቢይ እምሰማይ ላዕሌየ።

⁷ ወነጽሐኒ ውስተ ምድር ወሰማዕኩ ቃለ ዘይብለኒ ሳውል ሳውል ለምንት ትሰድደኒ።

⁸ወተሰጠውክዎ ወእቤሎ መኑ አንተ እግዚኦ ወይቤለኒ አነ ውእቱ ኢየሱስ ናዝራዊ ዘአንተ ትሰድደኒ።

⁹ ወእለ ሀለዉ ምስሌየ ርእዩ መብረቆ ወደንገፁ ወቃለሰ ዘይትናገረኒ ኢሰምዑ።

¹⁰ ወእቤ ምንተ እግብር እግዚእየ ወይቤለኒ ተንሥእ ወሑር ደማስቆ ወበህየ ይነግሩከ ዘሀለወከ ትግበር።

¹¹ወእምዝ ተጸለልኩ አዕይንትየ እምግርማ መብረቅ ወአልቦ ዘእሬኢ ወእንዘ ይመርሑኒ እለ ምስሌየ በጻሕኩ ደማስቆ።

¹²ወሀሎ አሐዱ ብእሲ ዘስሙ ሐናንያ ኄር ወፈራሄ እግዚአብሔር በሕግ ወይንእድዎ ኵሎሙ አይሁድ እለ ይነብሩ ደማስቆ።

¹³ወመጽአ ኀቤየ ወቆመ ቅድሜየ ወይቤለኒ ሳውል እኁየ ርኢ ወርኢኩ ሶቤሃ።

¹⁴ ወይቤለኒ አምላከ አበዊነ ሤመከ ከመ ታእምር ፈቃዶ ወትርአዮ ለጻድቅ ወትስማዕ ቃሎ እምአፉሁ።

¹⁵ወትኵኖ ሰማዕቶ በኀበ ኵሉ ሕዝብ በዘርኢከ ወበዘሰማዕከ።

¹⁶ወይእዜኒ ዘከመ ትገብር እነግረከ ተንሥእ ወተጠመቅ ወተኀፀብ እምኀጣውኢከ ወጸውዕ ስሞ።

¹⁷ ወእምዝ ገቢእየ ኢየሩሳሌም እንዘ እጼሊ ሌሊተ በቤተ መቅደስ ደንገጽኩ።

¹⁸ወርኢክዎ እንዘ ይብለኒ ፃእ ፍጡነ እምኢየሩሳሌም እስመ ኢይትዌከፉ ስምዐ ዚኣከ በእንቲኣየ።

¹⁹ወእቤ አነ እወ እግዚኦ ለሊሆሙ የአምሩ ከመ አነ ዘእሞቅሖሙ ወእቀሥፎሙ ለእለ የአምኑ ብከ በምኵራባቲሆሙ።

²⁰ ወአመሂ ቀተልዎ ለእስጢፋኖስ ሰማዕትከ ሀሎኩ ምስሌሆሙ ህየ ኅቡረ ወአዐቅብ አልባሲሆሙ ለእለ ቀተልዎ።

²¹ ወይቤለኒ ሑር እስመ እፌንወከ ኀበ አሕዛብ እለ ርኁቃን ትስብክ ወሰማዕክዎ ከመዝ ይቤለኒ።[25]

²² ወሶበ ሰምዑ ዘንተ ነገረ እምጳውሎስ ከልሑ በዐቢይ ቃል ወይቤሉ አእትቶ ለዘከመዝ እምብሔርነ እስመ ኢይደልዎ ይሕየው።

²³ወእንዘ ይጠርዑ ወይዌርዉ አልባሲሆሙ ወይዘርዉ ጸበለ ውስተ ነፋስ።

²⁴ወአዘዘ መልአክ ያብእዎ ውስተ ምኵናን ወይቅሥፍዎ ወይሕትትዎ ጌጋዮ ከመ ያእምር በእንተ ምንት የዐወይዉ ላዕሌሁ።

²⁵ ወሶበ ሰሐብዎ በእገሪሁ ማእከለ እለ ይቀሥፍዎ ይቤሎ ጳውሎስ ለሐቢ ዘይቀውም ኀቤሁ ይከውነክሙሁ ትቅሥፉ ሰብአ ሮሜ ዘእንበለ አበሳ።

²⁶ወሰሚዖ ሐቢ ሖረ ኀበ መልአክ ወነገሮ ወይቤሎ አእምር ዘትገብር ዝኩ ብእሲ ሰብአ ሮሜ ውእቱ።

²⁷ወቀርበ ኀቤሁ መልአክ ወይቤሎ ንግረኒ እስኩ ሰብአ ሮሜኑ አንተ ወይቤ እወ።

²⁸ወተሰጥዎ መልአክ ወይቤሎ አንሰኬ ብዙኀ ንዋየ ውሂብየ ረከብክዋ ለዛቲ ሢመት ወይቤሎ ጳውሎስ አንሰኬ በህየ ተወለድኩ።

²⁹ወእምዝ ኀደግዎ እለ ይፈቅዱ ይቅሥፍዎ ወመልአክኒ ፈርሀ አእሚሮ ከመ ሰብአ ሮሜ ውእቱ።

³⁰ወበሳኒታ ፈቀደ መልአክ ያእምር ጥዩቀ በእንተ ምንት ያስተዋድይዎ አይሁድ ወፈትሐ ማእሰሮ ወአዘዘ ይምጽኡ ሊቃነ ካህናት ወኵሉ ዐውድ ወአምጽኦ ለጳውሎስ ወአቀሞ ማእከሎሙ።