Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 13 Bible Online

ኀበ ሰብአ ቆሮንቶስ 1 13 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 13

¹ወእመኒ አእመርኩ ነገረ ኵሉ ሰብእ ወነገረ ኵሉ መላእክት ወተፋቅሮ አልብየ ኮንኩ ከመ ድምፀ ብርት ዘይነቁ ወእመ አኮ ከመ ከበሮ ዘይዘበጥ።

² ወእመኒ ተነበይኩ ወአእመርኩ ኵሎ ዘኅቡእ ወኵሎ ጥበበ ወእመኒ ብየ ኵሉ ሃይማኖት እስከ አፈልስ አድባረ ወተፋቅሮ አልብየ ከንቶ ኮንኩ።

³ ወእመሂ ወሀብኩ ለምጽዋት ኵሎ ንዋይየ ወዓዲ ሥጋየኒ ለውዕየተ እሳት ወተፋቅሮ አልብየ አልቦ ዘረባሕኩ።

⁴ ተፋቅሮ ያስተዔግሥ ተፋቅሮ ያስተማሕር ተፋቅሮ ኢያስተቃንእ ወኢያስተኃፍር ወኢያስተዔቢ ልበ።

⁵ ወኢያኀሥሥ ተድላ ለባሕቲቱ ኢያስተማዕዕ ወኢያኄሊ እኩየ።

⁶ወኢያስተፌሥሕ በግፍዕ ወያስተፌሥሕ በጽድቅ።

⁷ በኵሉ ያስተማሕር ወበኵሉ ያስተዔግሥ ወበኵሉ ያስተኣምን ወበኵሉ ያስተዌክል።

⁸ተፋቅሮ ለዝሉፉ ኢያኃሥር ወኢያወድቅ ወዘሂ ተነበየ ኀላፊ ወይሰዐር ወዘሂ ነበበ በነገረ በሐውርት ኀላፊ ወይትፌጸም ወዘሂ ጠበበ ኀላፊ ወይሰዐር።

⁹እስመ ነአምር ንስቲተ ወንትኔበይ ንስቲተ በበገጹ።

¹⁰ወአመ በጽሐ ፍጻሜሁ ሎቱ ይሰዐር ውእቱኒ።

¹¹ወአመሰ ደቂቅ አነ ተናገርኩ ከመ ደቂቅ ወኀለይኩ ከመ ደቂቅ ወመከርኩ ከመ ደቂቅ ወአመሰ ልህቁ ሰዐርኩ ኵሎ ሕገ ደቂቅ።

¹² ወይእዜሰ ተዐውቀኒ ወአስተርአየኒ ክሡተ እስመ በተሐዝቦ ንሬኢ ከመ ዘበመጽሔት ወአሜሃሰ ንሬኢ ገጸ በገጽ ወይእዜሰ አአምር እምአሐዱ ኅብር ወድኅረሰ አአምር ኵሎ ዘከመ ተዐውቀኒ።

¹³ ወይእዜኒ እሉ ሠለስቱ ዘይነብሩ እሙንቱ ሃይማኖት ወትውክልት ወተፋቅሮ ወእምኵሉሰ የዐቢ ተፋቅሮ።