Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 6 Bible Online

ኀበ ሰብአ ቆሮንቶስ 1 6 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 6

¹ወኢትትኀበሉ እንከ ትትዋቀሡ በኀበ ጸኣልያን ቦኑ ዘይክል ይትዋቀሥ ምስለ ካልኡ በኀበ ዐማፅያን አኮኑ በኀበ ኄራን ወለእመቦ ዘቦ ተስናን ምስለ ቢጹ ለይትዋቀሥ በኀበ ቅዱሳን ወአኮ በኀበ ጸኣልያን ወዐማፅያን።

² ወኢተአምሩኑ ከመ ቅዱሳን ይኴንንዎሙ ለዓለም ወእመሰኬ አንትሙ ትኴንንዎሙ ለዓለም ኢይደልወክሙኑ ትኰንኑ ዘንተ ትሑተ ምኵናነ።

³ወኢተአምሩኑ ከመ መላእክተ ጥቀ ንኴንን ኅድጉሰ ዘዝ ዓለም።

⁴ወባሕቱ ለእመቦ ዘቦ ተስናነ ዝ ዓለም ቢጽ ትሑታን ዘቤተ ክርስቲያን ዘአንበሩ ሎሙ ይስምዕዎሙ።

⁵ወዘኒ ዘእብለክሙ እንዘ እዛለፈክሙ ከመዝኑ አልቦ ጠቢብ እምውስቴትክሙ ወዘይክል ዐሪቀ አኀው ምስለ ቢጾሙ።

⁶ወዓዲ እኅወ ምስለ እኍሁ እስከ ታስተሳንኑ ወትትጋዓዙ በኀበ አረሚ።

⁷ወአእምሩ እንከ ከመ እምጥንቱ ኀሣረ ይከውነክሙ እምከመ ጋዕዝ ወተስናን ብክሙ ኀጢአተ ወጌጋየ ይከውነክሙ እፎ እንከ ኢየሀይዱክሙ ወኢይገፍዑክሙ።

⁸ወዓዲ አንትሙ ዐማፅያን ወሀያድያን ወከመዝኑ ትኤብሱ ላዕለ ቢጽክሙ።

⁹ኢተአምሩኑ ከመ ዐማፅያን ወሀያድያን ኢይሬእይዋ ለመንግሥተ እግዚአብሔር ኢያስሕቱክሙ ኢዘማውያን ወኢ እለ ያጣዕዉ ወኢ እለ ይኤብሱ በነፍስቶሙ ወኢ እለ የሐውሩ ወኢእለ የሐውርዎሙ።

¹⁰ ወኢሰራቅያን ወኢተዐጋልያን ወኢሰካርያን ወኢጸኣልያን ወኢሀያድያን ኢይወርስዋ ለመንግሥተ እግዚአብሔር።

¹¹ አንትሙ እንከ መኑ አንትሙ እንዘ ከማሁ አንትሙ ወባሕቱ ኀፀቡክሙ ወቀደሱክሙ ወአጽደቁክሙ በስሙ ለእግዚእነ ኢየሱስ ክርስቶስ ወበመንፈሱ ለአምላክነ።

¹² ብየ ሥልጣን ላዕለ ኵሉ ዘኮነ ወአኮ ኵሉ ዘይበቍዐኒ ወኵሉ ይትከሀለኒ ወአልቦ ዘእሬሲ ይሠለጥ በላዕሌየ መኑሂ።

¹³መብልዕ ለከርሥ ወከርሥኒ ለመብልዕ ወእግዚአብሔር ይስዕሮሙ ለክልኤሆሙ ወሥጋክሙሰ ኢኮነ ለዝሙት አላ ለእግዚአብሔር ወእግዚአብሔር ለሥጋክሙ።

¹⁴ወእግዚአብሔር ዘአንሥኦ ለኢየሱስ ክርስቶስ እግዚእነ እሙታን ያንሥአነ ኪያነሂ በኀይሉ።

¹⁵ ኢተአምሩኑ ከመ አባሉ ለክርስቶስ ሥጋክሙ ትነሥኡኑ አባሎ ለክርስቶስ ወትሬስይዎ አባለ ዘማ ሐሰ።

¹⁶ ኢተአምሩኑ ከመ ዘተደመረ ምስለ ዘማ አሐደ ሥጋ ይከውን ምስሌሃ እስመ ከማሁ ይቤ መጽሐፍ «ለይኩኑ ክልኤሆሙ አሐደ ሥጋ።»

¹⁷ ወዘሰ ተደመረ ምስለ እግዚአብሔር አሐደ መንፈሰ ይከውን ምስሌሁ።

¹⁸ጕዩ እምዝሙት እስመ ኵሉ ዘኀጢአተ ይገብር ሰብእ አፍኣ እምሥጋሁ ይገብር ወዘሰ ይዜሙ ለሊሁ በሥጋሁ ይኤብስ።

¹⁹ ኢተአምሩኑ ከመ ማኅደሩ ለመንፈስ ቅዱስ አንትሙ ዘኅዱር ላዕሌክሙ ዘነሣእክሙ እምኀበ እግዚአብሔር ወኢኮንክሙ ለርእስክሙ።

²⁰ በሤጥ ተሣየጠክሙ ሰብሕዎ ለእግዚአብሔር በሥጋክሙ።