Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 1 4 Bible Online

ኀበ ጢሞቴዎስ 1 4 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 1 4

¹ ወመንፈስ ገሃደ ይነግር ከመ በደኃሪ መዋዕል የዐልዉ ሃይማኖቶሙ ብዙኃን ወይተልውዎሙ ለአጋንንት እኩያን ወመስሕታን ወትምህርተ ሰይጣን ዘያናፍቅ።

²ነባብያነ ሐሰት እለ ንዱዳን በኅሊናሆሙ።

³ እለ የሐርሙ አውስቦ ወይከልኡ መባልዕተ ዘእግዚአብሔር ፈጠረ ለምእመናን ከመ ይሴሰዩ ወያእኵቱ እለ የአምርዋ ለጽድቅ።

⁴ እስመ ኵሉ ተግባረ እግዚአብሔር ሠናይ ወአልቦ ግዱፍ ወኢምንትኒ ለእመ ተወከፍዎ እንዘ የአኵቱ።

⁵እስመ ይትቄደስ በቃለ እግዚአብሔር፥ ወበጸሎት።

⁶ ወዘንተ መሀሮሙ ለአኀዊከ ወትከውን ኅሩየ ላእከ ኢየሱስ ክርስቶስ እንዘ ትሴስዮሙ ቃለ ሃይማኖት ወሠናየ ትምህርተ ዘተምህርከ።

⁷ ወለመሐደምተ ዕቤራትሰ ርኩስ እበዮ ወአግርር ርእሰከ ለጽድቅ።

⁸ እስመ ግረትሰ በሥጋ ለኅዳጥ ዘመን ትበቍዕ ወጽድቅሰ ታሰልጥ በኵሉ ወባቲ ተስፋ ሕይወት በዝ ዓለም ወበዘይመጽእ።

⁹እሙን ነገሩ ወርቱዕ ይትወከፍዎ በኵሉ።

¹⁰ እስመ በእንተዝ ንሰርሕ ወንጼአል እስመ ተወከልነ በእግዚአብሔር ሕያው ወማሕየዊ ለኵሉ ሰብእ ወፈድፋደሰ ለመሃይምናን።

¹¹ከመዝ መሀር ወገሥጽ።

¹² ወአልቦ ዘያስተአብዳ ለውርዙትከ ወኩኖሙ አርኣያ ወአምሳለ ለመሃይምናን በቃልከ ወበምግባሪከ በፍቅር ወበሃይማኖት ወበንጽሕ።

¹³ ወተዐቀብ እስከ እመጽእ በአንብቦ ወበምሂር ወበገሥጾ ወበጸልዮ።

¹⁴ ወኢታስትት ጸጋሁ ዘላዕሌከ ዘተውህበከ ምስለ ተነብዮ ወምስለ ሢመተ እዴሆሙ ለጳጳሳት።

¹⁵ዘንተ አንብብ ወበዝ ሀሉ ከመ ይትዐወቅ ስላጤከ በኵለሄ።

¹⁶ ዑቅ እንከ ርእሰከ በእንተ አንብቦ ወዘልፈ ሀሉ ባቲ ወእመሰ ዘንተ ገበርከ ርእሰከሂ ታድኅን ወዘሂ ይሰምዐከ።