Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 12 Bible Online

ኀበ ሰብአ ሮሜ 12 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 12

¹ አስተበቍዐክሙ አኀዊነ በሣህሉ ለእግዚአብሔር ረስዩ ነፍስተክሙ መሥዋዕተ ቅዱሰ ለእግዚአብሔር ወሕያወ ወሥሙረ ወኅሩየ ይኩን ቍርባንክሙ ወቅኔክሙ ነባቢ።

² ኢታፍቅርዎ ለዝ ዓለም ወሐድሱ ልበክሙ ወአመክሩ ዘይፈቅድ እግዚአብሔር ዘሠናይ ወዘጽድቅ ወዘፍጹም።

³ ወእነግረክሙ ለኵልክሙ በጸጋ እግዚአብሔር ዘተውህበ ሊተ ከመ ኢትትዐበዩ ወኢተኀልዩ ትዝኅርተ አላ ኀልዩ በዘታነጽሑ ርእሰክሙ እምዝሙት ወኵሉ በከመ ከፈሎ እግዚአብሔር በመስፈርተ ሃይማኖቱ።

⁴በከመ በውስተ አሐዱ ነፍስትነ ብዙኅ መለያልይ ብነ ወዘዘዚኣሁ ምግባሩ።

⁵ ከማሁ ኵልነ እንዘ ብዙኃን አሐዱ ሥጋ ንሕነ በክርስቶስ።

⁶ ወብክሙ ጸጋ እግዚአብሔር ወዘዘ ዚኣሁ ጸጋሁ ዘሂ ይትኔበይ በሐሳበ ሃይማኖቱ።

⁷ ወዘሂ ይትለአክ በመልእክቱ ወዘሂ ይሜህር በትምህርቱ።

⁸ ወዘሂ ይትፌሣሕ በፍሥሓሁ ወዘሂ ይሠየም ከመ ያሥልጥ መልእክቶ ወዘሂ ይምሕር በምሒሮቱ።

⁹ ተፋቀሩ ዘእንበለ ኑፋቄ ተገኀሡ እምኩይ ወትልዉ ሠናየ።

¹⁰ ወአድልዉ ለጽድቅ አፍቅሩ ቢጸክሙ ወኩኑ መሓርያነ ተካበሩ በበይናቲክሙ ወአክብሩ መኳንንቲክሙ።

¹¹ ወለጻሕቅ ኢትትሀከዩ ለመንፈስ ተሐይዉ ለእግዚአብሔር ተቀነዩ።

¹² ለተስፋክሙ ተፈሥሑ ለሕማምክሙ ተዐገሡ ለጸሎትክሙ ተፀመዱ።

¹³ ለግብረ ቅዱሳን ተሳተፉ አፍቅሮ ነግድ አትልዉ።

¹⁴ ደኀርዎሙ ለእለ ይሰድዱክሙ ደኀሩ ወኢትርግሙ።

¹⁵ ምስለ ዘይትፌሣሕ ተፈሥሑ ወምስለ ዘይበኪ ብክዩ።

¹⁶ ወከመዝ ኀልዩ ምስለ ቢጽክሙ ወትዕቢተሰ ኢተኀልዩ ወከመ ዘያቴሕት ርእሶ ተመሰሉ።

¹⁷ ወኢትበሉ ጠቢባን ንሕነ ወኢትፍድይዎ እኩየ ለዘአሕሠመ ለክሙ ሠናየ ተናገሩ ምስለ ቢጽክሙ።

¹⁸ ወእመሰ ይትከሀለክሙ ምስለ ኵሉ ሰብእ ተኣኀዉ።

¹⁹ ወኢትትበቀሉ ለሊክሙ አኀዊነ አኅልፍዋ ለመዓት እስመ ከመዝ ይቤ «አነ እትቤቀል ወአነ እትፈደይ ይቤ እግዚአብሔር።»

²⁰ወእመኒ ርኅበ ጸላኢከ አብልዖ ወለእመኒ ጸምአ አስትዮ ወዘንተ ለእመ ገበርከ አፍሐመ እሳት ታስተጋብእ ዲበ ርእሱ።

²¹ወኢትማኦ ለእኩይ በእኩይ አላ ማኦ ለእኩይ በገቢረ ሠናይ።