Read Ge'ez NT – ሐዲስ ኪዳን በልሳነ ግእዝ ኀበ ሰብአ ተሰሎንቄ 1 5 Bible Online

ኀበ ሰብአ ተሰሎንቄ 1 5 - Ge'ez NT – ሐዲስ ኪዳን በልሳነ ግእዝ bible

ኀበ ሰብአ ተሰሎንቄ 1 5

¹ ወበእንተሰ ዕድሜሁ ወዕለቱ ወጊዜሁ አኀዊነ ኢትፈቅዱ ንጽሐፍ ለክሙ።

² ለሊክሙ ተአምሩ ጥዩቀ ከመ ዕለተ እግዚእነ ትመጽእ ከመ ምጽአተ ሰራቂ ሌሊተ ከማሁ ይከውን ምጽአቱ።

³ አመ ይብሉ እለ ይክሕዱ ኪያሁ ከመ ውስተ ዳኅን ወሰላም እሙንቱ ወህየ ግብተ ይመጽኦሙ ተሠርዎ ከመ ፅንስት እንተ ይመጽኣ ማሕምም ወኢይክሉ አምስጦ።

⁴ ወአንትሙሰ አኀዊነ ኢሀለውክሙ ውስተ ጽልመት ከመ ይርከብክሙ ውእቱ ዕለት ከመ ሰራቂ።

⁵ እስመ ኵልክሙ ውሉደ ብርሃን አንትሙ ወውሉደ መዓልት ወኢኮንክሙ ውሉደ ሌሊት ወኢውሉደ ጽልመት።

⁶ወኢንኑም እንከ ከመ እልኩ አላ ንንቃህ በኅሊናነ ወንትጋህ ወንጥበብ።

⁷እስመ እለ ይነውሙ ሌሊተ ይነውሙ ወእለሂ ይሰክሩ ሌሊተ ይሰክሩ።

⁸ ወንሕነሰ እንዘ ውሉደ መዓልት ንሕነ ንንቃሕ ወንልበስ ልብሰ ኀጺን ዘሃይማኖት ወዘተፋቅሮ ወንትቀጸል ጌራ ተስፋ መድኀኒት።

⁹ እስመ ኢረሰየነ እግዚአብሔር ለመንሱት ዘእንበለ ለሕይወት ወለመድኀኒት በእግዚእነ ኢየሱስ ክርስቶስ፤

¹⁰ ዘሞተ ለነ ቤዛነ እመኒ ንቁሃን ንሕነ ወእመኒ ንዉማን ምስሌሁ ነሐዩ ኵልነ።

¹¹ ወይእዜኒ አስተፍሥሑ ቢጸክሙ በእንተዝ ወይሕንጽ አሐዱ አሐዱ ካልኦ ዘከመ ትገብሩ ዓዲ።

¹² ወናስተበቍዐክሙ አኀዊነ ዑቅዎሙ ለእለ ይጻምዉ በውስቴትክሙ ወለእለ ይቀውሙ ለክሙ በእንተ እግዚእነ ወይሜህሩክሙ።

¹³አክብርዎሙ ፈድፋደ ወአፍቅርዎሙ በእንተ ምግባሮሙ ወተአምኅዎሙ።

¹⁴ ወናስተቍዐክሙ አኀዊነ ገሥጽዎሙ ለዝሉፋን ናዝዝዎሙ ለኅዙናን ጹርዎሙ ለድኩማን ወተዐገሡ ላዕለ ኵሉ።

¹⁵ ዑቁ ኢትግበሩ እኩየ ህየንተ እኪት አላ ተባደሩ ዘልፈ ለሠናይ በበይናቲክሙ ወለኵሉሂ።

¹⁶ ተፈሥሑ በኵሉ ጊዜ ወጸልዩ ወትረ።

¹⁷ አእኵትዎ ለእግዚአብሔር አብ በእንተ ኵሉ ግብር።

¹⁸ እስመ ዝ ውእቱ ፈቃዱ ለእግዚአብሔር እምውስቴትክሙ በኢየሱስ ክርስቶስ።

¹⁹መንፈሰ ኢታጥፍኡ።

²⁰ ወተነብዮ ኢትመንኑ።

²¹ ወኵሎ አመክሩ ወዘሠናይ አጽንዑ።

²²ወተገኀሡ እምኵሉ ምግባር እኩይ።

²³ ወእግዚአብሔር አምላከ ሰላም ይቀድስክሙ ፍጹመ ወያጥዒክሙ ነፍሰክሙ ወመንፈሰክሙ ወሥጋክሙ በንጽሕ እስከ ምጽአተ እግዚእነ ኢየሱስ ክርስቶስ።

²⁴ ወዘጸውዐክሙ ጻድቅ ውእቱ ይግበር ለክሙ ዘንተ።

²⁵ ኦ አኀዊነ ጸልዩ ለነ።

²⁶ አምኁ ኵሎ አኀዊነ በአምኃ ቅድሳት ወተአምኁ በበይናቲክሙ።

²⁷አምሕለክሙ በእግዚእነ ታንብብዋ ለዛቲ መጽሐፍ ላዕለ ኵሎሙ አኀዊነ ቅዱሳን።

²⁸ ጸጋሁ ለእግዚእነ ኢየሱስ ክርስቶስ ምስሌክሙ፤ አሜን። ተፈጸመ መልእክት ቀዳማዊ ኀበ ሰብአ ተሰሎንቄ ወተጽሕፈ በአቴና ወተፈነወ ምስለ ጢሞቴዎስ ወስልዋኖስ። ወስብሐት ለእግዚአብሔር አሜን።