Read Ge'ez NT – ሐዲስ ኪዳን በልሳነ ግእዝ ኀበ ሰብአ ሮሜ 9 Bible Online

ኀበ ሰብአ ሮሜ 9 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ሮሜ 9

¹ አማን እብለክሙ በእንተ ክርስቶስ ወኢይሔይሱ ወስምዕየ መንፈስ ቅዱስ ዘውስተ ልብየ።

² ከመ እቴክዝ ወአሐምም በልብየ ፈድፋደ በኵሉ ጊዜ።

³ ወእጼሊ ከመ አነ እትዐለል እምክርስቶስ በእንተ አኀውየ ወአዝማድየ እለ በሥጋ።

⁴ እሉ እሙንቱ እስራኤል እስራኤላውያን እለ ሎሙ ትርሲተ ወልድ ወሎሙ ክብር ወሎሙ ሥርዐት ወሎሙ ሕግ ወሎሙ አሰፈወ።

⁵ ወእሙቱ አበዊነ ወእምላዕሌሆሙ ተወልደ ክርስቶስ በሥጋ ሰብእ ዘውእቱ አምላክ ቡሩክ ለዓለመ ዓለም አሜን።

⁶ አኮኑ ኢተሐሰወ ቃለ እግዚአብሔር ወአኮ ኵሎሙ እስራኤል እስራኤላውያን።

⁷ ወአኮ ኵሎሙ ዘርዐ አብርሃም ዘኮንዎ ውሉደ «እምይስሐቅ ዳእሙ ይሰመይ ለከ ዘርዕ ይቤሎ።»

⁸ እስመ አኮ ውሉደ ሥጋ እሙንቱ አላ ውሉደ እግዚአብሔር እለ ይከውንዎ ዘርዐ እለ አሰፈወ ይኩንዎ ውሉደ።

⁹ እስመ አሰፈዎ ወይቤሎ «ዓመ ከመ ዮም እገብእ ኀቤከ ወትረክብ ሣራ ወልደ።»

¹⁰ ወአኮ ባሕቲታ ዓዲ ርብቃኒ ፀንሰት መንታ ለይስሐቅ አቡነ።

¹¹ወዘእንበለ ይትወለዱ ወይግበሩ ሠናየ ወእኩየ ከመ ይትዐወቅ በምንት እንከ ኀርዮቱ ለእግዚአብሔር።

¹² ከመ ያእምሩ ከመ ኢኮነ በምግባሩ ለሰብእ ዘእንበለ ዳእሙ ዘውእቱ ጸውዐ ወይቤላ ለርብቃ ዘየዐቢ ይትቀነይ ለዘይንእስ።

¹³ እስመ ከማሁ ጽሑፍ «ያዕቆብሃ አፍቀርኩ ወኤሳውሃ ጸላእኩ።»

¹⁴ምንተ እንከ ንብል ይዔምፅኑ እግዚአብሔር፤ ሐሰ።

¹⁵ ወይቤሎ እግዚአብሔር ለሙሴ «ለዘሂ መሐርክዎ እምሕሮ ወለዘሂ ተሣሀልክዎ እሣሀሎ።»

¹⁶ ናሁኬ ኢኮነ ለዘበደረ ወለዘሮጸ ዘእንበለ ዳእሙ ለዘእግዚአብሔር ምህሮ።

¹⁷ ወይቤሎ እግዚአብሔር በመጽሐፍ ለፈርዖን «በእንተዝ አንሣእኩከ ከመ አርኢ ኀይልየ በላዕሌከ ወይሰማዕ ስምየ በኵሉ ምድር።»

¹⁸ናሁኬ ለዘፈቀደ ይምሕር ወለዘፈቀደ ያዐፅብ።

¹⁹ምንተ ትብል ተሐይሶኑ ለእግዚአብሔር ቦኑ ዘይትቃወማ ለምክሩ።

²⁰ ዕጓለ እመሕያው ምንትኑ አንተ ዘትትዋሥኦ ለእግዚአብሔር ይክልኑ ብሂሎቶ ግብር ለገባሪሁ ኢትግበረኒ ከመዝ።

²¹ኢኮነኑ ብዉሐ ለብሓዊ ይግበር እምአሐዱ ጽቡር ንዋየ መንፈቆ ለክብር ወመንፈቆ ለኀሣር።

²² ወእመኒ ፈቀደ እግዚአብሔር ያርኢ መቅሠፍተ ኀይሉ ያመጽእ መላእክተ መዓቱ አርአዮ ትዕግሥቶ እለ ድልዋን ለአማስኖ።

²³ ወከመ ያርኢ ካዕበ ብዕለ ስብሐቲሁ ያመጽእ መላእክተ ምሕረቱ እለ ድልዋን ለሣህል ላዕለ እለ ጸውዐ ወአቅደመ አእምሮ።

²⁴ወንሕነ እሙንቱ እለ ጸውዐነ ውስተ ክብሩ ወአስተጋብአነ አኮ እምአይሁድ ባሕቲቶሙ ዓዲ እምአረሚኒ።

²⁵ በከመ ይቤ ሆሴዕ ነቢይ «እሬስዮ ሕዝብየ ለዘኢኮነ ሕዝብየ ወእሬስያ ፍቅርትየ ለእንተ ኢኮነት ፍቅርትየ።

²⁶ ወይከውኑ ውሉደ እግዚአብሔር ሕያው በብሔር በኀበ ይቤልዎሙ ኢኮንክሙ ሕዝበ እግዚአብሔር።»

²⁷ ኢሳይያስኒ ከልሐ ወይቤ በእንተ እስራኤል «ለእመ ኮነ ኍልቆሙ ለደቂቀ እስራኤል ከመ ኆፃ ባሕር እለ ተርፉ ይድኅኑ።

²⁸እስመ ኅሉቀ ወምቱረ ነገረ ይነግር እግዚአብሔር ውስተ ዓለም ዘሀለዎ ይግበር።»

²⁹ ወበከመ አቅደመ ኢሳይያስ ብሂለ «ሶበ አኮ እግዚአብሔር ጸባኦት ዘአትረፈ ለነ ዘርዐ ከመ ሰዶም እምኮነ ወከመ ገሞራ እመሰልነ።»

³⁰ ምንተ እንከ ንብል አረሚ ጥቀ እለ ኢኀሠሥዋ ለጽድቅ ረከብዋ ለጽድቅ ወጸድቁ በአሚን።

³¹ ወእስራኤልሰ እንዘ ይዴግንዋ ለኦሪቶሙ ስእኑ ጸዲቀ እስመ ኢፈጸሙ ገቢረ ሕገገ ኦሪቶሙ።

³²በእንተ ምንት እስመ ኢኮነ ጽድቆሙ በአሚን ዘእንበለ ዳእሙ በገቢረ ሕገገ ኦሪት ወአዕቀፈቶሙ እብነ ዕቅፍት።

³³ እስመ ከማሁ ይቤ መጽሐፍ «ናሁ አነብር ውስተ ጽዮን እብነ ዕቅፍት ወእብነ ጌጋይ ወዘአምነ ባቲ ኢይትኀፈር ለዓለም።»