Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 3 Bible Online

ግብረ ሐዋርያት 3 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 3

¹ወዐርጉ ምኵራበ ጴጥሮስ ወዮሐንስ ጊዜ ተሱዓት ለጸሎት።

² ወሀሎ አሐዱ ብእሲ ዘፅዉስ እገሪሁ ወተወልደ ከማሁ እምከርሠ እሙ ወይጸውርዎ ኵሎ ዕለተ ወያነብርዎ በኆኅተ ምኵራብ እንተ ስማ ኦርያ ከመ ይሰአል ምጽዋተ እምኀበ እለ ይበውኡ ምኵራበ።

³ወርእዮሙ ለጴጥሮስ ወለዮሐንስ ይበውኡ ምኵራበ ወሰአሎሙ የሀብዎ ምጽዋተ።

⁴ወተመይጥዎ ጴጥሮስ ወዮሐንስ ኀቤሁ ወይቤልዎ ተመየጥ መንገሌነ።

⁵ወነጸረ ኀቤሆሙ ወተሰፈወ የሀብዎ ምጽዋተ።

⁶ ወይቤሎ ጴጥሮስ ወርቅሰ ወብሩር አልብየ ወእምዘብየሰ እሁበከ ናሁ በስሙ ለኢየሱስ ክርስቶስ ናዝራዊ ተንሥእ ወሑር።

⁷ ወአኀዞ በእዴሁ ዘየማን ወአንሥኦ ወተንሥአ ሶቤሃ ወጸንዐ እገሪሁ ወሐቌሁ።

⁸ ወሖረ ምስሌሆሙ እንዘ ይሠግር ወቦአ ምኵራበ ወአእኰተ እግዚአብሔርሃ።

⁹ወርእይዎ ኵሎሙ ሕዝብ እንዘ የሐውር ወየአኵት እግዚአብሔርሃ።

¹⁰ወአእመርዎ ከመ ውእቱ ዘይነብር በኆኅተ ምኵራብ እንተ ስማ ኦርያ ወይስእል ወደንገፁ ወአንከሩ በእንተ ተኣምር ዘኮነ ላዕሌሁ።

¹¹ወእንዘ ይእኅዝዎ ጴጥሮስ ወዮሐንስ ይበውኡ ምኵራበ ሮጹ ኵሉ ሕዝብ ኀቤሆሙ ኀበ ሕዋረ ሰሎሞን ድንጉፃኒሆሙ።

¹²ወሶበ ርእዮሙ ጴጥሮስ ለሕዝብ ይቤሎሙ አንትሙ ሰብአ እስራኤል ምንተኑ ታነክሩነ ወምንተኑ ትኔጽሩነ ከመ ዘበኀይልነ ገበርናሁ ወከመ ዘበሥልጣንነ ረሰይናሁ አው እምኀበ ነፍሳቲነኑ አሕየውናሁ ለዝንቱ ከመ ይሑር በእገሪሁ አልቦኬ።

¹³ አላ አምላከ አብርሃም ወአምላከ ይስሐቅ ወአምላከ ያዕቆብ አምላከ አበዊነ ሰብሖ ለወልዱ ኢየሱስ ክርስቶስ ዘአንትሙ ዐለውክምዎ ወክሕድክምዎ በቅድመ ገጸ ጲላጦስ ፈቂዶ ውእቱ ያሕይዎ ለክሙ።

¹⁴ ወአንትሙሰ ክሕድክምዎ ለቅዱስ ወለጻድቅ ወሰአልክሙ ብእሴ ቀታሌ ነፍስ ያሕዩ ለክሙ።

¹⁵ ወለመልአከ ሕይወትሰ ቀተልክምዎ ወእግዚአብሔር አንሥኦ እሙታን ወንሕነ ኵልነ ሰማዕቱ።

¹⁶ከመ በሃይማኖተ ስሙ ለዝ ዘትሬእዩ ወተአምሩ አጽንዖ ወበሃይማኖተ ዚኣሁ ወሀቦ ዘንተ ሕይወተ በቅድሜክሙ።

¹⁷ወይእዜኒ አኀውየ አአምር ከመ በኢያእምሮ ገበርክምዎ ለዝ ከመ ገብሩ መላእክቲክሙ።

¹⁸ወእግዚአብሔርሰ በከመ አቅደመ ነጊረ በአፈ ኵሎሙ ነቢያት ከመ ይትቀተል ክርስቶስ አብጽሐ ከማሁ።

¹⁹ ወይእዜኒ ነስሑ ወተጠመቁ[5] ወይደመሰስ ለክሙ ኀጢአትክሙ ወይመጽእ ለክሙ መዋዕለ ሣህል እምቅድመ ገጹ ለእግዚአብሔር።

²⁰ ወይፌንዎ ለክሙ ለኢየሱስ ክርስቶስ ዘአቅደመ ቀቢዐ።

²¹ዘኪያሁ ይሴፈዉ ሰማያት ወምድር እስከ አመ ያስተራትዕ ኵሎ በከመ ነበበ እግዚአብሔር በአፈ ነቢያቲሁ ቅዱሳን እለ እምዓለም።

²² ሙሴሂ ይቤሎሙ ለአበዊነ «ነቢየ ያነሥእ ለክሙ እግዚአብሔር አምላክነ እምአኀዊክሙ ዘከማየ ወሎቱ ስምዕዎ ኵሎ ዘይቤለክሙ።

²³ወኵላ ነፍስ እንተ ኢትሰምዖ ለውእቱ ነቢይ ለትሠረው እምሕዝባ።»

²⁴ወኵሎሙ ነቢያት እለ እምአመ ሳሙኤል ነቢይ ወእለሂ እምድኅሬሁ ነገሩ ወአይድዑ በእንተ እላንቱ መዋዕል።

²⁵ ወአንትሙ ውሉዶሙ ለነቢያት ወውሉደ ሥርዐት ዘሠርዖ እግዚአብሔር ለአበዊነ እስመ ይቤሎ ለአብርሃም «በዘርዕከ ይትባረኩ ኵሎሙ አሕዛበ ምድር።»

²⁶ ወለክሙ ቀደመ አንሥኦቶ እግዚአብሔር ለወልዱ ወፈነዎ ይባርክሙ ከመ ትነስሑ ኵልክሙ እምእከይክሙ።