Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 26 Bible Online

ግብረ ሐዋርያት 26 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 26

¹ወይቤሎ አግሪጳ ለጳውሎስ አባሕናከ ንግር በእንተ ርእስከ ወእምዝ አንሥአ እዴሁ ጳውሎስ ወአኀዘ ይንግሮሙ።

²ወይቤ በእንተ ኵሉ ዘይትኀሠሡኒ አይሁድ ኦ አግሪጳ ንጉሥ ብፁዕ አነ ዮም ዘበኀቤከ እትዋቀሥ።

³እስመ ተአምር ግዕዞሙ ወተኃሥሦቶሙ ለአይሁድ ብቍዐኒ ወተዐጊሠከ አጽምዐኒ።

⁴ንብረትየሰ ዘበንእስየ በውስተ ሕዝብየ ልህቁ በኢየሩሳሌም ወየአምሩኒ ኵሎሙ አይሁድ እምትካት።

⁵ ወየአምሩ ኵሎሙ አይሁድ እምትካት እመሰ ፈቀዱ ይኩኑ ስምዐ ከመ በሕገ አበውየ እገብር እንዘ ፈሪሳዊ አነ።

⁶ወይእዜኒ በትውክልተ ተስፋ እንተ ኮነት ቀዲሙ እምኀበ እግዚአብሔር ለአበዊነ እቀውም ግሩረ ለኵነኔ።

⁷እንተ ባቲ ዐሠርቱ ወክልኤቱ ሕዝበ ዚኣነ መዓልተ ወሌሊተ እንዘ ይትቀነዩ ሎቱ ተሰፈዉ በጺሖታ ወበእንተ ውእቱ ተስፋ ይትኀሠሡኒ አይሁድ ኦ ንጉሥ አግሪጳ ምንተ እንከ ትፈትሕ።

⁸ አኮኑ ይደሉ ንእመን ከመ እግዚአብሔር ያሐይዎሙ ለሙታን።

⁹ ወአነሂ አጥባዕኩ እግበር እኩየ ዲበ ስሙ ለኢየሱስ ናዝራዊ ብዙኀ።

¹⁰ወገበርኩሂ ዘንተ በኢየሩሳሌም ወሞቃሕክዎሙ ለብዙኃን ጻድቃን አስተበዊሕየ በኀበ ሊቃነ ካህናት ከመ እቅትሎሙ።

¹¹ወአምጻእኩ መጽሐፈ መባሕት ለኵሉ መኳርብት ወዘልፈ አሐምሞሙ ከመ በግብር ይፅርፉ ላዕለ ስሙ ለኢየሱስ ወፈድፋደሰ አበድኩ ላዕሌሆሙ እንዘ እዴግኖሙ ውስተ አህጉር።

¹²ወእንዘ አሐውር ሀገረ ደማስቆ አስተበዊሕየ በኀበ ሊቃነ ካህናት በእንተ ዝንቱ።

¹³ወሶበ ይከውን ጊዜ ቀትር እንዘ ሀሎኩ ውስተ ፍኖት ኦ ንጉሥ ርኢኩ እምሰማይ በረቀ መብረቅ ዘይበርህ እምፀሐይ ወኵሉ ሰብእ ዘየሐውሩ ምስሌየ ወለልየኒ ምስሌሆሙ ወደቅነ ውስተ ምድር ኵልነ።

¹⁴ወሰማዕኩ ቃለ ዘይብለኒ በነገረ ዕብራይስጥ ሳውል ሳውል ለምንት ትሰድደኒ ይብእሰከ ረጊጽ ውስተ ቀኖት በሊኅ።

¹⁵ወእቤ አነ መኑ አንተ እግዚኦ ወይቤለኒ አነ ውእቱ ኢየሱስ ዘአንተ ትሰድደኒ።

¹⁶ ወባሕቱ ተንሥእ ወቁም በእገሪከ እስመ በእንተዝ አስተርአይኩከ እሢምከ ላእከ ወሰማዕተ በዘርኢከኒ ወበዘሀለወከ ትርአየኒ።

¹⁷ ወአድኅነከ እምሕዝብ ወአሕዛብ እለ እፌንወከ አነ ኀቤሆሙ።

¹⁸ ከመ ትክሥት አዕይንቲሆሙ ወትሚጦሙ እምጽልመት ውስተ ብርሃን ወእምጣዖተ ሰይጣን ኀበ እግዚአብሔር ከመ ይትኀደግ ሎሙ ኀጢአቶሙ ወይርከቡ መክፈልተ ምስለ ቅዱሳን በአሚን በስምየ።

¹⁹ ወይእዜኒ ኦ ንጉሥ አግሪጳ ኢክሕድኩ ዘአስተርአየኒ ሊተ እምሰማይ።

²⁰ ወቀደምኩ ወነገርክዎሙ ለእለ በደማስቆ ወለእለ በኢየሩሳሌም ወለኵሉ በሐውርተ ይሁዳ ወለአሕዛብኒ ወመሀርክዎሙ ይነስሑ ወይትመየጡ ኀበ እግዚአብሔር ወይግበሩ ዘይደሉ ለንስሓሆሙ።

²¹በእንተ ዝኬ አኀዙኒ አይሁድ በምኵራብ ወፈቀዱ ይቅትሉኒ።

²² ወአድኀነኒ እግዚአብሔር ወበጻሕኩ እስከ ዮም ወቆምኩ እንዘ እነግር ለንኡስ ወለዐቢይ ወአልቦ ባዕድ ዘመሀርኩ ዘእንበለ ዘይብሉ ነቢያት ዘሀለዎ ይኩን ወሙሴሂ ዘይቤ።

²³ ከመ ይትቀተል ክርስቶስ ወያቀድም ተንሥኦ እምዉታን ወያበርህ ለሕዝብ ወለኵሉ አሕዛብ ወበሐውርት።

²⁴ወዘንተ ብሂሎ ተሰጥወ መኰንን ፊስጦስ ወጸርሐ በዐቢይ ቃል ወይቤሎ ተአብድኑ ጳውሎስ አብዝኆ መጻሕፍትኬ ያዘነግዕ ልበ።

²⁵ወይቤሎ ጳውሎስ እበድሰ አልብየ ኦ ፊስጦስ መኰንን ዳእሙ እነግር ጽድቀ ወንጽሐ።

²⁶ ወየአምር ሊተ ለሊሁ ንጉሥ አግሪጳ ዘበኀቤሁ ክሡተ እነግር ወይመስለኒሂ አልቦ ዘይስሕት እምዝንቱ እስመ ኢኮነ ኅቡአ በማዕዘንት።

²⁷ናሁ ትትአመን በቃለ ነቢያት ኦ ንጉሥ አግሪጳ! ወአአምር ከመሰ ተአምን።

²⁸ወይቤሎ አግሪጳ ለጳውሎስ ተኀይጠኒኑ ታብአኒ ውስተ ዐቢይ ክርስቲያን ሕቀ ክመ ዘእምአባእከኒ ውስተ ክርስቲያን ይእዜ።

²⁹ወይቤሎ ጳውሎስ አንሰ እጼሊ ኀበ እግዚአብሔር እመሂ በኅዳጥ ወእመሂ በብዙኅ አኮ ባሕቲትከ አላ ዓዲ ኵሎሙ እለ ይሰምዑኒ ዮም ይኩኑ ከማየ ዘእንበለ ዝ መዋቅሕት።

³⁰ወእምዝ ተንሥአ ንጉሥ ወመኰንን ወበርኒቄ ወዐበይቶሙ።

³¹ወተግኂሦሙ በባሕቲቶሙ ተናገሩ በበይናቲሆሙ ወይቤሉ አልቦ ዘአበሰ ዝ ብእሲ በዘይመውት ወኢበዘይትሞቃሕ።

³² ወይቤሎ አግሪጳ ለፊስጦስ መፍትው እመ ፈታሕክሙ ዘንተ ብእሴ ወኀደግምዎ ይሕየው ወእመ አኮሰ ተማሐፀነ በቄሣር ወኀበ ቄሣር የሐውር ወኀበ ቄሣር ፈንዎ።[28]