Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 8 Bible Online

ኀበ ሰብአ ሮሜ 8 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 8

¹ወአልቦሙ እንከ ኵነኔ ለእለ የኀድጉ ምግባረ ሥጋ በኢየሱስ ክርስቶስ።

² እስመ ሕገ መንፈስ ዘሕይወት ዘተውህበ በኢየሱስ ክርስቶስ ውእቱ አግዐዘነ እምሕገ ኀጢአት ወሞት።

³ ወሶበ ተስእኖ ለሕገ ኦሪት ላዕለ ሞት በእንተ ድካመ ሥጋ ፈነወ እግዚአብሔር ወልዶ በአምሳለ ነፍስተ ኀጢአት ወኰነና ለይእቲ ኀጢአት በነፍስቱ።

⁴ከመ ያጽድቀነ ኪያነ ወከመ ይረሲ ለነ ከመ ዘፈጸመ ገቢሮቶ ለሕገ ኦሪት ለእለ በሕገ መንፈስ የሐውሩ ወአኮ ለእለ በሕገ ነፍስቶሙ ይገብሩ።

⁵ እስመ ኵሎሙ እለ ለግዕዘ ነፍስቶሙ ይገብሩ ዘዝንቱ ዓለም ይኄልዩ ወእለሰ ዘመንፈስ ይኄልዩ ዘመንፈስ።

⁶ ወኅሊናሁሰ ለነፍስትነ ሞተ ያመጽእ ላዕሌነ ወኅሊናሁሰ ለመንፈስ ሰላመ ወሕይወተ ይሁብነ።

⁷ እስመ ኅሊናሁ ለነፍስትነ ፀሩ ለእግዚአብሔር ውእቱ እስመ ኢይገርር ለሕገ እግዚአብሔር ወኢሂ ይክሎ።

⁸እስመ ኵሎሙ እለ ለግዕዘ ነፍስቶሙ ይገብሩ ለእግዚአብሔር አድልዎ ኢይክሉ።

⁹ ወአንትሙሰ አኮ ለግዕዘ ነፍስትክሙ ዘትገብሩ ዘእንበለ ለሕገ መንፈስ እስመ መንፈሰ እግዚአብሔር ኅዱር ላዕሌክሙ ወዘሰ አልቦ መንፈሰ ክርስቶስ ላዕሌሁ ውእቱ ዘኢኮነ ዚኣሁ።

¹⁰ወእመሰ ክርስቶስ ምስሌክሙ ምዉተ ረስዩ ነፍስተክሙ ለምግባረ ኀጢአት ወሕያወ ረስዩ መንፈሰክሙ ለምግባረ ጽድቅ።

¹¹እመሰ መንፈሱ ለዘአንሥኦ ለኢየሱስ እምዉታን ኅዱር ላዕሌክሙ ውእቱ ዘአንሥኦ እምዉታን ለኢየሱስ ያሐይዋ ለነፍስትክሙኒ በውእቱ መንፈሱ ዘየኀድር ላዕሌክሙ።

¹² ወይእዜኒ አኀዊነ ኢርቱዕ ንግበር ለግዕዘ ነፍስትነ እንዘ ሀሎነ በነፍስትነ።

¹³ እስመ ኵሎሙ እለ ለግዕዘ ነፍስቶሙ ይገብሩ ምዉታን በላዕሉ እሙንቱ ወእመሰ በምግባረ መንፈስ ቀተልክምዎ ለምግባረ ነፍስትክሙ ተሐይዉ ለዓለም።

¹⁴እስመ ኵሎሙ እለ ይገብሩ ዘመንፈሰ እግዚአብሔር ውሉደ እግዚአብሔር እሙንቱ።

¹⁵ ወዘአኮ ካዕበ ነሣእክሙ መንፈሰ ቅኔ በዘትፈርሁ አላ ነሣእክሙ መንፈሰ ዘይሁበክሙ ትርሲተ ወልድ ወትጸርሑ ሎቱ ወትብልዎ አባ ወአቡየ።

¹⁶ ውእቱ መንፈስ ቅዱስ ሰማዕቱ ለመንፈስነ ከመ ውሉደ እግዚአብሔር ንሕነ።

¹⁷ ወእምከመሰ ውሉደ እግዚአብሔር ንሕነ ወራስያኒሁ ንሕነ ወእምከመሂ ወራስያነ እግዚአብሔር ንሕነ መዋርስቲሁኬ ለክርስቶስ ንሕነ ወእምከመሂ ወራስያነ እግዚአብሔር ንሕነ መዋርስቲሁ ለክርስቶስ ንሕነ ወእምከመሰ ዐረይነ ሕማመ ንዔሪ ክብረ ምስሌሁ።

¹⁸ ወባሕቱ ኀልይዋ ለዛቲኒ ከመ ኢኮነት መጠነ ሤጣ ለእንታክቲ ክብር ወስብሐት እንተ ለዓለም ሕማሙ ለዝ ዓለም።

¹⁹ እስመ ተስፋሁ ለዓለም ምጽአቶ ለወልደ እግዚአብሔር ይጸንሕ።

²⁰ እስመ ለከንቱ ተቀንየ ዓለም በኢያእምሮ።

²¹ ወባሕቱ ቦቱ ተስፋ ከመ ይፃእ እምዝንቱ ዘአስሐቶ ወዘቀነዮ ወይግባእ ውስተ ስብሓተ ግዕዛኖሙ ለደቂቀ እግዚአብሔር።

²²ነአምር ከመ ኵሉ ዓለም ሕሙም ወትኩዝ እስከ ይእዜ።

²³ ወአኮ ዓለም ባሕቲቱ ዓዲ ንሕነሂ ንቴክዝ እለ ነሣእነ ቀዳሚሁ ለመንፈስ ቅዱስ እስመ ንሴፎ ትርሲተ ውሉድ ንርከብ መድኀኒተ ነፍስነ እስመ በአሚን ድኅነ።

²⁴ ወተሰፍዎሰ ዘያስተርኢ ኢኮነ ተስፋ ወዘሰ ይሬኢ እፎ ይሴፎ ወይጸንሕ።

²⁵ወእምከመሰ ንሴፎ ዘኢያስተርኢ ይትዐወቅ ትዕግሥትነ ከመ ተሰፈውናሁ ወቆምነ በእንቲኣሁ።

²⁶ ወይረድአነ ለነ ድካመነ በመንፈስ ቅዱስ ወምንትኑ ውእቱ እንከ ጸሎትነ ለእመ ኢነአምር ተስፋነ ወባሕቱ መንፈስ ለሊሁ ይትዋቀሥ ለነ በእንተ ሕማምነ ወምንዳቤነ።

²⁷ ወውእቱ የሐትቶ ለልብነ ወየአምር ዘይኄሊ መንፈስ ወይትዋቀሥ በኀበ እግዚአብሔር በእንተ ቅዱሳን።

²⁸ ነአምር ከመ ይረድኦሙ እግዚአብሔር ለኅሩያኒሁ ለእለ ያፈቅርዎ ውስተ ኵሉ ምግባረ ሠናይ።

²⁹ እስመ ለእለ ቀደመ ወኀረየ ወአእመሮሙ ኪያሆሙ ሠርዐ ይኩኑ በአምሳለ ወልዱ ከመ ይኩን ውእቱ በኵረ በላዕለ ብዙኃን አኀው።

³⁰ ወለእለሰ ሠርዐ ኪያሆሙ ጸውዐ ወለእለ ጸውዐ ኪያሆሙ አጽደቀ ወእለ አጽደቀ ኪያሆሙ አክበረ።

³¹ ምንተ እንከ ንብል እንበይነዝ ለእመ እግዚአብሔር ምስሌነ መኑ ይክለነ።

³² ወልዶ ጥቀ ኢምሕከ እምኔነ አላ መጠዎ በእንተ ኵልነ ወምንትኑ ውእቱ እንከ ዘኢይጼግወነ ኵሎ።

³³ ወመኑ ውእቱ እንከ ዘይትዋቀሦሙ ለኅሩያነ እግዚአብሔር።

³⁴ለእመ ለሊሁ ያጸድቅ መኑ ዘይኴንን ክርስቶስ ኢየሱስ ሞተ ወተንሥአ እምዉታን ወሀሎ ይነብር በየማነ እግዚአብሔር ወይትዋቀሥ በእንቲኣነ።

³⁵ መኑ ያኀድገነ ፍቅሮ ለክርስቶስ ሕማምኑ ምንዳቤኑ ተሰዶኑ ረኀብኑ ዕርቃንኑ መጥባሕትኑ ጻዕርኑ።

³⁶ በከመ ይቤ መጽሐፍ «በእንቲኣከ ይቀትሉነ ኵሎ አሚረ ወኮነ ከመ አባግዕ ዘይጠብሑ።»

³⁷ ወባሕቱ፥ በእንተዝ ንመውኦ ለኵሉ እስመ ውእቱ አፍቀረነ።

³⁸ እትአመን ባሕቱ ከመ አልቦ ዘያኀድገነ ፍቅሮ ለእግዚአብሔር በኢየሱስ ክርስቶስ እግዚእነ ኢሞት ወኢሕይወት ወኢመላእክት ወኢቀደምት ወኢዘሀሎ ወኢዘይመጽእ።

³⁹ ወኢዘኀይል ወኢዘልዑል ኢዘጸድፍ ወኢዳግም ልደት ዘመትሕት አልቦ ዘይክል አኅድጎተነ ፍቅረ ክርስቶስ።