Read Ge'ez NT – ሐዲስ ኪዳን በልሳነ ግእዝ ኀበ ሰብአ ገላትያ 6 Bible Online

ኀበ ሰብአ ገላትያ 6 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ገላትያ 6

¹ አኀዊነ ለእመ ቦ ብእሲ ዘስሕተ እምኔክሙ አንትሙ እለ በመንፈስ ቅዱስ አጽንዕዎ በመንፈሰ የውሀት እንዘ ትትዐቀቡ ለርእስክሙ ወኢትስሐቱ።

² ወጹሩ ለቢጽክሙ ዘአክበዱ ላዕሌክሙ ወቦቱ ትፌጽሙ ሕገ ክርስቶስ።

³ ወአልቦ ዘያስሕት ርእሶ።

⁴ወኵሉ ያመክር ምግባሮ በዘይከውኖ ምክሐ ለርእሱ ወአኮ ለባዕድ።

⁵ እስመ ኵሉ ጾሮ ይጸውር።

⁶ ወይስምዖ ንኡሰ ክርስቲያን ለዝ ነገር ወይትመሀር ኵሎ ሠናያተ።

⁷ኢያስሕቱክሙ አልቦ ዘያስተአብዶ ለእግዚአብሔር ዘዘርዐ ሰብእ የአርር።

⁸ ዘዘርዐ ውስተ ሥጋሁ የአርር ሞተ ወዘዘርዐ ውስተ መንፈሱ የአርር ሕይወተ ዘለዓለም።

⁹ ወኢንትሀከይ ገቢረ ሠናይ እስመ በዕድሜሁ ነአርሮ።

¹⁰ አምጣነ ብነ ዕለት ንግበር ሠናየ ለኵሉ ወፈድፋደሰ ለሰብአ ሃይማኖት።

¹¹ርእዩ ዘከመ ጸሐፍኩ ለክሙ በእዴየ።

¹² ወእለሰ ይፈቅዱ ያድልዉ ለገጽ እሙንቱ ያጌብሩክሙ ትትገዘሩ ዳእሙ ከመ ኢትትልዉ መስቀሎ ለክርስቶስ።

¹³ወእለሂ ተገዝሩ ኢዐቀቡ ኦሪተ ዳእሙ ይፈቅዱ ለክሙ ትትገዘሩ ከመ በነፍስትክሙ ትዘኀሩ።

¹⁴ ወአንሰ ሐሰ ሊተ ኢይዜኀር ዘእንበለ በመስቀሉ ለኢየሱስ ክርስቶስ እግዚእነ ወበኀቤየሰ ምዉት ዓለም ወአነሂ ምዉት በኀበ ዓለም።

¹⁵ እስመ በኢየሱስ ክርስቶስ ተገዝሮሂ ኢይበቍዕ ወኢተገዝሮሂ ኢያሰልጥ ዘእንበለ ሐዳስ ፍጥረት።

¹⁶ ወላዕለ ኵሎሙ እለ ይነብሩ በዝንቱ ሕግ ሰላም ወሣህል ወዲበ እስራኤል ዘእግዚአብሔር።

¹⁷እምይዜሰ አልቦ ዘያነጥየኒ አንሰ ሕማሞ ለክርስቶስ እጸውር በሥጋየ።

¹⁸ጸጋሁ ለእግዚእነ ኢየሱስ ክርስቶስ ምስለ መንፈስክሙ አኀውየ አሜን። ተፈጸመት መልእክት ኀበ ሰብአ ገላትያ ወተጽሕፈት በሮሜ ወተፈነወት በእደ ቲቶ። ወስብሐት ለእግዚአብሔር አሜን።