Read Ge'ez NT – ሐዲስ ኪዳን በልሳነ ግእዝ ኀበ ሰብአ ኤፌሶን 3 Bible Online

ኀበ ሰብአ ኤፌሶን 3 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ኤፌሶን 3

¹ ወእንበይነዝ አነ ጳውሎስ ሙቁሑ ለክርስቶስ እንበይነ ዚኣክሙ አሕዛብ።

²ሶበሰ ሰማዕክሙ ሀብተ ጸጋሁ ለእግዚአብሔር ዘወሀበኒ በእንቲኣክሙ።

³ እስመ ከሠተ ሊተ ምክሮ ወአርአየኒ በከመ ጸሐፍኩ ለክሙ ኅዳጠ።

⁴በዘትክሉ አእምሮ ሶበ ታነብቡ ወተአምሩ ኅሊናየ በምክሩ ለክርስቶስ።

⁵ዘኢየአምሮ ካልእ ትውልድ ደቂቀ ዕጓለ እመሕያው ከመ ይእዜ ተከሥተ ለቅዱሳን ሐዋርያቲሁ ወነቢያቲሁ በመንፈስ ቅዱስ።

⁶ ከመ ይረስዮሙ ለአሕዛብ መዋርስቲሁ ወሥጋሁ ወይኅበሩ ተስፋ በኢየሱስ ክርስቶስ በትምህርተ ወንጌል።

⁷ዘሎቱ ተሠየምኩ አነ ላእከ ወዐዋዴ በከመ ሀብተ ጸጋሁ ዘወሀበኒ ሊተ በረድኤተ ኀይሉ።

⁸ ሊተ ዘአነ እቴሐት እምኵሎሙ ቅዱሳን ወሀበኒ ዘንተ ጸጋሁ ከመ እምሀሮሙ ለአሕዛብ ብዕለ ክርስቶስ ዘአልቦ አሠር ወአብርሀ ለኵሉ።

⁹ ምንት ውእቱ ሥርዐቱ ለዝንቱ ምክር ዘኅቡእ እምዓለም በኀበ እግዚአብሔር ዘኵሎ ፈጠረ።

¹⁰ ከመ ይእዜ ይትዐወቅ ለቀደምት ወለመኳንንት እለ በሰማያት በእንተ ቤተ ክርስቲያኑ ጥበቢሁ ለእግዚአብሔር እንተ ብዙኅ ኅበሪሃ።

¹¹ ዘሠርዓ እምቅድመ ዓለም ወፈጸማ በኢየሱስ ክርስቶስ እግዚእነ።

¹² ዘቦቱ ረከብነ ጸጋ ወሞገሰ ወመርሐነ ውስተ ተስፋ ዘሃይማኖት።

¹³ወበእንተ ዝንቱ አስተበቍዖ ለእግዚአብሔር ከመ ኢይትቈጥዓ ለሕማምየ እንተ ረከበተኒ በእንቲኣክሙ ለክብርክሙ።

¹⁴ ወእንበይነ ዝንቱ እሰግድ ለአብ በብረከ ልብየ።

¹⁵ዘኪያሁ ይጼውዑ ኵሉ በሐውርት ዘበሰማያት ወዘበምድር።

¹⁶ ከመ የሀብክሙ በከመ ብዕለ ስብሐቲሁ ወያጽንዕክሙ በኀይለ መንፈስ ቅዱስ።

¹⁷ እስመ እንተ ውስጡ ለሰብእ የኀድር ክርስቶስ በሃይማኖት ውስተ ልብክሙ በተፋቅሮ እንዘ ይከውን ጽኑዐ ሥርውክሙሂ ወመሠረትክሙሂ።

¹⁸ከመ ትክሀሉ ረኪበ ምስለ ኵሎሙ ቅዱሳን ምንትኑ ራሕቡ ወኑኁ ወላዕሉ ወዕመቁ።

¹⁹ለጠይቆ ብዝኀ አእምሮ ፍቅሩ ለክርስቶስ ከመ ትሰለጡ በኵሉ ፍጻሜ ለእግዚአብሔር።

²⁰ ዘይክል አጽንዖተክሙ ትግበሩ ኵሎ ወታፈድፍዱ ዘንስእል ወዘንሔሊ በከመ ይረድአነ ኀይሉ።

²¹ ዘሎቱ ስብሐት በቤተ ክርስቲያን በኢየሱስ ክርስቶስ በኵሉ ትውልድ ወለዓለመ ዓለም አሜን።