Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 6 Bible Online

ኀበ ሰብአ ሮሜ 6 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 6

¹ ምንተ እንከ ንብል ንግበርኑ ኀጢአተ ከመ ይፈድፍድ ጸጋሁ ለእግዚአብሔር ሐሰ።

² አኮኑ ወዳእነ ሞትነ እምኀጢአትነ እፎ እንከ ንክል ሐዪወ ባቲ።

³ ወዘንተ ባሕቱ አእምሩ ኵልክሙ ከመ እለ ተጠመቅነ በእግዚእነ ኢየሱስ ክርስቶስ ውስተ ሞቱ ተጠመቅነ።

⁴ ወተቀበርነ ምስሌሁ ውስተ ጥምቀት በሞቱ ከመ በከመ ውእቱ ክርስቶስ ተንሥአ እምዉታን በስብሐተ አቡሁ ከማሁ ንሕነኒ ናንሶሱ ውስተ ሐዳስ ሕይወት።

⁵ ወእመሰኬ ተመሰልናሁ በሞቱ ንትሜሰሎ በሕይወቱሂ።

⁶ ወዘንተ ባሕቱ አእምሩ ከመ ብሉይ ብእሲነ ውእቱ ዘተሰቅለ ምስሌሁ ከመ ይስዐሮ ለነፍስተ ኀጢአት ወኢይገብእ ዳግመ ይትቀነይ ለኀጢአት።

⁷እስመ ዘሞተሰ ድኅነ እምገቢረ ኀጢአት።

⁸ወእምከመሰ ሞትነ ምስሌሁ ለክርስቶስ ንትአመን ከመሂ ነሐዩ ምስሌሁ።

⁹ ተአምሩ ከመ ተንሥአ ክርስቶስ እምዉታን ወኢይመውት እንከ ዳግመ ወኢይረክቦ እንከ ሞት።

¹⁰ ወዘኒ ሞተ ምዕረ ሞተ ወበሞቱ ሰዐራ ለኀጢአት ወዘኒ ሐይወ ለእግዚአብሔር ሐይወ።

¹¹ ወከማሁ አንትሙኒ ረስዩ ርእሰክሙ ምዉታነ ለኀጢአት ወሕያዋነ ኩኑ ለፈቃደ እግዚአብሔር በእንተ እግዚእነ ኢየሱስ ክርስቶስ።

¹²ወኢታንግሥዋ ለኀጢአት ላዕለ ዝንቱ ሥጋክሙ ወነፍስትክሙ መዋቲ ወኢትበልዎ ኦሆ ለፍትወቱ።

¹³ ወኢትረስይዎ ለነፍስትክሙ ንዋየ ሐቅል ለዐመፃ ወለኀጢአት አላ ረስዩ ርእሰክሙ ለእግዚአብሔር ከመ ዘተንሥአ እምዉታን ወለነፍስትክሙ ለእግዚአብሔር ንዋየ ሐቅል ለጽድቅ።

¹⁴ ወኀጢአትሰ ኢትኴንነክሙ እንከ እስመ ወፃእክሙ እምገቢረ ሕገገ ኦሪት ወገባእክሙ ውስተ ጸጋ እግዚአብሔር።

¹⁵ ምንተ እንከ ንብል ንግበርኑ ኀጢአተ እስመ ወፃእነ እምገቢረ ሕገገ ኦሪት ወገባእነ ውስተ ጸጋ እግዚአብሔር ሐሰ።

¹⁶ ወኢተአምሩኑ ከመ ለዘተአዘዝክሙ ወለዘሂ ኦሆ ትቤሉ አግብርቲሁ አንትሙ ወውስተ ዘኀበርክሙ ሎቱ አቅነይክሙ ርእሰክሙ እመሂ ለኀጢአት ኦሆ ትብልዋ ወኀበርክሙ ተአብሱ አግብርቲሁ አንትሙ ትከውኑ ለሞት ወእመሂ ለጽድቅ ኦሆ ትብልዋ ወኀበርክሙ ውስተ ሠናይ አግብርተ እግዚአብሔር አንትሙ።

¹⁷እኩት እግዚአብሔር እንዘ አግብርተ ኀጢአት አንትሙ ተአዘዝክሙ በኵሉ ልብክሙ ለዘተውህበ ለክሙ አርኣያሁ ለዘትትሜሀሩ።

¹⁸ ወይእዜሰ ተግዕዝክሙ እምኀጢአት ወተቀነይክሙ ለጽድቅ።

¹⁹ ሕገ ሰብእ እብለክሙ እስመ ድኩም ቱስሕተ ነፍስትክሙ ዑቁ በከመ ቀዲሙ አቅነይክሙ ርእሰክሙ ለኀጢአት ወለርኵስ ወለጣዖት ከማሁ ይእዜኒ አቅንዩ ነፍስተክሙ ለጽድቅ ወለቅድሳት።

²⁰ እስመ አመ ተቀነይክሙ ለኀጢአት ግዑዛነ ኮንክሙ እምጽድቅ።

²¹ ወበውእቱ ፍሬክሙ ዘአሜሁ ናሁ ይእዜ ትትኀፈሩ ቦቱ እስመ ድኅሬሁ ሎቱ ሞት።

²² ወይእዜሰ ተግዕዝክሙ እምኀጢአት ወአቅነይክሙ ርእሰክሙ ለጽድቅ ወፈረይክሙ ለቅድሳት ወማኅለቅቱሰ ሕይወት ዘለዓለም።

²³ እስመ ተግባራሰ ለኀጢአት ወረባሐ ዚኣሃ ሞት ወለጸጋ እግዚአብሔርሰ ሕይወት ዘለዓለም በእግዚእነ ኢየሱስ ክርስቶስ።