Read Ge'ez NT – ሐዲስ ኪዳን በልሳነ ግእዝ ኀበ ሰብአ ገላትያ 4 Bible Online

ኀበ ሰብአ ገላትያ 4 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ገላትያ 4

¹ወባሕቱ እብል አምጣነሰ ሕፃን ውእቱ ወራሲ አልቦ ዘይኄይስ እምነባሪ እንዘ እግዚእ ውእቱ ለኵሉ።

²ወባሕቱ ላዕለ እምሔው ወላዕለ መገብት ይትዐቀብ እስከ ይበጽሕ ዕድሜ ዘዐደሞ አቡሁ።

³ ከማሁ ንሕነኒ አመ ሕፃናት ንሕነ ተቀነይነ ለስሒተ ዝንቱ ዓለም።

⁴ ወአመ በጽሐ ዕድሜሁ ፈነወ እግዚአብሔር ወልዶ ወተወልደ እምብእሲት ወገብረ በሕገ ኦሪት።

⁵ ከመ ይሣየጦሙ ለእለ ውስተ ኦሪት ከመ ንርከብ ትርሲተ ውሉድ።

⁶ ወከመሰ ውሉድ አንትሙ ናሁ ፈነወ እግዚአብሔር መንፈሰ ወልዱ ውስተ ልብክሙ ውእቱ ዘትጼውዑ ወትብሉ አባ ወአቡየ።

⁷እንከሰኬ ውሉድ አንትሙ ወኢኮንክሙ አግብርተ ወእመሰኬ ውሉድ አንትሙ ወራስያኒሁኬ ለእግዚአብሔር አንትሙ በኢየሱስ ክርስቶስ።

⁸ወባሕቱ ትካትሰ በኢያምሮትክሙ ተቀነይክሙ ለእለ ኢኮኑ አማልክተ።

⁹ወይእዜሰ አእመርክምዎ ለእግዚአብሔር ወፈድፋደ ውእቱ አእመረክሙ እፎ ካዕበ ኀበ ዝኩ ድኩም ወጽኑስ ጣዖተ ዝ ዓለም ትፈቅዱ ፈጠራ ትትቀነዩ ሎሙ።

¹⁰ ወትትዐቀቡ ዕለተ ወወርኀ ወጊዜ ወዓመታተ።

¹¹እፈርሀክሙ እንዳዒ ለእመ ለከንቱ ጻመውኩ በእንቲኣክሙ ኩኑ ከማየ እስመ አነሂ ከማክሙ ኮንኩ።

¹²አኀዊነ አስተበቍዐክሙ እስመ ኢገፋዕክሙኒ።

¹³ ተአምሩ ከመ በአምጣነ ድካመ ኀይልየ መሀርኩክሙ ቀዲሙ።

¹⁴ወእንዘሂ አሐምም ኢተቈጣዕክሙኒ ወኢመነንክሙኒ በሥጋየ ወተወከፍክሙኒ ከመ መልአከ እግዚአብሔር ወከመ ክርስቶስ ኢየሱስ።

¹⁵አይቴኑ አብፅዖትክሙ ይእዜ አነ ሰማዕትክሙ ከመ ሶበ ይትከሀለክሙ አዕይንቲክሙ መሊሐክሙ እምወሀብክሙኒ።

¹⁶ ጸላኤኑ ኮንኩክሙ ሶበ መሀርኩክሙ ጽድቀ።

¹⁷ ወእሉሰ ይቀንኡ ላዕሌክሙ ወአኮ ለሠናይ ዳእሙ ይዝግሑክሙ ይፈቅዱ ከመ ትቅንኡ ላዕሌሆሙ።

¹⁸ሠናይኬ ከመ ትቅንኡ ለገቢረ ሠናይ ኵሎ ጊዜ ወአኮ ዳእሙ በሀልዎ ዚኣየ ኀቤክሙ።

¹⁹ ደቂቅየ እለ ዳግመ አሐምም ብክሙ እስከ አመ ያስተርኢ ክርስቶስ ውስተ ልብክሙ።

²⁰ወእፈቅድ አሀሉ ኀቤክሙ ይእዜ ወእዌልጥ ቃልየ እስመ አኀጥእ ዘእብል በእንቲኣክሙ።

²¹ ትብሉኑ በሕገ ኦሪት ነሀሉ ወኢትሰምዕዋኑ ለኦሪት።

²² እስመ ጽሑፍ ውስቴታ ከመ አብርሃም ክልኤተ ደቂቀ ወለደ አሐደ እምዕቅብቱ ወአሐደ እምአግዓዚት።

²³ ወባሕቱ ካልእ ልደቱ ለዘእምዕቅብቱ ሕገ ሰብእ ተወልደ ወዘሰ እምአግዓዚት በዘአሰፈዎ።

²⁴ ወዝ ውእቱ አምሳለ ክልኤቱ ሥርዓት ወአሐቲሰ እምደብረ ሲና ተወልደት ለቅኔ ወይእቲሰ አጋር።

²⁵ወሲናሰ ደብር ውእቱ በብሔረ ዐረብ ወትትናጸር ምስለ ኢየሩሳሌም እንተ በታሕቱ ምድራዊት ወትትቀነይ ምስለ ደቂቃ።

²⁶ ወኢየሩሳሌምሰ እንተ ላዕሉ አግዓዚት ይእቲ ወይእቲ እምነ።

²⁷ ጽሑፍ «ትትፌሣሕ መካን እንተ ኢትወልድ ወትትሐሠይ ወትኬልሕ እንተ ኢተአምር ማሕምመ እስመ ብዙኅ ውሉዳ ለመዓስብ እምእንተ ባቲ ምት።»

²⁸ ወንሕነሰ አኀዊነ ውሉደ ተስፋ አምሳለ ይስሐቅ።

²⁹ወበከመ ዘበሕገ ሥጋ ተወልደ ሰደዶ ለዘበመንፈስ ተወልደ ከማሁ ይእዜኒ።

³⁰ ወባሕቱ ምንተ ይቤ መጽሐፍ «ስድዳ ለአመት ምስለ ወልዳ እስመ ኢይወርስ ወልደ አመት ምስለ ወልደ አግዓዚት።»

³¹ ወንሕነሰ ይእዜ አኀዊነ ኢኮነ ውሉደ አመት ዘእንበለ ዘአግዓዚት እስመ ክርስቶስ አግዐዘነ።