Read Ge'ez NT – ሐዲስ ኪዳን በልሳነ ግእዝ ኀበ ሰብአ ፊልጵስዩስ 2 Bible Online

ኀበ ሰብአ ፊልጵስዩስ 2 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ፊልጵስዩስ 2

¹ ወእምከመ ሀለወ ኀቤክሙ ይእዜ ፍሥሓ በክርስቶስ አው ዘይናዝዝ ልበ በተፋቅሮ አው ዘይሳተፍ በመንፈስ አው በምሒር ወተሣህሎ።

² ፈጽሙ ሊተ ፍሥሓየ ከመ ተኀልዩ ኪያሁ ክመ ወተሀልዉ በተፋቅሮ በአሐዱ ነፍስ ወበአሐዱ ምክር።

³ ወኢትግበሩ በተቃሕዎ ወኢበአፍቅሮ ክብረ ከንቱ ኢትዘኀሩ ወኢትትዐበዩ አላ በትሑት ልብ አክብሩ ቢጸክሙ እምርእስክሙ ፈድፋደ።

⁴ ወኢትጽሐቁ ለባሕቲትክሙ ዘእንበለ ለቢጽክሙ።

⁵ ኵልክሙ ፍጹማን ዘንተ ኀልዩ ለነሂ ዘከመ ገብረ ለነ ኢየሱስ ክርስቶስ ።

⁶ ዘውእቱ አርኣያሁ ለእግዚአብሔር አኮ ሀዪዶ ዘኮነ እግዚአብሔር።

⁷ አላ አትሒቶ ርእሶ ነሥአ አርኣያ ገብር ወተመሰለ ከመ ብእሲ።

⁸ ወኮነ ከመ ሰብእ ወሰምዐ ወተአዘዘ እስከ በጽሐ ለሞት ወሞቱሂ ዘበመስቀል።

⁹ ወበእንተዝ አዕበዮ እግዚአብሔር ጥቀ ወጸገዎ ስመ ዘየዐቢ እምኵሉ ስም።

¹⁰ ከመ ለስሙ ለኢየሱስ ክርስቶስ ይስግድ ኵሉ ብርክ ዘበሰማያት ወዘበምድር ወበቀላያት ወእለ ታሕተ ምድር።

¹¹ ወኵሉ ልሳን ይግነይ ከመ ኢየሱስ ክርስቶስ ውእቱ እግዚእ በስብሐተ እግዚአብሔር አብ።

¹² ወይእዜኒ አኀውየ በከመ ዘልፈ ትሰምዑኒ ወአኮ በሀልዎትየ ዳእሙ ወዓዲ ፈድፋደ እንዘ ኢሀሎኩ በፍርሀት ወበረዓድ ተገበሩ ለሕይወትክሙ።

¹³ ወእግዚአብሔር ውእቱ ዘይረድአክሙ ለፈቃዱ ወይፈጽም ለክሙ ሣህሎ።

¹⁴ ወግበሩ ኵሎ ዘትገብሩ በተሰናዕዎ ወበሥምረት ዘእንበለ ነጐርጓር ወዘእንበለ ኑፋቄ።

¹⁵ ከመ ትኩኑ ንጹሓነ ወየዋሃነ ከመ ውሉደ እግዚአብሔር እንዘ አልብክሙ ነውር በማእከለ ውሉድ ዓላውያን ወግፍቱዓን ወታስተርእዩ ከመ ብርሃናት ውስተ ዓለም።

¹⁶ እንዘ ትሜህሩ ቃለ ሕይወት በዘእትሜካሕ አነ በዕለተ ክርስቶስ እስመ አኮ ለከንቱ ዘሮጽኩ ወአኮ ለከንቱ ዘጻመውኩ።

¹⁷ ወአወጽሕ በእንተ መሥዋዕተ አምልኮ ለሃይማኖትክሙ።

¹⁸ ወናሁ እትፌሣሕ ወእትሐሠይ ለክሙ ወአንትሙኒ ተፈሥሑ ወተሐሠዩ ሊተ።

¹⁹ወእትአመን በእግዚእነ ኢየሱስ ክርስቶስ ከመ እፌንዎ ለክሙ ለጢሞቴዎስ ከመ እትፌሣሕ አነሂ ሰሚዕየ ዜናክሙ።

²⁰ እስመ አልብየ ዘከመ ግዕዝየ ዘእንበሌሁ ዘይጸውር ትካዘክሙ በአእምሮ።

²¹ እስመ ኵሉ ትካዘ ርእሱ ይኄሊ ወአኮ ዘክርስቶስ።

²² ወተአምርዎ ግዕዞ ለዝንቱ ብእሲ ዘከመ ተቀንየ ሊተ ከመ ወልድ ለወላዲሁ በትምህርተ ወንጌል።

²³ኪያሁ እሴፎ እፈንዎ ፍጡነ አእሚርየ ዘከመ ሀሎኩ እፌንዎ ሶቤሃ።

²⁴ ወእትአመን በእግዚእነ ከመ አነሂ ፍጡነ እመጽእ።

²⁵ ወይእዜሰ ፈድፋደ ጽሕቁ በእንተ አፍሮዲጡ እኁነ ዘየኀብር ግብረ ምስሌየ ወዓሊ ዘክርስቶስ ወለክሙሰ ሐዋርያክሙ ወላእክየ ለትካዝየ እፌንዎ ኀቤክሙ።

²⁶እስመ ይጽሕቅ ይርአይክሙ አእሚሮ ዘሰማዕክሙ ከመ ደወየ ወበጽሐ ለሞት።

²⁷ ወባሕቱ እግዚአብሔር ምህሮ ወአኮ ሎቱ ለባሕቲቱ ዓዲ ሊተኒ ከመ ትካዝ በዲበ ትካዝ ኢይትወሰከኒ።

²⁸ወፈነውክዎ ፍጡነ ከመ ትርአይዎ ወትትፈሥሑ ወአነሂ ከመ እትፈሣሕ።

²⁹ ወተወከፍዎ በእግዚእነ በኵሉ ፍሥሓ ወአክብርዎሙ ለእለ ከመዝ።

³⁰ እስመ በእንተ ግብረ እግዚአብሔር በጽሐ እስከ ለሞት ወመጠወ ነፍሶ ከመ ይፈጽም ዘአሕጸጽክሙ አንትሙ እመልእክተ ዚኣየ።