Read Ge'ez NT – ሐዲስ ኪዳን በልሳነ ግእዝ ኀበ ሰብአ ፊልጵስዩስ 4 Bible Online

ኀበ ሰብአ ፊልጵስዩስ 4 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ፊልጵስዩስ 4

¹ ወይእዜኒ አኀዊነ ፍቁራን ፍሥሓነ ወአክሊልነ ከመዝ ቁሙ ወጽንዑ በእግዚእነ አኀዊነ።

² ወአስተበቍዐክሙ ኤዎድያን ወስንጣክን ከመ ተኀልዩ በተልእኮ እግዚእነ በአሐዱ ልብ።

³ ወአስተበቍዐከ ለከሂ እኁየ ወመፃምርትየ ሰትሪካ ከመ ታርድኦሙ እስመ ሰርሑ ምስሌየ በትምህርተ ወንጌል ምስለ ቀሌምንጦስ ወኵሎሙ ቢጽነ እለ አሐዱ ግብሮሙ እለ ተጽሕፈ አስማቲሆሙ ውስተ መጽሐፈ ሕይወት።

⁴ ተፈሥሑ በእግዚእነ ዘልፈ ወካዕበ እብለክሙ ተፈሥሑ።

⁵ወይትዐወቅ ስላጤክሙ በኀበ ኵሉ ሰብእ እግዚአብሔር ቅሩብ።

⁶ ኢተኀልዩ ወኢምንተኒ ወባሕቱ ጸልዩ በኵሉ ጊዜ ወሰአሉ ወእንዘ ተአኵቱ ክሥቱ ስእለተክሙ ኀበ እግዚአብሔር።

⁷ ወሰላመ እግዚአብሔር እንተ ኵሉ ባቲ ወትትሌዐል እምኵሉ ልብ ወእምኵሉ ኅሊና ታጽንዖ ለልብክሙ ወለኅሊናክሙ በኢየሱስ ክርስቶስ።

⁸ወይእዜኒ አኀዊነ ኵሎ ዘርትዕ ወዘንጽሕ ወዘጽድቅ ወዘሠናይ ወዘፍቅር ወዘምድኃር ወአስተርክቦ ዘይደሉ ወዘይትአኰት ኪያሁ ኀልዩ።

⁹ ዘተመሀርክሙ ወዘሰማዕክሙ ወዘርኢክሙ በኀቤየ ኪያሁ ግበሩ ወአምላከ ሰላም የሀሉ ምስለ ኵልክሙ።

¹⁰ ተፈሣሕኩ በእግዚእነ ፈድፈደ እስመ ትኄልዩ ወትጽሕቁ ለትካዝየ እምቀዲሙ በከመ ትጽሕቁ ሊተ ዓዲ ወለእመ ይሰአነክሙ።

¹¹ ወአኮ ዘእቤ በእንተ ዘኀጣእኩ እስመ አአምር ከመ የአክለኒ ዘብየ።

¹² ከሃሊ አንሰ ተጽናሰሂ ወተደልዎሂ በኵሉ ውስተ ኵሉ ለመድኩ ርኂበሂ ወጸጊበሂ ሐሚመሂ ወተፈሥሖሂ።

¹³ ኵሎ እክል በዘውእቱ አክሀለኒ ክርስቶስ።

¹⁴ወባሕቱ ሠናየ ገበርክሙ ዘተሳተፍክሙ በሕማምየ።

¹⁵ተአምሩ አንትሙ ሰብአ ፊልጵስዩስ በቀዳሚ ትምህርት አመ መጻእኩ እመቄዶንያ ከመ ኢኀብሩ ምስሌየ አሐዱሂ እምቤተ ክርስቲያን ኢበውሂብ ወኢበነሢእ ዘእንበለ ዳእሙ ባሕቲትክሙ።

¹⁶ ዓዲ በተሰሎንቄሂ ምዕረ ወካዕበ ፈኖክሙ ሊተ ለትካዝየ።

¹⁷ አኮ ሀብተክሙ ፈቂድየ ዘእዜከር ዘንተ ዳእሙ አኀሥሥ ከመ ይሥመር በላዕሌክሙ ፍሬ ጽድቅ።

¹⁸ ወናሁ ተወከፍኩ ኵሎ ዘፈኖክሙ ኀቤየ አከለኒ ወበዘተርፈ ሰለጥኩ በዘአብጽሐ ሊተ አፍሮዲጡ ዘእምኀቤክሙ መዓዛ ሠናየ ወመሥዋዕተ ኅሩየ ወሥሙረ በኀበ እግዚአብሔር።

¹⁹ ወአምላኪየ ይፈጽም ለክሙ ኵሎ መፍቀደክሙ በከመ ብዕለ ስብሐቲሁ ለኢየሱስ ክርስቶስ

²⁰ ወእግዚአብሔር አቡነ ዘሎቱ ስብሐት ለዓለመ ዓለም አሜን።

²¹ አምኁ ኵሎ ቅዱሳነ በኢየሱስ ክርስቶስ አምኁክሙ አኀዊነ እለ ኀቤየ።

²² ወይኤምኁክሙ ኵሎሙ ቅዱሳን ወፈድፋደሰ እለ እምሰብአ ቄሣር ቤተ ንጉሥ።

²³ጸጋሁ ለእግዚእነ ኢየሱስ ክርስቶስ ምስለ መንፈስክሙ አሜን። ተፈጸመት መልእክት ኀበ ሰብአ ፊልጵስዩስ ወተጽሕፈት በሮሜ ወተፈነወት ምስለ ጢሞቴዎስ ወአፍሮዲጡ። ወስብሐት ለእግዚአብሔር አሜን።