Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 8 Bible Online

ግብረ ሐዋርያት 8 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 8

¹ ወውእተ አሚረ ኮነ ዐቢይ ምንዳቤ ወሁከት በቤተ ክርስቲያን ዘኢየሩሳሌም ወተዘርዉ ኵሎሙ ውስተ ኵሉ በሐውርተ ይሁዳ ወሰማርያ ወገሊላ ዘእንበለ ሐዋርያት ባሕቲቶሙ ዘነበሩ በኢየሩሳሌም።[12]

² ወለእስጢፋኖስሰ ነሥእዎ ዕደው ጻድቃን ወቀበርዎ ወላሐውዎ ዐቢየ ላሐ።

³ ወሳውልሰ ዓዲሁ ይትቄየም አብያተ ክርስቲያናት ወይደቢ አብያተ ሰብእ ወይስሕብ ዕደወ ወአንስተ ወይሞቅሕ።

⁴ ወእለሰ ተዘርዉ አንሶሰዉ ወመሀሩ ወሰበኩ ቃለ እግዚአብሔር።

⁵ወወረደ ፊልጶስ ሀገረ ሰማርያ ወሰበከ ሎሙ በእንተ ክርስቶስ።

⁶ወአጽምዕዎ ሕዝብ ዘይነግሮሙ ፊልጶስ ወሰምዕዎ ኅቡረ ወያነክሩ ወይሬእዩ ተኣምረ ወመንክረ ዘይገብር።

⁷ ወብዙኃን አጋንንት እኩያን ይኬልሑ በዐቢይ ቃል ወይወፅኡ ወብዙኃን ፅዉሳን ወሐንካሳን የሐይዉ።

⁸ወኮነ ዐቢይ ፍሥሓ በይእቲ ሀገር።

⁹ወሀሎ አሐዱ ብእሲ በይእቲ ሀገር ዘስሙ ሲሞን ወያስሕቶሙ ለሕዝበ ሰማርያ ዘሥራይ ብእሲሁ ወይሬሲ ርእሶ ዐቢየ።

¹⁰ወይትአመንዎ ንኡሶሙ ወዐቢዮሙ ወይብሉ ዝ ውእቱ ኀይለ እግዚአብሔር ዐቢይ።

¹¹ወያጸምዕዎ እስመ ጕንዱይ መዋዕል እምዘአስሐቶሙ በሥራዩ።

¹² ወሶበ አምንዎ ለፊልጶስ ዘሰበከ ሎሙ በእንተ መንግሥተ እግዚአብሔር ወበስመ ኢየሱስ ክርስቶስ ዕድ ወአንስት ተጠምቁ።

¹³ወሲሞንሂ አምነ ወተጠምቀ ወነበረ ይፀመዶ ለፊልጶስ እስመ ይሬኢ ተኣምረ ወመንክረ ዘይከውን በእደዊሁ ወያነክር ወይዴመም።

¹⁴ወሶበ ሰምዑ ሐዋርያት እለ ሀለዉ ኢየሩሳሌም ከመ ተወክፉ ሰብአ ሰማርያ ቃለ እግዚአብሔር ፈነዉ ኀቤሆሙ ጴጥሮስሃ ወዮሐንስሃ።

¹⁵ወወረዱ ወጸለዩ ላዕሌሆሙ ከመ ይንሥኡ መንፈሰ ቅዱሰ።

¹⁶እስመ ዓዲሁ ኢወረደ መንፈስ ቅዱስ ወኢ ዲበ አሐዱሂ እምውስቴቶሙ ዳእሙ ተጠምቁ በስሙ ለእግዚእነ ኢየሱስ ክርስቶስ።

¹⁷ወእምዝ ወደዩ ሐዋርያት እደዊሆሙ ላዕሌሆሙ ወነሥኡ መንፈሰ ቅዱሰ።

¹⁸ወሶበ ርእየ ሲሞን ከመ ኀበ ወደዩ እደዊሆሙ ሐዋርያት ይወርድ መንፈስ ቅዱስ አምጽአ ሎሙ ንዋየ።

¹⁹ወይቤሎሙ አብሑኒ ሊተኒ ወሀቡኒ ከመ ኀበ ወደይኩ እዴየ ይረድ መንፈስ ቅዱስ።

²⁰ወይቤሎ ጴጥሮስ ወርቅከሰ ወብሩርከ ምስሌከ ለይኩንከ ለሕርትምና ይመስለከኑ ዘበወርቅ ትሣየጦ ለጸጋ እግዚአብሔር።

²¹አልብከ መክፈልት ወርስት ውስተ ዝ ነገር እስመ ኢኮነ ርቱዐ ልብከ በቅድመ እግዚአብሔር።

²²ነስሕ ይእዜኒ እምእከይከ ወተጋነይ ለእግዚአብሔር ለእመ የኀድግ ለከ እከየ ልብከ።

²³እስመ እሬእየከ ዘትነብር በሕምዝ መሪር ወውስተ ማእሰረ ዐመፃ ሀሎከ።

²⁴ወተሰጥዎሙ ሲሞን ወይቤሎሙ ሰአሉ ሊተ አንትሙ ኀበ እግዚአብሔር ከመ ኢይብጽሐኒ ወኢምንተኒ እምዘትቤሉኒ።

²⁵ወእሙንቱሰ ሶበ ነገሩ ወአስምዑ ቃለ እግዚአብሔር ተሠውጡ ኢየሩሳሌም ወመሀሩ ቃለ እግዚአብሔር ውስተ ብዙኃት አህጉረ ሰማርያ።

²⁶ወነበቦ መልአከ እግዚአብሔር ለፊልጶስ ወይቤሎ ተንሥእ ወሑር ጊዜ ቀትር ፍኖተ በድው ዘያወርድ እምኢየሩሳሌም ለጋዛ።

²⁷ወተንሥአ ወሖረ ወረከበ ብእሴ እምሰብአ ኢትዮጵያ ኅጽዋ ለህንደኬ ንግሥተ ኢትዮጵያ ወመጋቢሃ ውእቱ ላዕለ ኵሉ መዛግብቲሃ ወሖረ ኢየሩሳሌም ይስግድ።

²⁸ወእንዘ ይገብእ ነበረ ዲበ ሠረገላሁ ወያነብብ መጽሐፈ ኢሳይያስ ነቢይ።

²⁹ወይቤሎ መንፈስ ቅዱስ ለፊልጶስ ሑር ትልዎ ለዝ ሠረገላ።

³⁰ወሮጸ ፊልጶስ ወበጽሐ ወሰምዖ ያነብብ መጽሐፈ ኢሳይያስ ነቢይ ወይቤሎ ፊልጶስ ተአምርኑ እንከ ዘታነብብ።

³¹ወይቤሎ ኅጽው በአይቴ አአምር ለእመ አልቦ ዘመሀረኒ ወአስተብቍዖ ለፊልጶስ ከመ ይዕርግ ወይንበር ኅቡረ ምስሌሁ።

³² ወነገረ መጽሐፍሰ ኀበ ያነብብ ከመዝ ይብል «መጽአ ከመ በግዕ ይጠባሕ ወከመ በግዕ ዘኢይነብብ በቅድመ ዘይቀርፆ ከማሁ ኢከሠተ አፉሁ በሕማሙ።

³³ወተንሥአ እምኵነኔ ወእምነ ሞቅሕ ወመኑ ይነግር ልደቶ እስመ ተአተተ እምድር ሕይወቱ።»

³⁴ወተመይጠ ኀበ ፊልጶስ ውእቱ ኅጽው ወይቤሎ ብቍዐኒ ወንግረኒ በእንተ መኑ ይብል ነቢይ ከመዝ በእንተ ርእሱኑ ወሚመ በእንተ ካልእ።

³⁵ወከሠተ አፉሁ ፊልጶስ ወአኀዘ ይምሀሮ በእንተ ኢየሱስ ክርስቶስ ወይፈክር ሎቱ በውእቱ መጽሐፍ።

³⁶ወእንዘ የሐውሩ በጽሑ ኀበ ማይ ወይቤሎ ውእቱ ኅጽው ነዋ ማይ ወመኑ ይከልአኒ ተጠምቆ።

³⁷ ወይቤሎ ፊልጶስ ይደልወከ ከመ ትእመን በኵሉ ልቡናከ ወአውሥአ ውእቱ ኅጽው ወይቤ አነ አአምን ከመ ኢየሱስ ክርስቶስ ውእቱ ወልዱ ለእግዚአብሔር።

³⁸ወአዘዘ ያቅሙ ሠረገላሁ ወአቀሙ ወወረዱ ኅቡረ ኀበ ማይ ፊልጶስ ወውእቱ ኅጽው ወአጥመቆ።

³⁹ ወወፂኦሙ እማይ መንፈሰ እግዚአብሔር መሠጦ ለፊልጶስ ወኢርእዮ እንከ ውእቱ ኅጽው። ወአተወ ብሔሮ እንዘ ይትፌሣሕ።

⁴⁰ ወበጽሐ ፊልጶስ ሀገረ አዛጦን ወአንሶሰወ ወመሀረ በኵሉ አህጉር እስከ በጽሐ ቂሳርያ።