Read Ge'ez NT – ሐዲስ ኪዳን በልሳነ ግእዝ ኀበ ሰብአ ቆሮንቶስ 2 4 Bible Online

ኀበ ሰብአ ቆሮንቶስ 2 4 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ቆሮንቶስ 2 4

¹ ወበእንተ ዝንቱ እስመ ብነ ዝንቱ መልእክት በከመ ምሕረቱ ዘጸገወነ ኢንትሀከይ ወኢንትቈጣዕ።

² አላ ንኅድጎ ለምግባረ ኀፍረት ዘኅቡእ ወኢንሑር በትምይንት ወኢንትመየኖ ለቃለ እግዚአብሔር ወናቅም ርእሰነ በጽድቅ ገሃደ እንበይነ ግዕዘ ኵሉ ሰብእ በቅድመ እግዚአብሔር።

³ ወእመኒ ክዱን ትምህርትነ ክዱን ውእቱ ለሕርቱማን ወለኑፉቃን በዝንቱ ዓለም።

⁴ እስመ ጸለሎሙ ልቦሙ እግዚአብሔር አምላክ ዘለዓለም ከመ ኢይርአዩ ብርሃነ ትምህርተ ሰብሐተ ክርስቶስ ዘውእቱ አርኣያሁ ለእግዚአብሔር።

⁵ ወአኮ ለርእስነ ዘንሰብክ ዘእንበለ ለእግዚአብሔር በእንተ ኢየሱስ ክርስቶስ እግዚእነ ወለክሙሰ አቅነይነ ርእሰነ በእንተ ኢየሱስ ክርስቶስ።

⁶ እስመ እግዚአብሔር ዘይቤ ይሥርቅ ብርሃን ውስተ ጽልመት ውእቱ አብርሀ ውስተ ልብነ ብርሃነ አእምሮ ስብሐቲሁ በገጹ ለኢየሱስ ክርስቶስ።

⁷ ወብነ ዝንቱ መዝገብ ውስተ ንዋየ ልሕኵት ከመ ይኩን ዕበየ ኀይል ዘእምኀበ እግዚአብሔር ወአኮ ዘእምኀቤነ።

⁸ እንዘ በኵሉ ነሐምም ኢንትመነደብ ንትሜነንሂ ወኢነኀሥር።

⁹ ንሰድደሂ ወኢንትገደፍ ንጼዐርሂ ወኢንትኀጐል።

¹⁰ ወዘልፈ ንጸውር ሞቶ ለክርስቶስ በሥጋነ ከመ ይትዐወቅ ሕይወቱ ለክርስቶስ በላዕለ ዝንቱ ነፍስትነ መዋቲ።

¹¹ እስመ ንሕነ ዘነሐዩ ወትረ ንትሜጦ ለሞት በእንተ ኢየሱስ ክርስቶስ ከመ ሕይወቱኒ ለኢየሱስ ይትዐወቅ በላዕለ ነፍስትነ መዋቲ።

¹² ወይእዜሰ ጸንዐ በላዕሌነ ሞት እንዘ ሕይወት ኀቤነ።

¹³ ወብነ አሐዱ መንፈስ ዘሃይማኖት በከመ ይቤ መጽሐፍ «አመንኩ በዘነብኩ» ወንሕነኒ አመነ በዘነበብነ።

¹⁴ ወነአምር ከመ ዘአንሥኦ ለኢየሱስ ክርስቶስ እግዚእነ ያነሥአነ ኪያነሂ ምስሌሁ ወያቀውመነ ምስሌክሙ ኀቤሁ።

¹⁵ እስመ ኵሉ በእንቲኣክሙ ከመ ትፈድፍድ ጸጋሁ በላዕለ ብዙኃን ወይብዛኅ አኰቴቱ ለስብሐተ እግዚአብሔር።

¹⁶ ወበእንተዝ ኢንትቈጣዕ ወኢንትሀከይ እስመ ዘእንተ አፍኣነ ብእሲ በላዪ ወዘእንተ ውስጥነሰ ይትሔደስ ኵሎ አሚረ።

¹⁷ እስመ ሕማምነ ዘለሰዓት ቀሊል ክብረ ወስብሐተ አፈድፊዶ ይገብር ለነ።

¹⁸ እስመ ኢንሴፎ ዘያስተርኢ አላ ዘኢያስተርኢ እስመ ዘያስተርኢ ዓለም ኀላፊ ውእቱ ወዘሰ ኢያስተርኢ ቀዋሚ እስከ ለዓለም ውእቱ።