Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 25 Bible Online

ግብረ ሐዋርያት 25 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 25

¹ወበጺሖ ፊስጦስ ቂሳርያ ጐንደየ ሠሉሰ መዋዕለ ወእምዝ ዐርገ ኢየሩሳሌም።

² ወዖድዎ ሊቃነ ካህናት ወዐበይተ አይሁድ ወነገርዎ በእንተ ጳውሎስ።

³ ወሰአልዎ ከመ ይጸግዎሙ ወከመ ይልአክ ያምጽእዎ ለዐውድ ዘኢየሩሳሌም ወእሙቱሰ ፈቀዱ ከመ ይሑሩ ህየ ወበፍኖት ይቅትልዎ።

⁴ወአውሥኦሙ ከመ የዐቅብዎ ለጳውሎስ በቂሳርያ ወከመ የሐውር ለሊሁ ፍጡነ ህየ።

⁵ወይቤሎሙ ለአይሁድ እለ ትክሉ እምውስቴትክሙ ረዱ ትትዋቀሡ ምስለ ውእቱ ብእሲ ዘአስተዋደይክምዎ።

⁶ወነቢሮ ኀቤሆሙ ሰሙነ መዋዕለ አው ዐሡረ ወረደ ቂሳርያ ወበሳኒታ ነበረ ዐውደ ወአዘዘ ያምጽእዎ ለጳውሎስ።

⁷ወቀሪቦ ጳውሎስ አስተዋደይዎ አይሁድ እለ ወረዱ እምኢየሩሳሌም ብዙኀ ጌጋየ ወክቡደ በዘኢይክሉ አብጽሖቶ።

⁸ ወእንዘ ይወቅሥ ሎሙ ጳውሎስ ወይብል አልቦ ዘአበስኩ ላዕለ ኦሪቶሙ ለአይሁድ ወኢዲበ ምኵራቦሙ ወኢለነጋሢ።

⁹ወፈቀደ ፊስጦስ ያእኵትዎ አይሁድ ወይቤሎ ለጳውሎስ ትፈቅድኑ ትዕርግ ኢየሩሳሌም ወበህየ ትትዋቀሥ አው በኀቤየ።

¹⁰ወአውሥአ ጳውሎስ ወይቤሎ አንሰ እቀውም ቅድመ መንበረ ቄሣር ወበህየ ይደሉ ሊተ ፍትሕ ወለሊከ ተአምር እምነ ኵሉ ሰብእ ከመ አልብየ ዘአበስኩ ላዕለ አይሁድ።

¹¹ወእመሰ ቦ ዘዐመፅኩ ወቦ እኩይ ዘገብርኩ በዘእመውት ኢይትሀከይ መዊተ ወእመሰ በከ ያስተዋድዩኒ እሉ ዘአልብየ ጌጋይ ለመኑ ብእሲ ይደልዎ የሀበኒ ሎሙ አነ በቄሣር ንጉሥ እጠርእ።

¹²ወእምዝ ተናጊሮ ፊስጦስ ምስለ መማክርቲሁ ይቤ ጠርአ በቄሣር ነጋሢ ወኀበ ቄሣር የሐውር።

¹³ወእምድኅረ ኅዳጥ መዋዕል ወረዱ አግሪጳ ንጉሥ ወበርኒቄ ወተአምኅዎ ለፊስጦስ።

¹⁴ወነቢሮሙ ብዙኀ መዋዕለ ኀቤሁ ነገሮሙ በእንተ ጳውሎስ ወይቤሎሙ ሀሎ አሐዱ ብእሲ ሙቁሕ ዘኀደጎ ፊልክስ።

¹⁵ወእንዘ ሀሎኩ ኢየሩሳሌም መጽኡ ኀቤየ ሊቃነ ካህናት ወረበናተ አይሁድ ወአስተብቍዑኒ ከመ እኰንኖ ሎሙ።

¹⁶ ወእቤሎሙ ኢይከውን ወሕግ አልቦ በዘይኴንንዎ ዘኢዘለፍዎ ማሕተት ወዘኢረከቡ ሎቱ ጌጋየ ሕሩመ ኢይኴንኑ ሰብአ ሮሜ በከመ ረከቡ።

¹⁷ወእምዝ መጺእየ ዝየ ተጋብኡ ካዕበ ወበነግህ ነበርኩ ሎሙ ዐውደ ወአዘዝኩ ያምጽእዎ ለውእቱ ብእሲ።

¹⁸ወአቀምኩ ምስሌሁ እለ ያስተዋድይዎ ወአልቦ ምንትሂ እኩይ ዘገብረ በዘአብጽሕዎ ሎቱ በከመ ኀለይኩ።

¹⁹ ዘእንበለ በእንተ ሕገጊሆሙ ዘይትካሐዱ ወሀሎ አሐዱ ብእሲ ዘስሙ ኢየሱስ ዘሞተ ወጳውሎስ ይብል ሕያው ውእቱ።

²⁰ወኀጢእየ እንከ ዘእገብር ሎሙ ፍትሐ በእንተ ማኅሠሦሙ እቤሎ ለጳውሎስ ትፈቅድኑ ትሑር ኢየሩሳሌም ወበህየ ትትዋቀሥ።

²¹ወአበየ ውእቱሰ ወተዘመረ መድኀኒቶ ኀበ ንጉሥ ወእምዝ አዘዝኩ ይዕቀብዎ እስከ እፌንዎ ኀበ ቄሣር።

²²ወይቤሎ አግሪጳ ለፊስጦስ አነሂ እፈቱ እስምዖ ለውእቱ ብእሲ ወይቤሎ ፊስጦስ እንከሰኬ ጌሠመ ትሰምዖ።

²³ወበሳኒታ መጽኡ አግሪጳ ወበርኒቄ ተረሲዮሙ ምስለ ብዙኅ ግርማ ወቦኡ ወነበሩ ዐውደ ምስለ መሳፍንት ወዐበይተ ሀገር ወአዘዘ ፊስጦስ ያምጽእዎ ለጳውሎስ።

²⁴ ወሶበ በጽሐ ጳውሎስ ይቤ ፊስጦስ ስምዑ አግሪጳ ንጉሥ ኵልክሙ እለ ሀለውክሙ ምስሌነ አኀዊነ ወነዋኬ ውእቱ ብእሲ ዘአስተዋደይዎ አይሁድ በኢየሩሳሌም ወበዝየኒ የዐወይዉ ወይስእሉ ከመ ግሙራ ኢያሕይውዎ።

²⁵አንሰኬ ሐቲትየ ጥዩቀ ከመ አልቦ ጌጋይ ወአልቦ እኩይ ዘገብረ በዘይመውት እስመ ውእቱ ፈተወ በጺሐ ኀበ ንጉሥ ፈቀድኩ እንከ እፈንዎ።

²⁶ወባሕቱሰ ኀጣእኩ ዘእብል አበሳሁ እንዘ እጽሕፍ ለእግዚእየ ንጉሥ ወይእዜኒ ፈቀድኩ ከመ አምጽኦ ኀቤክሙ ወፈድፋደሰ ኀቤከ ኦ አግሪጳ ንጉሥ እመቦ ዘእረክብ ጌጋየ ሶበ ትሴአሎ፥ ወትሰምዕ ነገሮ ምንተ እጽሕፍ በእንቲኣሁ ኀበ ንጉሥ።

²⁷እስመ ኢይደሉ ንፈንዎ ኀበ ንጉሥ ሙቁሐ ዘአልብነ ጽሕፈተ አበሳሁ ወይእዜኒ ናሁ አምጻእክዎ ኀቤክሙ ሕትቱ እስኩ ለእመቦ ዘትረክቡ ጌጋይ ዘንጽሕፍ እስመ ሊተሰ ዐፀበኒ ነገሩ ወፈንዎቶሂ ሙቁሐ።