Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 1 3 Bible Online

ኀበ ጢሞቴዎስ 1 3 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 1 3

¹ እሙን ነገር ዘይፈቅድ ይሠየም ጳጳሰ ሠናየ ግብረ ፈተወ።

² ወባሕቱ ርቱዕ ይሠየም ጳጳሰ ዘኢያደሉ ለገጽ ዘአልቦ ምክንያት ዘአሐተ ብእሲተ አውሰበ ብእሲ ንቁህ ወጠቢብ ወመፍቀሬ ነግድ ዘአንጽሐ ርእሶ መምህር ወመግሥጽ።

³ ዘኢያበዝኅ ሰትየ ወይን ወዘኢያፈጥን እዴሁ ለዘቢጥ ባቍዕ ዘኢይትገዐዝ ዘኢያፈቅር ንዋየ።

⁴ ዘሠናይ ሥርዐተ ቤቱ ዘቦ ውሉድ ዘይትኤአዙ በኵሉ ንጽሕ።

⁵ወዘሰ ኢይክል ሠሪዐ ቤቱ እፎኑ ያስተሐምም ቤተ እግዚአብሔር።

⁶ወኢይኩን ዘእምሐዲስ ተክል ከመ ኢይትዐበይ ወኢይጸአል ወኢይደቅ ውስተ መሥገርተ ሰይጣን።

⁷ ወዓዲ ርቱዕ ዘሰብእ አፍኣ ይንእድዎ ከመ ኢይደቅ ውስተ ጽእለት ወመሥገርተ ሰይጣን።

⁸ ወዲያቆናትኒ ከማሁ ንጹሓን ወእስትርኩባን እለ አሐዱ ቃሎሙ እለ ኢያበዝኁ ሰትየ ወይን እለ ኢያፈቅሩ ረባሐ ከንቶ።

⁹እለ የዐቅቡ ምክረ ሃይማኖቶሙ በልብ ንጹሕ።

¹⁰ወሎሙኒ ይቅድሙ አመክሮቶሙ ወእምዝ ይትለአኩ እምከመ ኅሩያን እሙንቱ።

¹¹ ወአንስትኒ ከማሁ እለ አንጽሓ ርእሶን እለ ተምህራ ሥርዐተ እለ ኢያስተዳጕጻ ጠባባት ወርቱዓት ወምእመናት በኵሉ ይትለኣካ።

¹²ወብእሲኒ ዘአሐተ ብእሲተ አውሰበ ዘቦ ውሉድ ዘሠናይ ግዕዘ ቤቱ።

¹³ ወእለሰ ሠናየ ይትለአኩ እንተ ተዐቢ ሢመተ ይግበሩ ሎሙ ወብዙኅ ሞገስ በሃይማኖተ ኢየሱስ ክርስቶስ።

¹⁴ወዘኒ ዘእጽሕፍ ለከ እትአመን ከመ እበጽሐከ ፍጡነ።

¹⁵ወእመሰ ጐንደይኩ ከመ ታእምር ዘከመ ትሠርዕ ቤተ ክርስቲያኑ ለእግዚአብሔር ሕያው ዐምዳ ወድዳ ለጽድቅ አማን ዐቢይ እስመ ምክሩ ለዝንቱ ጽድቅ።

¹⁶ ዝኬ ዘአስተርአየ በሥጋ ሰብእ ወጸድቀ በመንፈስ ወአስተርአዮሙ ለመላእክት ወሰበክዎ ውስተ አሕዛብ ወተአመነ ውስተ ዓለም ወዐርገ በስብሐት።