Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 15 Bible Online

ኀበ ሰብአ ሮሜ 15 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 15

¹ ወርቱዕሰ አንትሙ ጽኑዓን ትጹርዎሙ ድካሞሙ ለስኡናን ወኢናድሉ ለርእስነ።

² ወኵልነ ናድሉ ለጽድቅ፥ ወለግብር ሠናይ በዘይትሐነጽ ቢጽነ።

³ ክርስቶስኒ አኮ ለርእሱ ዘአድለወ በከመ ይብል መጽሐፍ «ትዕይርቶሙ ለእለ ይትዔየሩከ ወድቀ ላዕሌየ።»

⁴ ወኵሉ ዘተጽሕፈ ለተግሣጸ ዚኣነ ተጽሕፈ ከመ በትዕግሥትነ ወበተወክሎ መጻሕፍት ንርክብ ተስፋነ።

⁵ ወእግዚአብሔር አምላከ ትፍሥሕት ወአቡሃ ለምሕረት የሀበነ ነኀሊ ዘዚኣሁ ለኵልነ በእንተ ኢየሱስ ክርስቶስ።

⁶ ከመ ኵልነ ኅቡረ በአሐዱ አፍ ንሰብሖ ለእግዚአብሔር በኢየሱስ ክርስቶስ እግዚእነ።

⁷ወይእዜኒ ተወከፉ ቢጸክሙ እስመ ክርስቶስ ተወክፈክሙ ውስተ ስብሐተ እግዚአብሔር።

⁸ እብል እንከ ክርስቶስ ላእከ ኮነ ለግዝረት ለጽድቀ ቃለ እግዚአብሔር ወከመ ያጽንዓ ለተስፋ አበዊነ።

⁹ ወአሕዛብሰ ይሴብሕዎ ለእግዚአብሔር እስመ ተሣሀሎሙ እስመ ከማሁ ይቤ መጽሐፍ «በእንተዝ እገኒ ለከ በውስተ አሕዛብ እግዚኦ ወእዜምር ለስምከ።»

¹⁰ ወካዕበ ይቤ መጽሐፍ፤ «ተፈሥሑ አሕዛብ ምስለ ሕዝቡ።»

¹¹ ወካዕበ ይቤ «ሰብሕዎ ለእግዚአብሔር ኵልክሙ አሕዛብ ወይሴብሕዎ ኵሎሙ ሕዝብ።»

¹² ኢሳይያስኒ ይቤ «ይቀውም ሥርወ እሴይ ወዘተሠይመ እምኔሁ ይከውን ንጉሠ ለአሕዛብ ወሕዝብ ይትዌከሉ ቦቱ።»

¹³ ወእግዚአብሔር አምላከ ተስፋ ይፈጽም ለክሙ ኵሎ ፍሥሓ ወሰላመ በአሚን ከመ ያብዝኅክሙ በተስፋሁ ለመንፈስ ቅዱስ ወበኀይሉ።

¹⁴ ወእትአመነክሙ አነሂ አኀዊነ ከመ ትፈጽሙ በኵሉ ምግባረ ሠናይ ወጽጉባን አንትሙ በኵሉ ጥበብ ወትክሉ ምህሮቶሙ ለቢጽክሙ።

¹⁵ወተኀቢልየ ጸሐፍኩ ለክሙ እምአሐዱ ገጽ በእንተ ጸጋሁ ለእግዚአብሔር ዘረከብኩ።

¹⁶ ከመ እትለአክ ለኢየሱስ ክርስቶስ ውስተ አሕዛብ ወከመ እትቀነይ ለትምህርተ እግዚአብሔር ከመ ይኩን መሥዋዕቶሙ ለአሕዛብ ሥሙረ ወኅሩየ በመንፈስ ቅዱስ በላዕሌየ።

¹⁷ወሊተሰ ኢየሱስ ክርስቶስ ምክሕየ ለኀበ እግዚአብሔር።

¹⁸ ወእትኀበል እንግር ዘገብረ ሊተ ክርስቶስ በዘየአምኑ አሕዛብ በቃል ወበምግባር።

¹⁹ በኀይል ወበትእምርት ወበመንክር በኀይለ መንፈስ ቅዱስ ወዘከመ መሀርኩ በኢየሩሳሌም እስከ አድያሚሃ ለኢያሪኮ ወፈጸምኩ ትምህርተ ክርስቶስ።

²⁰ ወፈድፋደ ተፈቅረት ትምህርቱ ወኢሖርኩ ኀበ ተሰምየ ክርስቶስ ከመ ኢይሕንጽ ዲበ መሠረተ ባዕድ።

²¹ በከመ ይብል መጽሐፍ «እለኒ ኢዜነውዎሙ በእንቲኣሁ ያእምርዎ ሀለዎሙ ወእለኒ ኢሰምዕዎ ይለብውዎ።»

²² ወዘልፈ እፈቅድ እምጻእ ኀቤክሙ ወይሰአነኒ።

²³ ወይእዜ ባሕቱ እስመ ሰለጥኩ በዝ በሐውርት እስመ እጽሕቅ እምጻእ ኀቤክሙ እምጕንዱይ ዕለት።

²⁴ ወእንዘ አሐውር መንገለ ሲባንያ እሴፎ እርአይክሙ ኅሉፈ ወእምኀቤክሙ እትፌኖ ህየ እምከመ ቀደምኩ ወተፈሣሕኩ ምስሌክሙ።

²⁵ ወይእዜሰ አሐውር ኢየሩሳሌም ለመልእክተ ቅዱሳን።

²⁶ እስመ ኀብሩ መቄዶንያ ወአካይያ ያስተዋፅኡ ለነዳያን እለ በኢየሩሳሌም ወለቅዱሳን ወሠምሩ እስመ ርቱዕ ሎሙ።

²⁷ እምከመሰ ተሳተፍዎሙ ለአሕዛብ በግብር ዘመንፈስ ቅዱስ ርቱዕ ይትለአክዎሙ በዘይትፈቀድ ለነፍስቶሙ።

²⁸ወዘንተ ፈጺምየ ወኀቲምየ አኀልፍ እንተ ኀቤክሙ ለሲባንያ።

²⁹ ወእትአመን ባሕቱ ከመ እምጻእ ኀቤክሙ ለፍጻሜ ትምህርተ ክርስቶስ።

³⁰ወአስተበቍዐክሙ አኀዊነ በእግዚእነ ኢየሱስ ክርስቶስ ወበፍቅረ መንፈስ ቅዱስ ትስአሉ ሊተ በጸሎትክሙ ኀበ እግዚአብሔር።

³¹ከመ ያድኅነኒ እምዐላውያን እለ ብሔረ ይሁዳ ከመ አሥምሮሙ ለቅዱሳን እለ በኢየሩሳሌም።

³²ከመ እምጻእ ኀቤክሙ በፍሥሓ ወአዕርፍ ምስሌክሙ በፈቃደ እግዚአብሔር።

³³ ወአምላከ ሰላም የሀሉ ምስሌክሙ። አሜን።