Read Ge'ez NT – ሐዲስ ኪዳን በልሳነ ግእዝ ኀበ ሰብአ ኤፌሶን 2 Bible Online

ኀበ ሰብአ ኤፌሶን 2 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ኤፌሶን 2

¹ ወአንትሙሂ እንዘ ምዉታን አንትሙ በኀጢአትክሙ።

² በዘቦቱ ሖርክሙ ትካት በንብረተ ሥርዐተ ዝ ዓለም ከመ ሥምረተ መልአክ መኰንነ ርእየተ ነፋስ ዘይኄይሎሙ ይእዜ ለደቂቀ ከሓድያን።

³ ወንሕነሂ ነበርነ ኵልነ ትካት በፍትወተ ሥጋነ ወገበርነ ፈቃደ ሥጋነ ወዘኀለይነ ወኮነ ውሉደ መንሱት ከመ ኵሉ ኃጥኣን።

⁴ወእግዚአብሔርሰ በብዕለ ስብሐቲሁ ወበብዝኀ ፍቅሩ ዘአፍቀረነ።

⁵ እንዘ ሙታን ንሕነ በኀጢአትነ አሕየወነ በክርስቶስ ወድኅነ በጸጋሁ።

⁶ ወአንሥአነ ወአንበረነ ምስሌሁ በሰማያት በኢየሱስ ክርስቶስ።

⁷ ከመ ያርኢ በዓለም ዘይመጽእ ብዝኀ ጸጋሁ ወምሕረቱ ዘአፈድፈደ በኢየሱስ ክርስቶስ።

⁸ እስመ በጸጋሁ ድኅነ ወበአሚን ወዳእሙ ጸጋሁ ለእግዚአብሔር ውእቱ ወኢኮነ ዚኣክሙ።

⁹ ወአኮ በምግባሪነ ከመ አልቦ ዘይትሜካሕ።

¹⁰ እስመ ተግባሩ ንሕነ ዘፈጠረነ በኢየሱስ ክርስቶስ ለምግባረ ሠናይ ዘአቅደመ ሠሪዐ እግዚአብሔር በዘቦቱ ነሐውር።

¹¹ ወተዘከሩ አንትሙ አሕዛብ ትካት በሕግ ዘሥጋ ሀሎክሙ ወይብሉክሙ ሰብአ ቍልፈት ከመዝ ይብሉክሙ ሰብአ ግዝረት ወግዝረትሰ ግብረ እደ ሰብእ ዘይትገበር ውስተ ሥጋ።

¹² ወኢተአምርዎ ለክርስቶስ ውእተ አሚረ ወነኪራን አንትሙ እምሕገ እስራኤል ወነግዳን እምሥርዐተ ተስፋ ወአልብክሙ ተስፋ ወኢተአምርዎ ለእግዚአብሔር በውስተ ዓለም።

¹³ወይእዜሰ ባሕቱ አንትሙ እለ ትካት ርኁቃን ቀረብክሙ በደሙ ለክርስቶስ።

¹⁴ እስመ ውእቱ ሰላምነ ዘረሰዮሙ አሐደ ለክልኤሆሙ ወነሠተ አረፍተ ማእከል በሥጋሁ።

¹⁵ ወሰዐረ ጽልአ ወአብጠለ ሕገ ትእዛዝ በሥርዐቱ ከመ ይረስዮሙ አሐደ ሐዲሰ ለክልኤሆሙ ወገብረ ሰላመ።

¹⁶ወአብጽሖሙ ለክልኤሆሙ በአሐዱ ሥጋሁ ለኀበ እግዚአብሔር በመስቀሉ ወለጽልእ ቀተሎ ቦቱ።

¹⁷ ወመጽአ ወወሀበነ ሰላመ ለርኁቃን ወሰላመ ለቅሩባን።

¹⁸ እስመ ውእቱ መርሐነ ወአቅረበነ ለክልኤነ ኀበ አቡሁ በመንፈስ ቅዱስ።

¹⁹ እምይእዜሰ ኢኮንክሙ ነግደ ወፈላሴ አላ አንትሙ ሰብአ ሀገሪቶሙ ለቅዱሳን ወሰብአ ቤቱ ለእግዚአብሔር።

²⁰ እስመ ተሐነጽክሙ ዲበ መሠረተ ሐዋርያት ወነቢያት እንዘ ክርስቶስ ርእሰ ማእዘንተ ሕንጻ።

²¹ዘቦቱ የኀድር ኵሉ ሕንጻ ወይጸንዕ ጽርሐ መቅደሱ ለእግዚአብሔር።

²² ወአንትሙሂ ቦቱ ተሐነጽክሙ ማኅደረ እግዚአብሔር በመንፈስ ቅዱስ።