Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 24 Bible Online

ግብረ ሐዋርያት 24 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 24

¹ ወአመ ኀሙስ ዕለት ወረደ ሐናንያ ሊቀ ካህናት ምስለ ረበናት ወአሐዱ ዐቃቤ ነቢብ ዘስሙ ጠርጠሉስ ወአስተዋደይዎ ለጳውሎስ ኀበ መልአክ።

²ወአቅረበ ሎሙ ወአኀዘ ይንግር ጠርጠሉስ ወይቤ።

³ብዙኀ ሰላመ አድማዕነ በመዋዕሊከ ወሠናየ ኮነ ንብረቶሙ ለሕዝብ በጥበብከ በኵሉ ወበኵለሄ ወረከብነ ሥርዐተከ እንዘ ትትአኰት በኀበ ኵሉ ኦ ፊልክስ ክቡር።

⁴ወባሕቱ ከመ ኢያጽሕብከ ፈድፋደ አጽምዐኒ ወብቍዐኒ ኅጹረ ነገረ እንግርከ።

⁵ረከብናሁ ለዝ ብእሲ ይነብብ ፅርፈተ ወይገብር ማዕሌተ ወየሀውክ ኵሎ አይሁደ በኵሉ በሐውርት ወይሜህር ካሕደ ዘሕዝበ ናዝራውያን።

⁶ ወአርኰሰ ቤተ መቅደስ ወአኀዝናሁ ወፈቀድነ ኰንኖቶ በከመ ሕግነ።

⁷ወመጽአ ሉስዮስ መልአክ ወአድኀኖ እምእደዊነ በብዙኅ ግብር ወፈነዎ ኀቤከ።

⁸ወአዘዞሙ ለእለ ይትዋቀሥዎ ይምጽኡ ኀቤከ ወዘኒ አስተዋደይናሁ ኵሎ ሀለወከ ታእምር እምኀቤሁ ሐቲተከ ከመ አማን ውእቱ።

⁹ወተሰጥዉ አይሁድ ወይቤሉ አማን ከመዝ ውእቱ።

¹⁰ወቀጸቦ መልአክ ለጳውሎስ ከመ ይትናገር ወይቤ ጳውሎስ አነ አአምር ከመ እምብዙኅ ዓመታት መኰንኖሙ አንተ ለዝ ሕዝብ ወተአምር ግዕዞሙ ወተኃሥሦቶሙ።

¹¹ወይእዜኒ እነግረከ ተፈሢሒየ ቅስትየ ዘሀለወከ ታእምር ከመ ኢየአክል ዐሡረ ወሰኑየ ዕለተ እምዘዐረጉ ኢየሩሳሌም እስግድ።

¹²ወኢረከቡኒ እንዘ እትዋቀሥ ኢበምኵራብ ወኢምስለ መኑሂ ወኢእንዘ አሀውክ ሕዝበ ኢ በምኵራብ ወበቤተ መቅደስ ወኢ በሀገር።

¹³ወኢይክሉ አብጽሖተ በኵሉ ዘያስተዋድዩኒ በቅድሜከ።

¹⁴ወባሕቱ አአምነከ እንበይነ ዘይብሉኒ ይሜህር ካሕደ አንሰ አመልኮ ለእግዚአብሔር እንዘ እትአመን በኵሉ ግብር ዘጽሑፍ ውስተ ኦሪት ወነቢያት።

¹⁵ ወእሴፈዎ ለእግዚአብሔር ከመ እሙንቱ ይትአመኑ ከመ ሀለዎሙ ይትነሥኡ ምዉታን ጻድቃን ወኃጥኣን።

¹⁶ ከማሁ አነሂ እትአመኖ ለእግዚአብሔር በጥቡዕ ልብ በቅድመ እግዚአብሔር ወበቅድመ ሰብእ በኵሉ ጊዜ።

¹⁷ ወእምድኅረ ብዙኅ መዋዕል ወዓመታት መጻእኩ ለኀበ ሕዝብየ ከመ እግበር ምጽዋተ ወከመ አዕርግ መሥዋዕተ።

¹⁸ ወረከቡኒ እሙንቱ በምኵራብ እንዘ አነጽሕ ርእስየ ወኢረከቡኒ እንዘ እትጋዐዝ ወእትላኰይ ወአልቦ ዘሆኩ ሕዝበ።

¹⁹ወሀለዉ አይሁድ እለ መጽኡ እምእስያ ወይእዜኒ ግበር ይምጽኡ ኀቤከ ከመ ያስተዋድዩኒ።

²⁰ወእመ አኮ ነዮሙ እሉሂ ይንግሩ ጽድቀ እመቦ ዘሰምዑ ዘአበስኩ አነ ወእመኒ ቦ ዘርእዩ ዘገፋዕኩ በዘአምጽኡኒ ኀበ ምኵናን ዘኀቤከ።

²¹ ወአልቦ እኩይ ዘእንበለ አሐቲ ትምህርት ዘመሀርኩ ቀዊምየ በማእከሎሙ በብሂለ የሐይዉ ምዉታን ዘረከበኒ ዝ ተኰንኖ በኀቤከ ዮም።

²² ወፊልክስሰ የአምር ከመ እምትካት ይትቃረኑ አይሁድ ምስለ ሕግ ወትምህርት ዘሕዝበ ክርስቲያን ወከመ አይሁድ መጻርርቲሃ ለሃይማኖት ወበእንተዝ የውሆሙ ወይቤሎሙ እንከሰኬ ወሪዶ ሉስዮስ መኰንን ነሐትት ከመ ናእምር ወንጠይቅ ነገረክሙ።

²³ ወአዘዞ ለሐቤ ቤተ ሞቅሕ ከመ ኢያጽንዖ ለጳውሎስ ወያንብሮ ውስተ መርሕብ ወኢያጽብብ ላዕሌሁ ወኢይክልኦ ለአሐዱሂ እምእለ የአምርዎ ሶበ ይመጽኡ ይትለአክዎ።

²⁴ወእምድኅረ ኅዳጥ መዋዕል ነበረ ፊልክስ ምስለ ዱርሳሌም ብእሲቱ አይሁዳዊት ወለአከ ወጸውዖ ለጳውሎስ ወሰምዕዎ ቃላተ ወትምህርታተ በእንተ አሚን በኢየሱስ ክርስቶስ።

²⁵ወሶበ ነገሮሙ በእንተ ጽድቅ ወሕይወት ወበእንተ ኵነኔ ዘለዓለም ወደይን ወፍትሕ ወርትዕ ዘይከውን በዕለተ ኵነኔ ፈርሀ ፊልክስ እምዝንቱ ወይቤሎ ለጳውሎስ ይእዜሰኬ ሑር ወሶበ ብሕትኩ እልእክ ዘይጼውዐከ።

²⁶ወመሰሎ ለፊልክስ ከመ ይሁቦ ጳውሎስ ወይሔልዮ ንዋየ ይኅድጎ ወበእንተዝ ወትረ ይጼውዖ ወይትናገሮ።

²⁷ ወሶበ ኀለፈ ክልኤቱ ዓመት ተስዕረ ፊልክስ ወመጽአ መካነ ሢመቱ ካልእ መኰንን ዘስሙ ፊስጦስ ወፈቀደ ፊልክስ ያድሉ ለአይሁድ ገሃደ ወበእንተዝ ኀደጎ ለጳውሎስ ውስተ ቤተ ሞቅሕ።