Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 2 12 Bible Online

ኀበ ሰብአ ቆሮንቶስ 2 12 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 2 12

¹ወናሁ ይረትዕ ሊተ ተመክሖ ወባሕቱ ኢኮነ ሠናየ ንግባእ ካዕበ ወንዘክር ራእየ ዘከሠተ እግዚአብሔር።

²አአምር ብእሴ ምእመነ በክርስቶስ እምቅድመ ዐሠርቱ ወአርባዕቱ ዓመት እመሂ በሥጋሁ ወእመሂ ዘእንበለ ሥጋሁ እንዳዒ እግዚአብሔር የአምር ወመሠጥዎ ለውእቱ ብእሲ እስከ ሣልስ ሰማይ።

³ ወአአምሮ ለውእቱ ብእሲ እመሂ በሥጋሁ ወእመሂ ዘእንበለ ሥጋሁ እንዳዒ እግዚአብሔር የአምር።

⁴ወመሠጥዎ ውስተ ገነት ወሰምዐ በህየ ነገረ ዘኢይተረጐም ዘኢይከውኖ ለዕጓለ እመሕያው ይንብብ።

⁵ ወበእንተ ዝንቱኬ በዘከመዝ እትሜካሕ በርእስየሰ ኢይትሜካሕ ዘእንበለ በሕማምየ።

⁶ ወእመኒ ፈቀድኩ እትመካሕ ኢኮንኩ አብደ እስመ ጽድቀ እነግር ወባሕቱ እምህክ ከመ ኢይትሐዘቡኒ በዘርእዩኒ ወበዘሰምዑኒ ፈድፋደ።

⁷ ወበእንተዝ ከመሰ ኢይትዐበይ በብዙኅ ራእይ ተውህበኒ መልአከ ሰይጣን ዘይደጕጸኒ ሥጋየ ወይኰርዐኒ ርእስየ።

⁸ወአስተብቋዕክዎ ለእግዚእየ ሥልሰ በእንቲኣሁ ከመ ያእትቶ እምኔየ።

⁹ወይቤለኒ የአክለከ ጸጋየ ወኀይልሰ በደዌ የሐልቅ ወሠመርኩ እትመካሕ በሕማምየ ከመ ይኅድር ኀይለ ክርስቶስ ላዕሌየ።

¹⁰ ወበእንተ ዝንቱ ሠመርኩ በሕማምየ በተጽእሎሂ ወበምንዳቤሂ ወበተሰዶሂ ወበተጽናስሂ በእንተ ክርስቶስ እስመ ሶበ አሐምም ሶቤሃ እጸንዕ።

¹¹ወናሁ ኮንኩ አብደ በተመክሖትየ በዘአንትሙ አገበርክሙኒ ወሊተሰ ርቱዕ እክበር በኀቤክሙ ወትኩነኒ ሰማዕትየ እስመ አልቦ ዘአሕጸጽኩክሙ እምዘኵሉ ሐዋርያት ወእመኒ ከመ ወኢምንት አነ።

¹² ትምእርተ ሐዋርያትሰ ተገብረ ለክሙ በኵሉ ትዕግሥት ወበተአምራት ወመንክራት ወኀይላት።

¹³ ወምንትኑ ዘአሕጸጽኩክሙ ወዘአኅጣእኩክሙ እምኵሉ ቤተ ክርስቲያናት ዘእንበለ ዛቲ እንተ ኢመጻእኩ ኀቤክሙ አስርሕክሙ ጸግዉኒያ ለዛቲ አበሳየ።

¹⁴ ናሁ ሣልስየ ዝንቱ እንዘ አስተዳሉ እምጻእ ኀቤክሙ ወኢተፋጠነኒ እስመ ኪያክሙ እፈቅድ ወአኮ ንዋየክሙ እስመ ርቱዕ አበው ይዝግቡ ለውሉዶሙ ወአኮ ውሉድ ለአዝማዲሆሙ።

¹⁵ ወአንሰ ምክዕቢተ አስተዋፃእኩ ወእሜጡ ሥጋየ በእንተ ነፍስክሙ ወእመኒ ፈድፋደ አፍቀርኩክሙ ርእስየ አፍቀርኩ።

¹⁶ወአንሰ ኢያክበድኩ ላዕሌክሙ ወባሕቱ መስተመይነ ከዊንየ ነሣእኩክሙ በጕሕሉት።

¹⁷ቦኑ እንጋ ዘፈነውኩ ኀቤክሙ ወቦኑ ዘተዐገልኩክሙ።

¹⁸ ናሁ አስተብቋዕክዎ ለቲቶ ወፈነውክዎ ለካልእ እኁነ ምስሌሁ ቦኑ ዘገፍዐክሙ ቲቶ አኮኑ በውእቱ መንፈስ ዘይረውጽ በላዕሌሁ ቦቱ ሖርነ ወአሠረ ዚኣሁ ተለውነ።

¹⁹ትትሔዘቡነሁ ከመ ንሕነ ንትዋቀሠክሙ ዘሂ ንነግር በቅድመ እግዚአብሔር በእንተ ክርስቶስ ንነግር ወዝንቱሰ ኵሉ አኀዊነ ከመ ትትሐነጹ።

²⁰ ወባሕቱ እፈርህ ለእመ ቦ ከመ አመ መጻእኩ ወኢረከብኩክሙ በከመ እፈቅድ ወአነሂ እከውነክሙ ከመ ዘኢትፈቅዱ ወዮጊ ይከውን ውስቴትክሙ ተዝኅሮ ወተቃንኦ ወተምዕዖ ወተሣልቆ አው ተሓምዮ ወተሀውኮ ወአዕብዮ ልብ።

²¹ ዮጊ ካዕበ መጺእየ ኀቤክሙ ያሐምመኒ እግዚአብሔር በእንቲኣክሙ ወእላሕዎሙ ለብዙኃን እለ አበሱ ወኢነስሑ በእንተ ኀሣሮሙ ወምርዓቶሙ ወዝሙቶሙ ዘገብሩ።