Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 3 Bible Online

ኀበ ሰብአ ቆሮንቶስ 1 3 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 3

¹ ወአንሰ አኀውየ ኢክህልኩ ምህሮተክሙ ከመ ዘመንፈሳውያን ዘእንበለ ከመ ዘበሕገ ሥጋ ወደም ወከመ ዘለሕፃናት በሃይማኖተ ክርስቶስ።

² ሐሊበ ወጋእኩክሙ ወአኮ መብልዐ ጽኑዐ ዘአብላዕኩክሙ እስመ ዓዲክሙ ኢጸናዕክሙ ወበሕግ ዘሥጋ ወደም ሀለውክሙ።

³ ወእመሰ ትትቃንኡ ወትትጋአዙ አኮኑ ዘሥጋ ወደም አንትሙ ወከመ ዕጓለ እመሕያው ተሐውሩ።

⁴ እስመ ቦ እምውስቴትክሙ ዘይብል አነ ዘጳውሎስ ወካልእ ይብል አነ ዘአጵሎስ።

⁵ ምንትኑ ጳውሎስ ወምንትኑ አጵሎስ አኮኑ ሰብእ ከማክሙ እሙንቱ ወበላዕሌሆሙ አመንክሙ ወለለ አሐዱ አሐዱ በከመ ወሀቦ እግዚአብሔር።

⁶ አነ ተከልኩ ወአጵሎስ ሰቀየ ወእግዚአብሔር አልሀቀ።

⁷ወይእዜኒ ኢዘተከለ ወኢዘሰቀየ አልቦ ዘበቍዐ ዘእንበለ ዳእሙ እግዚአብሔር ዘአልሀቀ።

⁸ ወዘሂ ተከለ ወዘሂ ሰቀየ አሐዱ እሙንቱ ወኵሎሙ ዐስቦሙ ይነሥኡ በአምጣነ ጻማሆሙ።

⁹ እስመ ነኀብር በግብረ እግዚአብሔር ወላእካነ እግዚአብሔር ንሕነ ወአንትሙሰ ሕንጻ እግዚአብሔር አንትሙ።

¹⁰ ወበከመ ጸጋሁ ለእግዚአብሔር ዘወሀበኒ አስተናደፍኩ መሠረተ ከመ ጠቢብ ሊቀ ጸረብት ወባሕቱ ካልእ ውእቱ ዘይሔድሳ ለሕንጸት ወኵሉ ለይትዐቀብ ዘከመ የሐንጽ።

¹¹ ወካልአሰ መሠረተ አልቦ ዘይክል ሣርሮ ዘእንበለ ዘተሣረረ ወመሠረቱሂ ኢየሱስ ክርስቶስ ውእቱ።

¹²ወእመ ቦ ዘየሐንጽ ዲበ ዝንቱ መሠረት ወርቀ ወብሩረ ወእብነ ክቡረ ወዕፀ ወሣዕረ ወብርዐ።

¹³ለለአሐዱ ይትከሠት ምግባሩ ወዕለቱ ያዐውቆ አመ ከሠቶ እሳት ወለለ አሐዱ እሳት ያሜክር ምግባሮ።

¹⁴ወዘሰ ጸንዐ ወቆመ ምግባሩ ውእቱኬ ዘይነሥእ ዕሴቶ።

¹⁵ወዘሰ ውዕየ ምግባሩ የኀጕል ዐስቦ ወውእቱ የሐዩ ከመ ዘይድኅን እምእሳት።

¹⁶ ኢተአምሩኑ ከመ ታቦቱ ለእግዚአብሔር አንትሙ ወመንፈሰ እግዚአብሔር ኅዱር ላዕሌክሙ።

¹⁷ወዘሰ አማሰነ ቤተ እግዚአብሔር ሎቱኒ ያማስኖ እግዚአብሔር ወቤቱሰ ለእግዚአብሔር አንትሙ ውእቱ ወቅዱሳን አንትሙ ወኢታርኵሱ ቤቶ ለእግዚአብሔር።

¹⁸ ወኢታስሕቱ ርእሰክሙ ወዘይኄሊ እምውስቴትክሙ ከመ ጠቢብ ውእቱ በዝ ዓለም አብደ ለይረሲ ርእሶ ከመ ይኩን ጠቢበ።

¹⁹ እስመ እበድ ውእቱ በኀበ እግዚአብሔር ጥበቡ ለዝ ዓለም እስመ ከመዝ ይቤ መጽሐፍ «ዘይእኅዞሙ ለጠቢባን ትምይንቶሙ።»

²⁰ ወካዕበ ይቤ «የአምር እግዚአብሔር ኅሊናሆሙ ለጠቢባን ከመ ከንቱ ውእቱ።»

²¹ወበእንተ ዝንቱ ኢይትመካሕ እንከ አሐዱሂ እምዕጓለ እመሕያው እስመ ኵሉ ዘዚኣክሙ።

²²እመኒ ጳውሎስ ወእመኒ አጵሎስ ወእመኒ ጴጥሮስ ወእመኒ ዓለም ወእመኒ ሕይወት ወእመኒ ሞት ወእመኒ ዘኮነ ወእመኒ ዘይከውን ኵሉ ዘዚኣክሙ።

²³ ወአንትሙሰ ዘክርስቶስ ወክርስቶስኒ ዘእግዚአብሔር።