Read Ge'ez NT – ሐዲስ ኪዳን በልሳነ ግእዝ ኀበ ሰብአ ተሰሎንቄ 1 2 Bible Online

ኀበ ሰብአ ተሰሎንቄ 1 2 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ተሰሎንቄ 1 2

¹ ለሊክሙ ተአምሩ አኀዊነ ዘከመ ገበርነ ለክሙ ወኢኮነ በከንቱ በዊኦትነ ኀቤክሙ።

² ዳእሙ ሐመምነ ወተጽእልነ ዘከመ ተአምሩ በፊልጵስዩስ ወአሜሃ ነገርናክሙ በብዙኅ ጻማ ትምህርተ ክርስቶስ በሞገሱ ለአምላክነ።

³እስመ ኢኮነ ትምህርትነ ዘስሒት ወኢ ዘርኵስ ወኢኮነ ዘጽልሑት።

⁴ ዳእሙ በዘአመከረነ እግዚአብሔር ወተአመነነ በትምህርተ ወንጌሉ ከማሁ ንነግር ወአኮ ከመ ዘለሰብእ ያደሉ ዘእንበለ ለእግዚአብሔር ዘአመከረነ ልበነ።

⁵ወእምአመ ኮነ ኢየዋህናክሙ በቃል በከመ ተአምሩ ወኢተዐገልናክሙ በምክንያት ስምዕነ እግዚአብሔር በዝንቱ።

⁶ ወኢንፈቅድ ያድሉ ለነ ሰብእ ኢአንትሙ ወኢባዕድ እንዘ ንክል አክብዶ ከመ ሐዋርያተ ክርስቶስ።

⁷ዳእሙ ኮነ ከመ ሕፃናት በማእከሌክሙ ወከመ ሐፃኒት እንተ ተሐዝል ደቂቃ።

⁸ከማሁ ንሕነኒ ናፈቅረክሙ ወንጽሕቅ ለክሙ ከመ ንመጡክሙ ወአኮ ባሕቲቶ ወንጌለ እግዚአብሔር ዓዲ ነፍሰነሂ እስመ ፍቁራነ ኮንክሙነ።

⁹ ወተዘከሩ አኀዊነ ጻማነ ወስራሐነ መዓልተ ወሌሊተ ኮነ ንትጌበር ከመ ኢናክብድ ላዕለ አሐዱሂ እምውስቴትክሙ።

¹⁰ወለሊክሙ ሰማዕትነ ወእግዚአብሔር ዘከመ ሰበክነ ለክሙ ትምህርተ ወንጌሉ ለእግዚአብሔር በጽድቅ ወበርትዕ ወበንጽሕ በኀበ ኵሎሙ እለ የአምኑ።

¹¹ዘከመ ተአምሩ ለለ አሐዱ አሐዱ እምውስቴትክሙ ከመ አብ ለወልዱ ናስተበቍዐክሙ ወንናዝዘክሙ።

¹² ወናሰምዕ ለክሙ ከመ ትሑሩ ወትሩጹ በዘይደልወክሙ ለኀበ እግዚአብሔር ዘጸውዐክሙ ውስተ መንግሥተ ስብሐቲሁ።

¹³ በእንተዝ ንሕነሂ ዘልፈ ነአኵቶ ለእግዚአብሔር እስመ ተወከፍክሙ ቃለ ትእዛዙ ለእግዚአብሔር ወአኮ ቃለ ዜና ሰብእ አላ አማን ከማሁ ቃለ እግዚአብሔር ወይረድአክሙሂ በገቢር ለእለ ተአመንክሙ።

¹⁴ወአንትሙ አኀዊነ ተመሰልክሙ በቤተ ክርስቲያኑ ለእግዚአብሔር እለ በይሁዳ ምእመናን በኢየሱስ ክርስቶስ እስመ ሐመምክሙ አንትሙሂ እምሕዝብክሙ በከመ ሐሙ እሙንቱሂ እምአይሁድ።

¹⁵ እለ ቀተልዎ ለእግዚእነ ኢየሱስ ክርስቶስ ወለነቢያትሂ እለ እምውስቴቶሙ ሰደድዎሙ ወኪያነሂ ወኢያሠምርዎ ለእግዚአብሔር ወይትቃረኑ ምስለ ኵሉ ሰብእ።

¹⁶ ወይከልኡነ ኢንንግር ለአሕዛብ በዘየሐይዉ ከመ ይትፈጸሞሙ ኀጢአቶሙ ለዝሉፉ ወናሁ በጽሖሙ መቅሠፍቶሙ ዘለዓለም።

¹⁷ ወንሕነሰ አኀዊነ ከመ ዕጓለ ማውታ ኮነ እምኔክሙ በዝ መዋዕል ለገጽ ዳእሙ ወአኮሰ እምልብ ወፈድፋደ ጽሕቅነ ንርአይ ገጸክሙ።

¹⁸ወብዙኀ ፈቀድኩ እምጻእ ኀቤክሙ ለልየ ጳውሎስ ምዕረ ወካዕበ ወአዕቀፈኒ ሰይጣን።

¹⁹ መኑ ተስፋነ ወፍሥሓነ ወአክሊለ ምክሕነ አኮኑ አንትሙ በቅድመ እግዚእነ ኢየሱስ ክርስቶስ በምጽአቱ።

²⁰እስመ አንትሙ ክብርነ ወፍሥሓነ።