Read Ge'ez NT – ሐዲስ ኪዳን በልሳነ ግእዝ ኀበ ሰብአ ፊልጵስዩስ 1 Bible Online

ኀበ ሰብአ ፊልጵስዩስ 1 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ፊልጵስዩስ 1

¹ እምጳውሎስ ወጢሞቴዎስ አግብርተ ኢየሱስ ክርስቶስ ለኵሎሙ ቅዱሳን እለ ተቀደሱ በኢየሱስ ክርስቶስ እለ ሀለዉ ፊልጵስዩስ ምስለ ቀሳውስት ወዲያቆናት።

² ሰላም ለክሙ ወጸጋ እግዚአብሔር አቡነ ወእግዚእነ ኢየሱስ ክርስቶስ።

³ አአኵቶ ለአምላኪየ ዘልፈ በኵሉ ተዝካርክሙ ኪያየ።

⁴ወእጼሊ በኵሉ ጊዜ በእንቲኣክሙ ወእገብር ጸሎተ ፍሥሓ።

⁵በእንተ ተሳትፎትክሙ ኪያየ በትምህርተ ወንጌል እምቀዳሚት ዕለት እስከ ይእዜ።

⁶ እስመ እትአመን ከመ ውእቱ ዘወጠነ ለክሙ ግብረ ሠናየ ውእቱ ይፌጽም ለክሙ እስከ ዕለተ ኢየሱስ ክርስቶስ።

⁷ እስመ ርቱዕ ሊተ ዘንተ አኀሊ በእንቲኣክሙ እስመ ሀሎክሙ ውስተ ልብየ በመዋቅሕትየ ወበቅሥትየ ወበትምህርተ ጽድቅ እስመ ኀበርክሙ ምስሌየ በጸጋ።

⁸ ወእግዚአብሔር ሰማዕትየ ከመ አፈቅረክሙ በፍቅረ ክርስቶስ።

⁹ ወእጼሊ በእንተ ዝንቱ ከመ ይብዛኅ ወይፈድፍድ ተፋቅሮትክሙ በአእምሮ ወበኵሉ ጥበበ መንፈስ።

¹⁰ ከመ ትፍትኑ ወታመክሩ ዘይኄይስ ወዘይሤኒ ግብረ ከመ ትኩኑ ቅዱሳነ ዘእንበለ ዕቅፍት በዕለተ ክርስቶስ።

¹¹ እንዘ ምሉኣን አንትሙ ፍሬ ጽድቅ በኢየሱስ ክርስቶስ ለስብሐተ እግዚአብሔር ወአኰቴቱ።

¹² ወእፈቅድ አኃዊየ ታእምሩ ዜናየ ከመ ፈድፋደ ተለዐለ ውስተ ትምህርተ ወንጌሉ ለክርስቶስ።

¹³ወተዐውቀ መዋቅሕትየ በክርስቶስ በኀበ ኵሉ ምኵናን ወበኀበ ኵሉ ሰብእ።

¹⁴ ወከመ ብዙኃን እምአኀዊነ ምእመናን በእግዚእነ ተዐገሡ በመዋቅሕትየ ወፈድፋደ ተኀበሉ አጥቢዖሙ ይንግሩ ቃለ እግዚአብሔር ዘእንበለ ፍርሀት።

¹⁵ ወቦ እለ በቅንአቶሙ ወቦ እለ በተቃኅዎቶሙ ወቦ እለ ፈቀዱ ይስብኩ በፍቅር ሠናይ ወይምሀሩ በእንተ ክርስቶስ።

¹⁶እስመ የአምሩ ከመ ለምህሮ ወንጌል ተሠየምኩ ዓዲ።

¹⁷ወእለሰ በትዝኅርቶሙ ይነግሩ በእንተ ክርስቶስ አኮ በንጽሕ ዳእሙ ይትሐዘቡ ከመ ገቢሮሙ ኪያሁ ይወስኩ ሊተ ሕማመ በመዋቅሕትየ።

¹⁸ ወናሁ ተፈሣሕኩ በዝንቱ ወእትፌሣሕኒ ቦቱ ከመ በኵሉ ምክንያት ይንግሩ በእንተ ክርስቶስ እመኒ በአድልዎ ወእመኒ በአማን ወይጸውዑ ኀቤሁ ኵሎ ሰብአ።

¹⁹ ወአነ አአምር ከመ ዛቲ ግብር ታበጽሐኒ ኀበ ሕይወት በጸሎትክሙ ወበሀበተ መንፈሱ ለኢየሱስ ክርስቶስ።

²⁰ በከመ ተሰፈውኩ ወተወከልኩ ከመ ኢይትኀፈር ወኢበምንትኒ ዳእሙ ገሃደ በፍሥሓ መንፈስ ከመ ዘልፍ ወይእዜኒ ዕበዩ ለክርስቶስ በሥጋየ እመኒ በሕይወትየ ወእመኒ በሞትየ።

²¹ አንሰ እመኒ ሐየውኩ ለክርስቶስ ወእመኒ ሞትኩ ርቡሕ ሊተ።

²² ወለእመኒ ሐየውኩ በሥጋየ ከመ እፍረይ በምግባርየ ወኀጣእኩ ዘአኀሪ ለነፍስየ እምእሉ ክልኤቱ ዘያጽሕቀኒ ፈቂዶቶሙ።

²³ እፈቱሰ እፍልስ ወእትፈለጥ እምዓለም ከመ አሀሉ ኀበ ክርስቶስ ወፈድፋደ ይኄይስ ወይደሉ ሊተ ዝንቱ።

²⁴ወከመ አሀሉ ዓዲ በሕይወተ ሥጋየ ርቱዕ በእንቲኣክሙ።

²⁵ወእትአመን አእሚርየ ዘንተ ከመ እነብር ወእሄሉ ለፍሥሓክሙ ወለተልዕሎ ሃይማኖትክሙ።

²⁶ ከመ አመ መጻእኩ ካዕበ ኀቤክሙ ይዕበይ ወይትወሰክ ክብርክሙ በላዕሌየ በኢየሱስ ክርስቶስ።

²⁷ ወበዘይደሉ ለትምህርተ ክርስቶስ ይኩን ዳእሙ ግብርክሙ ወለእመ መጻእኩ ኀቤክሙ እሬኢ ዘንተ ወእመኒ እንዘ ኢሀሎኩ እሰምዕ በላዕሌክሙ ከመ ትቀውሙ በአሐዱ መንፈስ ወበአሐዱ ነፍስ እንዘ ትትጋደሉ በጻማ ሃይማኖተ ወንጌል።

²⁸ ወእንዘ ኢያንቀለቅሉክሙ በምንትኒ እለ ይትቃወሙነ ከመ ይትዐወቅ ሕርትምናሆሙ ወለክሙሰ ሕይወት።

²⁹ ወዘንተኒ ጸጋ እግዚአብሔር ዘጸገወክሙ አኮ ዳእሙ ከመ ትእመኑ ቦቱ አላ ዓዲ ከመሂ ትሕምሙ በእንቲኣሁ።

³⁰ ወከማሁ ከመ ትትጋደሉ ዘከመ ርኢክሙኒ ኪያየ ወሰማዕክሙ በእንቲኣየ።