Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 11 Bible Online

ኀበ ሰብአ ቆሮንቶስ 1 11 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 11

¹ ተመሰሉ ኪያየ በከመ አነ እትሜሰሎ ለክርስቶስ።

²ወአአኵተክሙ አኀውየ እስመ ዘልፈ ትዜከሩኒ ወዘከመ መሀርኩክሙ ትትሐረሙ ከማሁ ተዐቀቡ።

³ ወእፈቅድ ባሕቱ ታእምሩ ከመ ክርስቶስ ርእሱ ለኵሉ ብእሲ ወርእሳ ለብእሲት ምታ ወርእሱ ለክርስቶስ እግዚአብሔር።

⁴ ወኵሉ ብእሲ ዘግልቡብ ርእሱ ይጼሊ አው ይትኔበይ ያኀሥር ርእሶ።

⁵ወኵላ ብእሲት እንዘ ክሡት ርእሳ ትጼሊ አው ትትኔበይ ታኀሥር ርእሳ እስመ ከመ ሉፂት ይእቲ።

⁶ወእመሰ ኢትትገለበብ ብእሲት ለትትላፀይ ወእመ አኮ ለትትቀረፅ ወእመሰ ኀሣር ውእቱ ለብእሲት ተላፅዮሂ ወተቀርፆሂ ለትትገልበብ።

⁷ ወብእሲኒ ኢኮነ ርቱዐ ይትገልበብ ሶበ ይጼሊ እስመ አምሳሉ ወአርአያሁ ለእግዚአብሔር ውእቱ ወብእሲትኒ ክብሩ ለምታ ይእቲ።

⁸ እስመ ብእሲት እምብእሲ ወፅአት ወአኮ ብእሲ ዘወፅአ እምብእሲት።

⁹ ወብእሲሰ ኢተፈጥረ በእንተ ብእሲት አላ ብእሲት በእንተ ብእሲ።

¹⁰ወበእንተዝ ርቱዕ ይኩን ሥልጣን ላዕለ ርእስ በእንተ መላእክት።[3]

¹¹ወባሕቱ ይእዜኒ ኢትትፈለጥ ብእሲት እምታ ወብእሲኒ ኢይኅድግ ብእሲቶ ወኵልክሙ ሀልዉ በእግዚእነ።

¹²በከመ ብእሲት እምብእሲ ከማሁ ብእሲኒ እምብእሲት ወባሕቱ ኵሉ እምኀበ እግዚአብሔር።

¹³ኀልይዎ እስኩ ለሊክሙ ኢይረትዕኑ ትትገልበብ ብእሲት ሶበ ትጼሊ ኀበ እግዚአብሔር ወፍጥረታሂ ኢያዐውቀክሙኑ።

¹⁴እስመ ለብእሲኒ ኀሣር ውእቱ ለእመ አንኀ ድምድማሁ።

¹⁵ወለብእሲትኒ ክብራ ውእቱ ለእመ አንኀት ሥዕርተ ርእሳ እስመ ሥዕርታ ለብእሲት ከመ ሞጣሕት ተውህበ ላቲ ወዘይትሔዘብ ለይለቡ።

¹⁶ንሕነሰ ኢንለምድ ከመዝ ወኢቤተ ክርስቲያኑ ለእግዚአብሔር።

¹⁷ወዝኒ ዘነገርኩክሙ አኮ ዘንእድኩክሙ እስመ ኢተሐውሩ ለእንተ ትኄይስ ዘእንበለ ዳእሙ ውስተ ዘይቴሐት።

¹⁸ቀዳሜ ኵሉ ትትጋአዙ በቤተ ክርስቲያን ወትትላኰዩ ሰማዕኩ ወቦ ዘአአምንሂ።

¹⁹ ርቱዕኑ ትትናፈቁ ወትትጋአዙሂ ከመ ይትዐወቁ ቢጽ ኅሩያን እምኔክሙ።

²⁰ወአንትሙኒ እንከ አመ ትትጋብኡ አኮ ከመ ዘይደሉ ለዕለተ እግዚእነ ዘትበልዑ ወዘትሰትዩ።

²¹አላ ትትባደሩ ኀበ ድራር ወትበልዑ እንዘ በለፌ ሀለዉ ርኁባን ወአንትሙሰ ጽጉባን ወስኩራን።

²² ቦኑ አብያት አልብክሙ በኀበ ትበልዑ ወበኀበ ትሰትዩ ወሚመ ቤተ እግዚአብሔርኑ ታስተሐቅሩ ወታስተኀፍርዎሙ ለነዳያን ምንተ እብል በዝንቱ እንእደክሙኑ አልቦ።

²³ እስመ ዘከመ ተመሀርኩ በኀበ እግዚአብሔር መሀርኩክሙ እስመ ለሊሁ እግዚእነ ኢየሱስ ክርስቶስ አመ ርእሶ ይእኅዝዎ በይእቲ ሌሊት ነሥአ ኅብስተ።

²⁴አእኰተ ባረከ ወፈተተ ወይቤሎሙ ንሥኡ ብልዑ ዝ ውእቱ ሥጋየ ዘይትወሀብ በእንቲኣክሙ ወከመዝ ግበሩ ተዝካርየ።

²⁵ወከማሁ ጽዋዐኒ እምድኅረ ተደሩ ይቤሎሙ ዝ ውእቱ ጽዋዕ ዘሐዲስ ሥርዐት ውእቱ ደምየ ከመዝ ግበሩ ወሶበ ትሰትይዎ ተዘከሩኒ።

²⁶አምጣነ ትበልዕዎ ለዝንቱ ኅብስት ወትሰትይዎ ለዝንቱ ጽዋዕ ሞቶ ለእግዚእነ ትዜንዉ እስከ አመ ይመጽእ።

²⁷ወይእዜኒ ዘበልዖ ለዝንቱ ኅብስት ወዘሰትዮ ለዝንቱ ጽዋዕ እንዘ ኢይደልዎ ዕዳ ይትኃሠሥዎ በእንተ ሥጋሁ ወደሙ ለእግዚእነ።

²⁸ወይእዜኒ አመኪሮ ሰብእ ርእሶ ወአንጺሖ ይብላዕ እምውእቱ ኅብስት ወይስተይ እምውእቱ ጽዋዕ።

²⁹እስመ ዘበልዖ ወዘሰትዮ እንዘ ኢይደልዎ ደይኖ ወመቅሠፍቶ በልዐ ወሰትየ ለርእሱ ለእመ ኢያእመረ ሥጋ እግዚእነ ወኢኮነ ንጹሐ ነፍሱ።

³⁰ወበእንተዝ ብዙኃን ድዉያን ወሕሙማን እምውስቴትክሙ ወብዙኃን ይሰክቡ ግብተ።

³¹ ወሶበ ኰነነ ለሊነ ርእሰነ እምኢተኰነነ።

³² ወእመሰ እግዚአብሔር የሐትተነ ወይጌሥጸነ ከመ ኢንዕሪ ተኰንኖ ምስለ ዓለም።

³³ወይእዜኒ አኀዊነ ሶበ ተሐውሩ ትምስሑ ተጻንሑ ቢጸክሙ።

³⁴ወዘኒ ርኅበ በቤቱ ለይብላዕ ከመ ኢትርፍቁ ለኵነኔ ወኢትትሐየሱ ወባዕደሰ መጺእየ እሠርዐክሙ።