Read Ge'ez NT – ሐዲስ ኪዳን በልሳነ ግእዝ ኀበ ሰብአ ገላትያ 1 Bible Online

ኀበ ሰብአ ገላትያ 1 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ገላትያ 1

¹ እምጳውሎስ ሐዋርያ ዘኢኮነ በእንተ ሰብእ ወኢኮነ እምኀበ ሰብእ ዘእንበለ በእግዚእነ ኢየሱስ ክርስቶስ ወእግዚአብሔር አብ ዘአንሥኦ እሙታን።

²ወእምኵሎሙ አኀዊነ እለ ምስሌየ ለቤተ ክርስቲያን ዘገላትያ።

³ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

⁴ ዘመጠወ ርእሶ በእንተ ኀጢአትነ ከመ ያድኅነነ እምዝንቱ ዓለም ዘይትቃወም በእኩይ በፈቃደ እግዚአብሔር አቡነ።

⁵ ዘሎቱ ስብሐት ለዓለመ ዓለም አሜን።

⁶እነክረክሙ እፎ ከመዝ ፍጡነ ያፈልሱክሙ እምሃይማኖተ ክርስቶስ ዘጸውዐክሙ በጸጋሁ ውስተ ካልእ ትምህርት።

⁷ ዘኢኮነ ህልወ ዘእንበለ ዘየሀውኩክሙ ወይፈቅዱ ይዕልዉ ትምህርቶ ለክርስቶስ።

⁸ ወባሕቱ አንትሙ አሠረ ዚኣነ ትልዉ አንትሙሰ መልአክ እምሰማይ ለእመ መሀረክሙ ካልአ እምዘመሀርናክሙ ውጉዘ ለይኩን።

⁹በከመ እቤ ቀዳሚ ወይእዜኒ ካዕበ እብል ለእመ ቦ ዘመሀረክሙ ካልአ እምዘመሀርናክሙ ውጉዘ ለይኩን።

¹⁰ ወይእዜሰ ለሰብእኑ ነአምን ወአኮ ለእግዚአብሔር ወእመሰኬ እፈቅድ ለሰብእ አድሉ ኢኮንኩኬ ገብሮ ለክርስቶስ።

¹¹ እነግረክሙ አኀዊነ እስመ ትምህርት ዘመሀርኩክሙ ኢኮነ በእንተ ሰብእ።

¹² ወአነሂ አኮ እምኀበ ሰብእ ዘነሣእክዎ ወኢሂ መሀሩኒዮ ዳእሙ በዘከሠተ ሊተ እግዚእየ ኢየሱስ ክርስቶስ።

¹³ ወሰማዕክሙ ግዕዝየ ዘትካት ዘአመ ሀሎኩ ውስተ አይሁድ ከመ ፈድፋደ ሰደድኩ ቤተ ክርስቲያኑ ለእግዚአብሔር ወአመንዘዝክዎሙ።

¹⁴ወከበርኩ በውስተ አይሁድ ፈድፋደ እምኵሉ ቢጽየ በውስተ ሕዝብየ እስመ ፈድፋደ ኮንኩ ቀናኤ ለሕገ አበውየ።

¹⁵ ወአመ ሠምረ ወፈቀደ እግዚአብሔር ዘፈለጠኒ ወአውፅአኒ እምከርሠ እምየ ወጸውዐኒ በጸጋሁ።

¹⁶ ወከሠተ ሊተ ወልዶ ከመ ይትዐወቅ ስብሐተ ወልዱ በእዴየ ከመ እስብክ ለአሕዛብ በስሙ ወኢተለውኩ ሶቤሃ ዘሥጋ ወደም።

¹⁷ወኢዐረጉ ኢየሩሳሌም ኀበ ሐዋርያት ቀደምትየ ወሖርኩ ብሔረ ዐረብ ወካዕበ ተመየጥኩ ደማስቆ።

¹⁸ ወእምድኅረ ሠለስቱ ዓመት ዐረጉ ኢየሩሳሌም እርአዮ ለኬፋ ወነበርኩ ኀቤሁ ዐሡረ ወኀሙሰ መዋዕለ።

¹⁹ወኢየአምር ባዕደ ሐዋርያተ ዘእንበለ ያዕቆብ እኁሁ ለእግዚእነ።

²⁰ወዘኒ ዘጸሐፍኩ ለክሙ ናሁ ቅድመ እግዚአብሔር ሀሎኩ ከመ ኢይሔሱ።

²¹ወእምድኅረዝ በጻሕኩ ደወለ ቂልቅያ ወሶርያ።

²² ወኢያእመሩኒ አብያተ ክርስቲያናት ዘብሔረ ይሁዳ እለ በክርስቶስ በገጽየ።

²³ወዳእሙ ሰምዑ ዜናየ ዝኩአ ዘትካት ይሰድድ ይእዜ ይሰብክ ትምህርተ ሃይማኖት።

²⁴ወይሴብሕዎ ለእግዚአብሔር በእንቲኣየ።