Read Ge'ez NT – ሐዲስ ኪዳን በልሳነ ግእዝ ኀበ ሰብአ ኤፌሶን 5 Bible Online

ኀበ ሰብአ ኤፌሶን 5 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ኤፌሶን 5

¹ ተመሰሉ በእግዚአብሔር ከመ ውሉድ ፍቁራን።

² ወሑሩ በተፋቅሮ በከመ አፍቀረክሙ ክርስቶስ ወመጠወ ርእሶ በእንቲኣክሙ መሥዋዕተ ወቍርባነ ለእግዚአብሔር ለመዓዛ ሠናይ።

³ ወዝሙትሰ ወኵሉ ርኵስ ወትዕግልት ኢይሰማዕ በላዕሌክሙ በከመ ይደልዎሙ ለቅዱሳን።

⁴ ወኢነገረ ኀፍርት ወነገረ እበድ ወነገረ ሥላቅ ዘኢይደሉ ዘእንበለ ዳእሙ አእኵቶ ህየንተ ዝ እኩይ።

⁵ ወዘንተ አእምሩ ከመ ኵሉ ዘማዊ ወርኩስ ወመስተዐግል ወዘያጣዑ አልቦ መክፈልት ውስተ መንግሥተ ክርስቶስ ዘእግዚአብሔር።

⁶ወአልቦ ዘያስሕተክሙ በነገረ ከንቱ እስመ በእንቲኣሁ ይመጽእ መዓተ እግዚአብሔር ላዕለ ውሉደ ዐላውያን።

⁷ኢትትመሰልዎሙኬ

⁸ እስመ ትካት ጽልመት አንትሙ ወይእዜሰ ብርሃነ ኮንክሙ በእግዚእነ።

⁹ ከመ ውሉደ ብርሃን ሑሩ እንከሰ እስመ ፍሬሁ ለብርሃን ኵሉ ምግባረ ሠናይ ወጽድቅ ወርትዕ።

¹⁰ወአመክሩ ዘያሠምሮ ለእግዚአብሔር።

¹¹ወኢትኅበሩ ምስለ እለ አልቦሙ ፍሬ ምግባር ዘጽልመት ኵለንታሆሙ አላ ገሥጽዎሙ።

¹² እስመ ዘበጽሚት ይገብሩ ኀፍረት ለነጊር።

¹³ ወዘሰ ክሡት ኵሉ ውስተ ብርሃን ይትዐወቅ እስመ ኵሉ ዘገሃድ ብርሃን ውእቱ።

¹⁴ እስመ ይቤ ንቃህ ዘትነውም ወተንሥእ እሙታን ወያበርህ ለከ ክርስቶስ።

¹⁵ ዑቁ እንከ ዘከመ ተሐውሩ ከመ ጠቢባን በንጽሕ ወአኮ ከመ አብዳን።

¹⁶ እንዘ ታነሐስይዎ ለዝ ዓለም እስመ እኩይ መዋዕሊሁ።

¹⁷በእንተ ዝንቱ ኢትኩኑ አብዳነ አላ ኀልዩ ፈቃደ እግዚአብሔር።

¹⁸ወኢትስክሩ ወይነ እስመ ምርዓት ውእቱ አላ ምልኡ መንፈሰ ቅዱሰ።

¹⁹ ወአንበቡ መዝሙረ ወስብሐተ ወማኅሌተ ቅድሳት ሰብሑ ወዘምሩ ለእግዚአብሔር በልብክሙ።

²⁰ወአእኵቱ ዘልፈ በእንተ ኵሉ በስመ እግዚእነ ኢየሱስ ክርስቶስ ለእግዚአብሔር አብ።

²¹ አትሕቱ ርእሰክሙ ለቢጽክሙ በፍርሀተ እግዚአብሔር።

²² ወአንስትኒ ይትአዘዛ ለአምታቲሆን ከመ ዘለእግዚእነ።

²³ እስመ ብእሲ ርእሳ ለብእሲት ከመ ክርስቶስ ርእሳ ለቤተ ክርስቲያን ወመድኅነ ሥጋሃ።

²⁴ወከመ ቤተ ክርስቲያን ትትኤዘዞ ለክርስቶስ ከማሁ አንስትኒ ይትአዘዛ ለአምታቲሆን በኵሉ።

²⁵ ዕደውኒ ያፍቅሩ አንስቲያሆሙ ከመ ክርስቶስ አፍቀራ ለቤተ ክርስቲያን ወመጠወ ርእሶ በእንቲኣሃ።

²⁶ ከመ ይቀድሳ ወያንጽሓ በጥምቀተ ማይ ወበቃሉ።

²⁷ ወይረስያ ሎቱ ክብርተ ለቤተ ክርስቲያኑ ከመ ኢይርከብ በላዕሌሃ ርስሐተ ወጥልቀተ ዳእሙ ከመ ትኩን ንጽሕተ ወቅድስተ።

²⁸ከማሁ ዕደውኒ ያፍቅሩ አንስቲያሆሙ ከመ ነፍሶሙ ዘአፍቀረ ብእሲቶ ርእሶ አፍቀረ።

²⁹ወአልቦ ዘይክል ጸሊአ ሥጋሁ ግሙራ ሴስዩ ወተማሕፀኑ በከመ ክርስቶስ ለቤተ ክርስቲያኑ።

³⁰ እስመ አባለ ሥጋሁ ይእቲ።

³¹ ወበእንተዝ የኀድግ ብእሲ አባሁ ወእሞ ወይተልዋ ለብእሲቱ ወይከውኑ ክልኤሆሙ አሐደ ሥጋ።

³²ዐቢይ ውእቱ ዝ ነገር ወአንሰ እብሎ ላዕለ ክርስቶስ ወላዕለ ቤተ ክርስቲያኑ።

³³ወባሕቱ አንትሙኒ ኵልክሙ ከማሁ አንስቲያክሙ አፍቅሩ ከመ ነፍስክሙ ወብእሲትኒ ትፍርሆ ለምታ።