Read Ge'ez NT – ሐዲስ ኪዳን በልሳነ ግእዝ ኀበ ሰብአ ፊልጵስዩስ 3 Bible Online

ኀበ ሰብአ ፊልጵስዩስ 3 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ፊልጵስዩስ 3

¹ ወይእዜኒ አኀውየ ተፈሥሑ በእግዚእነ ወዘሂ ዘእጽሕፍ ለክሙ ኢይትሀከይ አንሰ እስመ ያጸንዐክሙ።

² ተዐቀቡ አንትሙሂ ወዑቅዎሙ ለከለባት ወዑቅዎሙ ለገበርተ እኪት ወዑቅዎሙ ለምቱራን በግዝረት።

³ ግዙራንሰ ንሕነ እለ ንትለአክ ለእግዚአብሔር በመንፈስ ወናመልክ ወንትሜካሕ በኢየሱስ ክርስቶስ ወአኮ በሥጋነ ዘንትዌከል።

⁴ እንዘ ብየኒ ግዝረት እመሰ አነ እትዌከል በግዝረት ወእመሰ ቦ ዘይኄሊ ትውክልተ በግዝረት አነ እኄይሶ ለዝንቱ።

⁵ ግዙር ዘበሳምንት እምሕዝበ እስራኤል እምነገደ ብንያም ዕብራዊ ዘእምዕብራውያን ወበሕገ ኦሪት ፈሪሳዊ።

⁶ወበቅንአት ሰደድኩ ቤተ ክርስቲያን በጽድቀ ኦሪት ንጹሐ ከዊንየ።

⁷ ወባሕቱ ዝኰ ረባሕየ አብደርኩ እኅጐሎ በእንተ ክርስቶስ።

⁸ወረሰይኩ ኵሎ ኀሣረ በእንተ ዕበየ ኀይለ አእምሮቱ ለኢየሱስ ክርስቶስ እግዚእየ ዘበእንቲኣሁ ገደፍኩ ኵሎ ወረሰይክዎ ከመ እዳው ከመ እርብሖ ለክርስቶስ።

⁹ ወእኩን ቦቱ እንዘ አልብየ ይእዜ ጽድቀ ኦሪት ዘእንበለ ጽድቀ ሃይማኖተ ክርስቶስ ዘእምኀበ እግዚአብሔር።

¹⁰ ወቦቱ አአምሮ ለኢየሱስ ወለኀይለ ተንሥኦቱ ወእሳተፎ በሕማሙ ወእትሜሰሎ በሞቱ።

¹¹እመቦ ከመ አድምዖ በዝንቱ አመ ይትነሥኡ ምዉታን።

¹² ወአኮሰ ዘወዳእኩ ወነሣእኩ ወሰለጥኩ ዘንተ ዳእሙ እዴግን ለእመ እረክብ ግብረ ዘበእንቲኣሁ ነሥአኒ ኢየሱስ ክርስቶስ።

¹³ኦ አኀውየ ሊተሰ ይመስለኒ ዓዲየ ኢነሣእኩ ፍጻሜየ።

¹⁴ እስመ ዘድኅሬየ እረስዕ ወዘቅድሜየ እሜልዕ ወእዴግን ወአኀሥሥ ዕሴትየ ከመ ሰብአ ዐይን ለጽዋዔ ዘእግዚአብሔር ኀበ ላዕሉ በኢየሱስ ክርስቶስ።

¹⁵ኵልክሙ ፍጹማን ዘንተ ኀልዩ ወእመኒ ቦ ባዕድ ዘትኄልዩ ኪያሁኒ ይክሥት ለክሙ እግዚአብሔር።

¹⁶ ወባሕቱ ውስተ ዘበጻሕነ ግብር ናጥብዕ በአሐዱ ኅብረት።

¹⁷ ኪያየ ተመሰሉ አኀውየ ወተዐቀብዎሙ ለእለ ከመዝ የሐውሩ ዘከመ ትሬእዩኒ።

¹⁸ እስመ ብዙኃን እለ የሐወሩ ሑረተ ካልአ ዘከመ እብለክሙ ዘልፈ ወይእዜኒ ገሃደ እነግረክሙ ከመ እሙንቱ ጸላእቱ ለመስቀለ ክርስቶስ።

¹⁹ እለ ደኃሪቶሙ ለሕርትምና እለ ከርሦሙ ያመልኩ ወክብሮሙ ኀሣሮሙ እለ ይኄልዩ ዘውስተ ምድር።

²⁰ ወለነሰ ዘውስተ ሰማያት ሀገርነ ወእምህየ ንጸንሕ ኪያሁ መድኀኒነ ኢየሱስ ክርስቶስ እግዚእነ።

²¹ ዘይሔድስ ሥጋነ ትሑተ ወይሬስዮ አምሳለ ሥጋ ስብሐቲሁ በከመ ረድኤተ ኀይሉ ዘቦቱ ይገኒ ሎቱ ኵሉ።