Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 14 Bible Online

ኀበ ሰብአ ሮሜ 14 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 14

¹ ወለዘኒ ድኩም ሃይማኖቱ ጹርዎ ወአጽንዕዎ ወኢትግበሩ ለአድልዎ።

² ዘሰ የአምን ከመ ኵሉ ብዉሕ ሎቱ ኵሎ ለይብላዕ ወዘሰ ይናፍቅ ሐምለ ለይሴሰይ።

³ ወዘኒ ይበልዕ ኢይመንኖ ለዘኢይበልዕ ወዘኒ ኢይበልዕ ኢይግዐዞ ለዘይበልዕ እስመ ለኵሎሙ እግዚአብሔር አእመሮሙ።

⁴ ምንትኑ አንተ ዘትግዕዝ ነባሬ ባዕድ እንዘ ለእግዚኡ ይቀውም እመኒ ወድቀ ለእግዚኡ ይቀውም ወይክል እግዚአብሔር አቅሞቶ።

⁵እስመ ቦ ዘይትሔረም እምዕለት ዕለተ ወቦ ዘይትሔረም በኵሉ መዋዕል ወባሕቱ ለኵሉ በከመ አዘዞ ልቡ።

⁶ ዘሂ ተሐረመ በበዕለቱ ለእግዚአብሔር ተሐረመ ወዘሂ ተሐረመ በኵሉ መዋዕል ለእግዚአብሔር ተሐረመ ወዘሂ በልዐ ለእግዚአብሔር በልዐ ወየአኵቶ ለእግዚአብሔር ወዘኒ ኢበልዐ ለእግዚአብሔር ኢበልዐ ወየአኵቶ ለእግዚአብሔር።

⁷ወአልቦ እምውስቴትነ ዘለርእሱ የሐዩ ወዘለርእሱ ይመውት።

⁸ ወእመኒ ሐየውነ ለእግዚአብሔር ነሐዩ ወእመኒ ሞትነ ለእግዚአብሔር ንመውት እመኒ ሐየውነ ወእመኒ ሞትነ ለእግዚአብሔር ንሕነ።

⁹ ወበእንተዝ ሞተ ክርስቶስ ወሐይወ ከመ ይኰንን ሕያዋነ ወሙታነ።

¹⁰ ምንትኑ አንተ እንከ ዘትግዕዝ ቢጸከ ወምንትኑ አንተ ዘትሜንን ቢጸከ እስመ ሀለወነ ኵልነ ንብጻሕ ቅድመ መንግበረ ምኵናኑ ለክርስቶስ።

¹¹ እስመ ከመዝ ይቤ እግዚአብሔር «ሕያው አነ እስመ ሊተ ይሰግድ ኵሉ ብርክ ወሊተ ይገኒ ኵሉ ልሳን።»

¹² ናሁ ተዐውቀ ከመ ሀለወነ ኵልነ ንትሐተት በኀበ እግዚአብሔር።

¹³ ወኢንግዐዝ እንከ ቢጸነ ወዘንተ ዳእሙ ነኀሊ በዘኢንግዕዝ ቢጸነ።

¹⁴ ወአአምር፥ ወእትአመን በእግዚእነ ኢየሱስ ከመ አልቦ ዘይማስን በእንቲኣሁ ለሙሱን ዳእሙ ኵሉ ይማስን።

¹⁵ ወእመሰ እንበይነ መብልዕ ተሐይሶ ለቢጽከ አልብከኬ ተፋቅሮ ቦኑ እንበይነ መብልዕ ይትኀጐል ዝኩ ዘበእንቲኣሁ ሞተ ክርስቶስ።

¹⁶ ኢትፅርፉ እንከ ላዕለ ሠናይ ዘጸገወነ እግዚእነ።

¹⁷ እስመ ኢኮነ መንግሥተ እግዚአብሔር መብልዐ ወመስቴ ዘእንበለ ጽድቅ ወሰላም ወፍሥሓ በመንፈስ ቅዱስ።

¹⁸ወዘሰ ከመዝ ይትቀነይ ለክርስቶስ ሥሙር በኀበ እግዚአብሔር ወኅሩይ በኀበ ሰብእ።

¹⁹ ወይእዜኒ ንትልዋ ለሰላም በዘይትሐነጽ ቢጽነ።

²⁰ወኢንስዐር ግብረ እግዚአብሔር እንበይነ መብልዕ ወባሕቱ ኵሉ ንጹሕ ለንጹሓን ወእኩይሰ ለሰብእ በኑፋቄ በሊዕ።

²¹ ይኄይስ ኢበሊዐ ሥጋ ወኢሰትየ ወይን እምአዕቅፎ ቢጽ።

²² ወእመኒ ብከ ሃይማኖት አጽንዕ ርእሰከ በተአምኖትከ ቅድመ እግዚአብሔር ወብፁዕ ዘይዘልፍ ርእሶ በዘረከበ አእምሮ።

²³ ወዘሰ ይናፍቅ ለእመ በልዐ ይትኴነን እስመ ኢኮነ በአሚን ወኵሉ ዘይከውን ዘእንበለ አሚን ኀጢአት ወጌጋይ ውእቱ።