Read Ge'ez NT – ሐዲስ ኪዳን በልሳነ ግእዝ ግብረ ሐዋርያት 9 Bible Online

ግብረ ሐዋርያት 9 - Ge'ez NT – ሐዲስ ኪዳን በልሳነ ግእዝ bible

ግብረ ሐዋርያት 9

¹ ወሳውልሰ ዓዲሁ ይትቄየም አብያተ ክርስቲያናት ወይቀትሎሙ ለአርዳአ እግዚእነ ወሖረ ኀበ ሊቀ ካህናት።

²ወሰአለ በኀቤሁ መጽሐፈ መባሕት ለሀገረ ደማስቆ ወለመኳርብት ለእመቦ ዘይረክብ በፍኖት ዕደወ ወአንስተ ከመ ያእትዎሙ ኢየሩሳሌም ሙቁሓኒሆሙ።

³ ወእንዘ የሐውር ሶበ አልጸቀ ለሀገረ ደማስቆ ግብተ በረቀ መብረቅ እምሰማይ ላዕሌሁ።

⁴ወወድቀ ውስተ ምድር ወሰምዐ ቃለ ዘይቤሎ ሳውል ሳውል ለምንት ትሰድደኒ።

⁵ወይቤሎ መኑ አንተ እግዚኦ ወይቤሎ አነ ውእቱ ኢየሱስ ናዝራዊ ዘአንተ ትሰድደኒ ይብእሰከ ረጊጽ ውስተ ቀኖት በሊኅ።

⁶ወእንዘ ይርዕድ ይቤሎ እግዚኦ ምንተኑ ትፈቅድ እግበር አነ ወይቤሎ እግዚእ ተንሥእ ወባእ ሀገረ ወበህየ ይነግሩከ ዘይደልወከ ትግበር።

⁷ወሰብእሰ እለ ምስሌሁ ቆሙ ያጸምዑ ነገሮ ወአልቦ ዘይሬእዩ።

⁸ወተንሥአ ሳውል እምድር ወእንዘ ክሡታት አዕይንቲሁ አልቦ ዘይሬኢ ወእንዘ ይመርሕዎ አብእዎ ደማስቆ።

⁹ወነበረ ህየ ሠሉሰ ዕለተ እንዘ ኢይሬኢ ወኢይበልዕ ወኢይሰቲ።

¹⁰ወሀሎ አሐዱ ብእሲ በሀገረ ደማስቆ ዘእምውስተ አርድእት ዘስሙ ሐናንያ ወአስተርአዮ እግዚእነ በራእይ ወይቤሎ ሐናንያ ወይቤ ነየ እግዚኦ።

¹¹ ወይቤሎ እግዚእነ ተንሥእ ወሑር ሰኰተ እንተ ይብልዋ ርትዕት ወኅሥሥ በቤተ ይሁዳ ዘስሙ ሳውል ዘሀገረ ጠርሴስ እስመ ውእቱ ናሁ ይጼሊ።

¹²ወእንዘ ይጼሊ ሳውል አስተርአዮ ብእሲ በአምሳለ ሐናንያ ቦአ ኀቤሁ ወወደየ እዴሁ ዲቤሁ ከመ ይርአይ።

¹³ወአውሥአ ሐናንያ ወይቤ እግዚኦ ሰማዕኩ በእንተ ውእቱ ብእሲ በኀበ ብዙኃን ኵሎ ዘይገብር እኩየ ዲበ ቅዱሳኒከ በኢየሩሳሌም።

¹⁴ ወበዝየኒ አስተበዊሖ በኀበ ሊቀ ካህናት መጽአ ከመ ይሞቅሖሙ ለኵሎሙ እለ ይጼውዑ ስመከ።

¹⁵ ወይቤሎ እግዚእነ ተንሥእ ወሑር እስመ ንዋየ ኅሩየ ረሰይክዎ ሊተ ከመ ይጹር ስምየ በቅድመ አሕዛብ ወነገሥት ወደቂቀ እስራኤል።

¹⁶ወአነ አርእዮ መጠነ ሀለዎ ይሕምም በእንተ ስምየ።

¹⁷ወሶቤሃ ሖረ ሐናንያ ወቦአ ቤቶ ወወደየ እዴሁ ዲቤሁ ወይቤሎ ሳውል እኁየ ፈነወኒ ኀቤከ እግዚእነ ኢየሱስ ክርስቶስ ዘአስተርአየከ በፍኖት እንዘ ትመጽእ ከመ ትርአይ ወይምላእ መንፈስ ቅዱስ ላዕሌከ።

¹⁸ወሶቤሃ ተሥዕዐ እምአዕይንቲሁ ከመ ዘሣሬት ወተከሥታ አዕይንቲሁ ወርእየ ሶቤሃ ወተንሥአ ወተጠምቀ።

¹⁹ወበልዐ እክለ ወጸንዐ ወነበረ ደማስቆ ኅዳጠ መዋዕለ ምስለ አርድእት።

²⁰ወሰበከ በጊዜሃ በምኵራባት ወመሀረ በእንተ ኢየሱስ ክርስቶስ እንዘ ይብል ውእቱ ወልደ እግዚአብሔር።

²¹ ወአንከሩ ኵሎሙ እለ ሰምዑ ወይቤሉ አኮኑ ዝንቱ ዘኮነ ይሰድዶሙ ለእለ ይጼውዑ ዘንተ ስመ በኢየሩሳሌም ወዝየኒ በእንተዝ መጽአ ከመ ይሞቅሖሙ ወይሰዶሙ ኀበ ሊቃነ ካህናት።

²² ወሳውልሰ ፈድፋደ ይጸንዖሙ ወይመውኦሙ ለአይሁድ እለ ይነብሩ ደማስቆ ወያበጽሕ ሎሙ ከመ ውእቱ ክርስቶስ።

²³ወእምድኅረ ብዙኅ መዋዕል ተማከሩ አይሁድ ይቅትልዎ ለሳውል።

²⁴ወአእመሮሙ ሳውል ምክሮሙ ዘይፈቅዱ ይግበሩ ላዕሌሁ ወየዐቅቡ አናቅጸ ሀገር መዓልተ ወሌሊተ ከመ ይቅትልዎ።

²⁵ ወነሥእዎ አርድእት ሌሊተ ወአውረድዎ በአስፈሬድ እንተ ተድባበ ቅጽር።

²⁶ ወበጺሖ ሳውል ኢየሩሳሌም ኀሠሦሙ ለአርድእት ይትራከቦሙ ወፈርህዎ ኵሎሙ ወኢአምንዎ ከመ ኮነ ረድኦ ለእግዚእነ።

²⁷ወነሥኦ በርናባስ ወወሰዶ ኀበ ሐዋርያት ወነገሮሙ ዘከመ አስተርአዮ እግዚእነ በፍኖት ወዘከመ ተናገሮ ወዘከመ መሀረ በስሙ ለኢየሱስ በደማስቆ።

²⁸ወነበረ ይበውእ ወይወፅእ ምስሌሆሙ በኢየሩሳሌም ወይሜህር ክሡተ በስሙ ለእግዚእነ ኢየሱስ።

²⁹ወይትዋቀሦሙ ለአረሚ ወፈቀዱ ካዕበ እሙንቱ ይቅትልዎ።

³⁰ ወአእሚሮሙ ቢጹ አውረድዎ ቂሳርያ ወእምዝ ፈነውዎ ጠርሴስ።

³¹ወነበራ ኵሎን አብያተ ክርስቲያናት ዘይሁዳ ወሰማርያ ወገሊላ በሰላም ወተሐንጻ ወሖራ በፍርሃተ እግዚአብሔር ወበዝኁ ሕዝብ በትምህርተ መንፈስ ቅዱስ።

³²ወእምዝ አንሶሰወ ጴጥሮስ በኀበ ኵሎሙ ቅዱሳን እለ ይነብሩ ልዳ።

³³ወረከበ በህየ ብእሴ ዘስሙ ኤንያ ወሰመንቱ ዓመቱ ሎቱ እምዘ ደወየ ወሰከበ ውስተ ዐራት እስመ ውእቱ መፃጕዕ።

³⁴ወይቤሎ ጴጥሮስ ኤንያ ተሣሀለከ ያሕዩከ ኢየሱስ ክርስቶስ ተንሥእ ወንሣእ ዐራተከ[13] ወተንሥአ ሶቤሃ ወነሥአ ዐራቶ።

³⁵ወርእይዎ ኵሎሙ እለ ይነብሩ ልዳ ወሳሮና ወተመይጡ ኀበ እግዚእነ።

³⁶ወበሀገረ ኢዮጴ ሀለወት አሐቲ ረድእት እንተ ስማ ጣቢታ ዘበትርጓሜሁ ይብልዋ ዶርቃስ ወይጠል ብሂል ወብዙኀ ምግባረ ሠናየ ትገብር ወትሁብ ምጽዋተ።

³⁷ወውእተ አሚረ ሞተት ደዊያ ወኀፀብዋ በድና ወአስከብዋ ውስተ ጽርሕ።

³⁸ወቅሩብ ሀገረ ልዳ ለኢዮጴ ወሰሚዖሙ አርድእት ከመ ሀሎ ጴጥሮስ ህየ ለአኩ ኀቤሁ ክልኤተ ዕደወ ያስተብቍዕዎ ኢይትሀከይ በጺሖቶሙ።

³⁹ወተንሥአ ጴጥሮስ ወሖረ ምስሌሆሙ ወበጺሖ አዕረግዎ ጽርሐ ወመጽኣ ኀቤሁ ኵሎን ዕቤራት ወቆማ ቅድሜሁ ወአኀዛ ይብክያሃ ወአርአያሁ አልባሰ ወክዳናተ ዘአረዘቶን ዶርቃስ እንዘ ሀለወት ውስተ ሕይወት።

⁴⁰ ወሰደደ ጴጥሮስ ኵሎ ወሰገደ ወጸለየ ወተመይጠ መንገለ በድና ወይቤላ ጣቢታ ተንሥኢ ወከሠተት አዕይንቲሃ ወሶቤሃ ርእየቶ ለጴጥሮስ ወነበረት።

⁴¹ወመጠዋ እዴሁ ወአንሥኣ ወጸውዖሙ ለቅዱሳንሂ ወለዕቤራትሂ ወአወፈያ ኪያሃ ሕያውታ።

⁴²ወሰምዑ ኵሉ ኢዮጴ ወአምኑ ብዙኃን በእግዚእነ።

⁴³ወነበረ ጴጥሮስ ብዙኀ መዋዕለ በሀገረ ኢዮጴ ወኀደረ ውስተ ቤተ ስምዖን ሰፋዪ።