Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 7 Bible Online

ኀበ ሰብአ ሮሜ 7 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 7

¹ ኢተአምሩኑ አኀዊነ ሕገ ንነግረክሙ ትለብዉ እስመ ሕገ ኦሪት ይቀንዮ ለሰብእ አምጣነ ሕያው ውእቱ።

²ከመ ብእሲት እምከመ ባቲ ምት፥ አምጣነ ሕያው ሀሎ ብእሲሃ እስርት ይእቲ በሕግ ወእምከመሰ ሞተ ምታ ተስዕረት እምሕገ ብእሲሃ።

³ ወእመሰ እንዘ ሕያው ብእሲሃ ቀርበት ካልአ ብእሴ ዝሙተ ይከውና ወለእመሰ ሞተ ምታ ተስዕረት እምሕግ ወኢትከውን ዘማዊተ ለእመ ኮነት ለካልእ ብእሲ።

⁴ ወይእዜኒ አኀዊነ ሞትክሙ እምኦሪት በእንተ ሥጋሁ ለክርስቶስ ከመ ትኩኑ ለዳግም ዘተንሥአ እምውታን ከመ ትፍረዩ ለእግዚአብሔር ፍሬ ጽድቅ።

⁵ ወእመሰ በሕገ ሰብእ ንገብር ጸንዐ ላዕሌነ መቅሠፍት በስኢነ ሕገገ ኦሪት ወፈረይነ ለሞት።

⁶ ወይእዜሰ ተስዕርነ እምኦሪት ወኀደግነ ዘቀዲሙ ትምህርተነ ከመ ንትቀነይ በሕገ መንፈስ ወአኮ በብሉይ መጽሐፍ።

⁷ ምንተ እንከ ንብል ኀጢአትኑ ይእቲ ኦሪት ሐሰ ወባሕቱ እምኢያእመርክምዋ ለኀጢአት ሶበ ኢመጽአት ኦሪት ወለፍትወትኒ እምኢያእመርክምዋ ግሙራ ሶበ ኢትቤ ኦሪት ኢትፍቱ።

⁸ ወምክንያተ ኮነታ ይእቲ ትእዛዝ ለኀጢአት ወአምጽአት ላዕሌየ ኵሎ ፍትወታተ ወቀዲሙሰ ዘእንበለ ትምጻእ ኦሪት ምውት ይእቲ ኀጢአት።

⁹ወአነሂ ሐየውኩ ትካት ዘእንበለ ትምጻእ ኦሪት ወሶበ መጽአት ትእዛዘ ኦሪት ሐይወት ኀጢአት ወአንሰ ሞትኩ።

¹⁰ ወኮነተኒ ቀታሊተ እንታክቲ ትእዛዘ ሕይወት።

¹¹ እስመ ኮነታ ምክንያተ ይእቲ ትእዛዝ ለኀጢአት ወበእንቲኣሃ አስሐተተኒ ወቀተለተኒ።

¹² ወይእዜኒ ኦሪትሰ ቅድስት ይእቲ ወትእዛዛኒ ጽድቅ ውእቱ ወሠናይ ወበረከት።

¹³ እብል እንከ ቦኑ ሊተ ይከውነኒ ቀታሌ ዝኩ ዘሠናየ አሐስብ ሐሰ ዳእሙ ኀጢአት ሶበ ተዐውቀት ከመ ይእቲ ኀጢአት አብዝኀት ላዕሌየ ሞተ አኮኑ ከመ ይትዐወቅ ኃጥእ ወከመ ትትአመር ኀጢአት እምውእቱ ትእዛዝ መጽአት ኦሪት ከመ ትፍልጥ ሠናየ እምእኩይ።

¹⁴ ነአምር ከመ ሕገ ኦሪትሰ ለመንፈስ ወአንሰ በሥጋ ወደም ሥዩጥ ለኀጢአት።

¹⁵እስመ ዘኢየአምር እገብር ወዘእፈቅድ ኢይገብር ኪያሁ ምንተኒ ዳእሙ ዝኰ ዘእጸልእ ኪያሁ ክመ እገብሮ።

¹⁶ወእመሰኬ ዘኢይፈቅድ እገብር ሰማዕቱ አነ ለዝኩ ሕገገ ኦሪት ከመ ለሠናይ መጽአ።

¹⁷ወይእዜሰኬ ኢኮንኩ አነ ገባሪሁ ለውእቱ አላ ኀጢአት እንተ ኀደረት ላዕሌየ ይእቲ ትገብሮ።

¹⁸ ወአአምር ከመሰ ኢየኀድር ላዕሌየ ሠናይ በእንተ ሥጋየ ፈቂደ ገቢረ ሠናይሰ ሀሎ ኀቤየ ወምግባረ ሠናይሰ አልብየ።

¹⁹ወአኮሰ ዘእገብር ኪያሁ ዘእፈቅድ ዳእሙ ዝኰ እኩየ ዘእጸልእ ኪያሁ እገብር።

²⁰ወእመሰኬ ዘኢይፈቅድ እገብር ኢኮንኩኬ አነ ዘእገብሮ አላ ኀጢአት እንተ ኀደረት ላዕሌየ ይእቲ ትገብሮ።

²¹ወረከብክዎ ለዝኩ ሕግ ዘፈቀደ ሊተ እግበር ሠናየ ውእቱ አምጽአ ላዕሌየ እኩየ።

²²ሐዋዝ ውእቱ ሕገ እግዚአብሔር ዘውስተ ልብየ።

²³ ወባሕቱ እረክብ ካልአ ሕገ ኀጢአት ውስተ አባልየ ወተጻብኡ ወተቃተሉ ምስለ ዝኩ ሕገ እግዚአብሔር ዘውስተ ልብየ ወኀየለ ዝኩ ሕገ ኀጢአት ዘውስተ አባልየ ወፄወወኒ መንገሌሁ።

²⁴ ትሑት ብእሲ አነ መኑ እምአድኀነኒ እምዝንቱ ነፍስትየ መዋቲ።

²⁵ እኩት እግዚአብሔር በእንተ እግዚእነ ኢየሱስ ክርስቶስ አንሰ ሎቱ እትቀነይ በልብየኒ ወበኅሊናየኒ ለሕገ እግዚአብሔር ወበነፍስትየኒ ለሕገ ኀጢአት።