Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 15 Bible Online

ኀበ ሰብአ ቆሮንቶስ 1 15 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 15

¹ ወአጤይቀክሙ አኀዊነ ትምህርተ ዘመሀርኩክሙ ዘአመ ተዐሎክሙ ዘቦቱ ሀለውክሙ ወዘቦቱ ተሐይዉ።

² እስመ በቃልየ መሀርኩክሙ ለእመ ትዜከሩ ዘመሀርኩክሙ ወእመ አኮሰ ከንቱ ዘአመንክሙ።

³ ናሁ መሀርኩክሙ ቅድመ ዘከመ ተመሀርኩ እስመ ክርስቶስ ሞተ በእንተ ኀጢኣትነ በከመ ይቤ መጽሐፍ።

⁴ ወተቀብረሂ ወተንሥአሂ አመ ሣልስት ዕለት በከመ ጽሑፍ።

⁵ ወአስተርአዮ ለጴጥሮስ ወእምዝ አስተርአዮሙ ለዐሠርቱ ወአሐዱ አርዳኢሁ።

⁶ወእምዝ አስተርአዮሙ ለዘይበዝኁ እምኀምስቱ ምእት ቢጽ ወመብዝኅቶሙ ሀለዉ እስከ ይእዜ ወቦ እለሂ ኖሙ።

⁷ ወእምዝ አስተርአዮ ለያዕቆብ ወለኵሎሙ ሐዋርያቲሁ።

⁸ ወድኅረ ኵሎሙ አስተርአየኒ ሊተ ዘእመስል ፃእፃአ።

⁹ እስመ አነ እቴሐት እምኵሎሙ ሐዋርያቲሁ ወእንዘ ኢይደልወኒ እሰመይ ሐዋርያሁ በእንተ ዘሰደድኩ ሕዝቦ።

¹⁰ ወባሕቱ በጸጋ እግዚአብሔር ሀሎኩ ኀበ ዘአነ ላዕሌሁ ወጸጋሁኒ ዘወሀበኒ አኮ ለከንቱ ዘኮነኒ ወባሕቱ አነ ፈድፋደ እምኵሎሙ ጻመውኩ ወአኮሰ አነ አላ ውእቱ ጸጋሁ ዘላዕሌየ።

¹¹ወአነሂ ይእዜ ወእሙንቱሂ ከመዝ ንሜህር ወአንትሙኒ ከመዝ አመንክሙ።

¹²ወእምከመሰ ንሜህር ለባዕድ ወንብል ተንሥአ ክርስቶስ እምዉታን በእፎ እንከ ሀለዉ እምውስቴትክሙ እለ ይብሉ ኢየሐይዉ ምዉታን።

¹³ወእመሰ ኢየሐይዉ ምዉታን ክርስቶስኒ ኢተንሥአ እምዉታን።

¹⁴ወእመሰኬ ክርስቶስ ኢተንሥአ እምዉታን ከንቱ ውእቱ ትምህርትነ ወከንቶ ተአመንክሙ ቦቱ።

¹⁵ ወንሕነኒ ኮነ ሰማዕተ ሐሰት ላዕለ እግዚአብሔር እስመ ንቤ አንሥኦ ለክርስቶስ ዘኢያንሥኦኑ እንከ።[6]

¹⁶ ወእመሰ ኢይትነሥኡ ምዉታን ክርስቶስኬ ኢተንሥአ እምዉታን።

¹⁷ወእመሰ ክርስቶስ ኢተንሥአ እምዉታን ከንቱ ሃይማኖትክሙ ወዓዲክሙ ሀሎክሙ ውስተ ኀጢአትክሙ።

¹⁸ወእለሂ ኖሙ በክርስቶስ ተኀጕሉኬ እንከ።

¹⁹ ወእምከመሰ በዝንቱ ሕይወትነ ባሕቲቱ ተወከልነ በክርስቶስ ፈድፈደ ሣህልነ እምኵሉ ሰብእ።

²⁰ ወይእዜኒ ክርስቶስ ቀደመ ተንሥኦ እምኵሎሙ ሰብእ ምዉታን።

²¹ እስመ በአሐዱ ብእሲ ኮነ ሞት ወበካልኡ ብእሲ ኮነ ትንሣኤ እምዉታን።

²² ወበከመ በአሐዱ[7] አዳም ኵልነ ንመውት ከማሁ በክርስቶስ ኵልነ ነሐዩ።

²³ ወኵሉ ሰብእ በበሥርዐቱ ቀዳሚ ክርስቶስ ውእቱ ዘተንሥአ እምዉታን ወእምዝ እለ በክርስቶስ በምጽአቱ።

²⁴አሜሃ ይከውን ማኅለቅት አመ ተወፈየ እግዚአብሔር አብ መንግሥቶ ወአመ ተስዕረ ኵሉ መኰንን ወኵሉ ንጉሥ ወኵሉ ኀይል።

²⁵ እስመ ሀለዎ ይንግሥ እስከ አመ ይገብኡ ኵሉ ጸላእቱ ታሕተ እገሪሁ።

²⁶ ወእምዝ ይሰዐር ደኃሪ ጸላኢ ዘውእቱ ሞት።

²⁷እንዘሂ ያገርር ኵሎ ታሕተ እገሪሁ ወአመ ይቤ ኵሉ ይገርር ሎቱ ወባሕቱ ይትዐወቅ ከመ ይንእስ እምዘአግረረ ሎቱ ኵሎ።

²⁸ ወአመ ኵሉ ገነየ ሎቱ ይእተ ዕለተ ወልድኒ ይገኒ ለዘአግነየ ሎቱ ኵሎ ከመ ይኩን እግዚአ[8] በኵሉ ወላዕለ ኵሉ።

²⁹ ወእመ አኮሰ ከመ ምንትኑ ያጠምቁ አኮኑ ከመ የሐይዉ ምዉታን ወእመሰኬ ኢይትነሥኡ ምዉታን ለምንትኑ እንከ ያጠምቁ።

³⁰ ወለምንትኑ እንከ ንሕነኒ ንሰርሕ ኵሎ ዕለተ ወንትቀተልሂ።

³¹ ወበእንተሂ ምክሕነ አኀዊነ ዘበኢየሱስ ክርስቶስ እግዚእነ።

³² ቦኑ ለአድልዎ ለሰብእ ተበአስኩ ምስለ አርዌ በኤፌሶን ምንተ እንከ ይበቍዐኒ ለእመ ኢየሐይዉ ምዉታን።

³³ «ንብላዕ ወንስተይ ጌሠመ ንመውት» ኢያስሕቱክሙ አኀዊነ እስመ ነገር እኩይ ግዕዘ ሠናየ ያማስን።

³⁴ ትግሁ ለጽድቅ ወኢትስሐቱ እስመ ቦ ሰብእ እለ ኢየአምርዎ ለእግዚአብሔር።

³⁵ወባሕቱ እብለክሙ ከመ ትኅፈሩ ሀሎ ዘይብል እፎ ይትነሥኡ ምዉታን ወበአይ ነፍስቶሙ የሐይዉ።

³⁶ ኦ አብድ አንተ ዘትዘርዕ ኢየሐዩ ለእመ ኢሞተ።

³⁷ ወዝኒ ዘትዘርዕ አኮ ዝንቱ ነፍስት ዘይትወለድ ዘትዘርዕ ዳእሙ ዕራቃ ሕጠት እመኒ ዘሥርናይ ወእመኒ ዘባዕድ።

³⁸ወእግዚአብሔር ይሁቦ ነፍስተ ዘከመ ፈቀደ ወለለ አሐዱ ዘርዕ ዘዘዚኣሁ ነፍስቱ እስመ ኢኮነ አሐደ ሥጋሁ ለነፍስተ ኵሉ።

³⁹ካልእ ዘሰብእ ወካልእ ሥጋ እንስሳ ወካልእ ዘዖፍ ሥጋሁ ወካልእ ነፍስተ ዓሣ።

⁴⁰ወካልእ ነፍስት ዘበምድር ወካልእ ዘበሰማይ ካልእ ክብሩ ለዘበሰማይ ወካልእ ክብሩ ለዘበምድር።

⁴¹ካልእ ክብሩ ለፀሓይ ወካልእ ክብሩ ለወርኅ ወካልእ ክብሮሙ ለከዋክብት ኮከብ እምኮከብ ይኄይስ ክብሩ።

⁴²ከማሁኬ ተንሥኦቶሙ ለምዉታን ይዘራዕ በዘይማስን ወይትነሥእ በዘኢይማስን።

⁴³ ይዘራዕ በኀሣር ወይትነሣእ በክብር ይዘራዕ በድካም ወይትነሣእ በኀይል።

⁴⁴ይዘራዕ በሥጋ ዘነፍስ ወይትነሣእ በሥጋ ዘመንፈስ እስመ ቦ ሥጋ ዘነፍስ ወቦ ሥጋ ዘመንፈስ።

⁴⁵ እስመ ከማሁ ይቤ መጽሐፍ ተፈጥረ አዳም ቀዳሚ ብእሲ ዘነፍስ ሕያው ወደኃራዊ ብእሲ ዘመንፈስ የሐዩ።

⁴⁶ወአኮ ቀዳሚ ዘመንፈስ ዘነፍስ ቀደመ ወእምዝ ዘመንፈስ።

⁴⁷ቀዳማዊ ብእሲ እምድር መሬታዊ ወዳግም ብእሲ እምሰማይ ሰማያዊ።

⁴⁸በከመ ዝኩ መሬታዊ ከማሁ መሬታውያን ወበከመ ዝኩ ሰማያዊ ከማሁ ሰማያውያን።

⁴⁹ወበከመ ለበስነ አምሳሊሁ ለመሬታዊ ከማሁ ንለብስ አምሳሊሁ ለሰማያዊ።

⁵⁰ ወዘንተ ንብለክሙ አኀዊነ ከመ ዘሥጋ ወደም ኢይወርስ መንግሥተ እግዚአብሔር ወዘይማስን ኢይወርስ ዘኢይማስን።

⁵¹ናሁ ኅቡአ ነገረ እነግረክሙ አኮ ኵልነ ዘንመውት።

⁵² ወባሕቱ ኵልነ ንትዌለጥ በምዕር ከመ ቅጽበተ ዐይን በደኃሪ ንፍኀተ ቀርን ወይነፍኁ ቀርነ ወይትነሥኡ ምዉታን እንዘ ኢይትነከዩ ወንሕነኒ ንትዌለጥ።

⁵³ እስመ ሀለዎ ለዝንቱ ዘይማስን ይልበስ ዘኢይማስን ወዝንቱ መዋቲ ይልበስ ዘኢይመውት።

⁵⁴ ወአመ ለብሰ ዝንቱ መዋቲ ዘኢይመውት ውእተ አሚረ ይበጽሕ ቃል ዘተጽሕፈ «ተሠጥመ ሞት ውስተ ሙኣት።

⁵⁵ አይቴ እንከ ቀኖትከ ሞት ወአይቴ መዊኦትከ ሲኦል።»

⁵⁶ ወቀኖቱሰ ለሞት ኀጢአት ወኀይላኒ ለኀጢአት ኦሪት።

⁵⁷ወለእግዚአብሔር አኰቴት ዘወሀበነ ንማእ በእግዚእነ ኢየሱስ ክርስቶስ።

⁵⁸ ወይእዜኒ አኀዊነ ፍቁራን ኩኑ ጽኑዓነ ወድልዋነ ወኢታንቀልቅሉ እምሃይማኖት ወአብዝኁ ገቢረ ሠናይ ለእግዚአብሔር ዘልፈ ተአምሩ ከመ ኢኮነ ለከንቱ ዘጻመውክሙ በእንተ እግዚእነ።