Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 1 9 Bible Online

ኀበ ሰብአ ቆሮንቶስ 1 9 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 1 9

¹ ኢኮንኩኑ አግዓዜ ወኢኮንኩኑ ሐዋርያ አኮኑ እግዚእነ ኢየሱስ ክርስቶስ ዘርኢኩ ወኢኮንክሙኑ አንትሙ ግብርየ በእግዚእነ።

² ወእመኒ ለባዕዳን ኢኮንኩ ሐዋርያሆሙ ለክሙሰ አነ ሐዋርያክሙ እስመ ማኅተማ ለመጽሐፍየ አንትሙ ውእቱ በእግዚእነ።

³ወከመዝ ቅስትየ ለእለ ይትዋቀሡኒ።

⁴ ቦኑ ኢይከውነነ ንብላዕሂ ወንስተይሂ።

⁵ ወትትልወነ እኅትነ እምአንስት ከመ ኵሉ ሐዋርያት ወከመ አኀዊሁ ለእግዚእነ ወከመ ኬፋ።

⁶ሊተኑ ዳእሙ ወለበርናባስ አሕረሙ ለነ ስራሐ።

⁷ወዘኒ ይፀመድ ከመ ይርከብ ሲሳዮ መኑ ዘይተክል ወይነ ወኢይበልዕ ቀምሖ ወመኑ ዘይርዒ መርዔቶ ወኢይሰቲ ሐሊቦ።

⁸ቦኑ ለአድልዎ ለሰብእ እብል አኮኑ ኦሪትኒ ይቤ ከመዝ።

⁹ መጽሐፈ ሙሴ «ኢትፍፅሞ አፉሁ ለላሕም ሶበ ታከይድ እክለከ።» ላሕምኑ እንከ አጽሐቆ ለእግዚአብሔር ዘዘንተ ይጽሕፍ።

¹⁰አላ አርአየ ከመ በእንቲኣነ ይቤ ወበእንቲኣነ ጸሐፈ እስመ ርቱዕ ዘኒ የሐርስ እንዘ ይሴፎ ምርካቦ የሐርስ ወዘኒ ያከይድ እክለ እንዘ ይሴፎ ምርካቦ ያከይድ።

¹¹ ወእመሰ ንሕነ ዘራዕነ ለክሙ ዘመንፈስ ቅዱስ ዐቢይኑ ውእቱ ሶበ ንሕነ ነአርር ለክሙ ዘሥጋ ሰብእ።

¹² ወእመሰ ባዕድ ይቀድመነ በሢመተ ዚኣነ ለሊክሙ ተአምሩ ዘይኄይሰክሙ ወአንሰ ለዝኒ ኢፈቀድክዎ ወባሕቱ በኵሉ እትዔገሥ ከመ ኢያዕቅፍ ትምህርቶ ለክርስቶስ።

¹³ ኢተአምሩኑ ከመ ገነውተ አማልክት ይሴሰዩ መባኦሙ ለአማልክት ወእለኒ ይፀመዱ ምሥዋዐ ይትካፈሉ መሥዋዕተ ወለሥዩማነ ቤተ እግዚአብሔር መባአ ቤተ እግዚአብሔር ምርካቦሙ።

¹⁴ ወእግዚእነሂ ከማሁ አዘዘ ለእለ ይሜህሩ ትምህርተ ወንጌል በውእቱ ምህሮ ወንጌል ይኩኖሙ ምርካቦሙ ለሕይወቶሙ።

¹⁵ ወአንሰ ለዝኒ ኢፈቀድክዎ ወአኮ ዘንተ ብሂልየ እርከብ ዘጸሐፍኩ ዘንተ ወሊተሰ ይኄይሰኒ መዊት እምይትበሐነነኒ ምዝጋናየ።

¹⁶ ወእመኒ መሀርኩ ኢይከውነኒ ምዝጋና እስመ በትእዛዝ ገበርኩ ወእመኒ ኢመሀርኩ አሌ ሊተ።

¹⁷ ወእመሰ ዘእምፈቃድየ ገበርክዎ ለዝንቱ እምረከብኩ ዐስብየ ወእመሰ ዘበግብር ምግበ በዘአመገቡኒ ተልእኩ።

¹⁸ምንት እንከ ዕሴትየ ለእመ መሀርኩ እሬሲ ከመ እምሀር ዘእንበለ ዐስብ ዘአልብየ ምርካብ በውስተ ሢመትየ።

¹⁹ እስመ እንዘ አግዓዚ አነ እምኵሉ አቅነይኩ ርእስየ ለኵሉ ከመ አስተጋብኦሙ ለብዙኃን ኀበ ሃይማኖት።

²⁰ ወኮንክዎሙ ለአይሁድ ከመ አይሁዳዊ ከመ አስተጋብኦሙ ለአይሁድ ወኮንክዎሙ ለእለ ውስተ ሕገ ኦሪት ከመ ዘውስተ ሕገ ኦሪት ከመ አስተጋብኦሙ ለእለ ውስተ ሕገ ኦሪት።

²¹ ወኮንክዎሙ ለእለ አልቦሙ ሕግ ከመ ዘአልቦ ሕግ እንዘ ኢኮንኩ ራስዐ ውስተ ሕገ እግዚአብሔር ዳእሙ ውስተ ሕገ ክርስቶስ ሀሎኩ ከመ እርብሖሙ ለእለ አልቦሙ ሕግ።

²² ወኮንክዎሙ ለድኩማን ከመ ድኩም ከመ እርብሖሙ ለድኩማን ለኵሉ በግዕዘ ኵሉ ተለውኩ ወገበርኩ ከመ አስተጋብኦሙ ለኵሎሙ መንገሌየ ወአድኅኖሙ ዘእንበለ ዕቅፍት።

²³ወኵሎ እገብር በእንተ ትምህርተ ወንጌል ከመ እኩን ሱታፎ ለክርስቶስ።

²⁴ ኢተአምሩኑ ከመ እለ ይትባደሩ በውስተ ጸብእ ኵሎሙ ይረውጹ ወቦ ዘይከውኖ ምዝጋና ለዘበደረ ከማሁኬ ሩጹ ወብድሩ ከመ ትርከቡ።

²⁵ወኵሉ ዘይትጋደል ይትዔገሥ ወእሉሰ ይጸንዑ ከመ ይንሥኡ አክሊለ ዕሴተ ምዝጋናሆሙ ኀላፌ ዘይማስን ወንሕነሰ ንትዔገሥ ወንጸንዕ ከመ ንንሣእ አክሊለ ዘኢየኀልፍ።

²⁶ አንሰኬ ከመዝ እትጋደል ወእትባደር።

²⁷ ወአጠውቃ ለነፍስየ ወአገርሮ ለሥጋየ ወእትዐቀብ ለርእስየ ከመ አነ ምኑነ ኢይኩን ዘለባዕድ እሜህር።