Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 1 5 Bible Online

ኀበ ጢሞቴዎስ 1 5 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 1 5

¹ ሊቃናተ ኢታመጕጽ ተአዘዝ ከመ ዘለአቡከ ወለንኡሳን ከመ ዘለአኀዊከ።

² ወለልሂቃትሂ ከመ ዘለእምከ ወለንኡሳትሂ ከመ ዘለአኃቲከ በኵሉ ንጽሕ።

³ወአክብር ዕቤራተ በጽድቅ።

⁴ ወእመ ቦ እምኔሆሙ ዕቤር እንተ ባቲ ውሉድ አው ደቂቀ ውሉድ ይትመሀሩ ቅድመ አሠንዮ ለቤቶሙ ወይሴስዩ አዝማዲሆሙ እስመ ከማሁ ሠናይ ወሥሙር በቅድመ እግዚአብሔር።

⁵ ወእንተሰ ዕቤር በአማን ንጽሕት እንተ ባሕቲታ ትነብር እስመ ትውክልታ እግዚአብሔር ባሕቲቱ ወትፀመድ ጸሎተ ወትስእል መዐልተ ወሌሊተ።

⁶ ወእንተሰ ትፌግዕ ምስለ ተውኔት ምውት ይእቲ እንዘ ሕያዋ።

⁷ወከመዝ ገሥጽ ከመ ኢያድልዉ ወኢያመክንዩ።

⁸ ወዘሰ ኢይኄሊ ለቤቱ ወይገድፍ አዝማዲሁ ወፈድፋደሰ ለእመ ኮኑ እምሰብአ ሃይማኖት ውእቱ ክሕደ ሃይማኖቶ ወየአኪ እምዘኢየአምን።

⁹ወለእመ ኀረይከ እቤረ ኅረይ እንተ ስሳ ክረምታ እንተ አሐደ ብእሴ አውሰበት።

¹⁰ እንተ ይንእድዋ በኵሉ ምግባረ ሠናይ ለእመ አልሀቀት ውሉዳ ወለእመ ነግደ ተወክፈት ወለእመ እግረ ጻድቃን ኀፀበት ወለእመ ርኁበ አጽገበት ወኵሎ ምግባረ ሠናይ ለእመ ተለወት።

¹¹ወለንኡሳትሰ መበለታት ተገሐሦን ወኢትሢሞን ከመ ኢይትፈግዓ ላዕለ ክርስቶስ ወይፈቅዳ ይግብኣ ለአውስቦ።

¹² ወጽኑሕ ደይኖን ለእመ ክሕዳ ሃይማኖቶን ቀዳሚተ።

¹³ ወዓዲ አፅርዕተ ወሀኬተ ይትሜሀራ እንዘ የዐውዳ አብያተ ወአኮ አፅርዕተ ባሕቲቶ አላ ዓዲ ከመ ያብዝኃ ነቢበ ወምግባረ ከንቱ ይፈጥራ ነገረ ዘኢህልው።

¹⁴ እፈቅድ እንከ ለንኡሳት ያውስባ ወይትዋለዳ ወይኩና በዓልታተ ቤት ከመ ኢይርከብ ምክንያተ ወኢአሐተኒ በዘይጸብኦን ጸላኢ ከመ ኢያጽዕላ ርእሶን።

¹⁵ እስመ ቦ እለ ተመይጡ ወተለውዎ ለሰይጣን።

¹⁶ወለእመ ቦ እምእመናን ዘቦ ዕቤር ይዕቀባ ወኢያክብድ ላዕለ ቤተ ክርስቲያን ከመ ትክሀል ለእለ በአማን ዕቤራት።

¹⁷ እለሰ ሠናየ ተልእኩ ቀሲሳን ምክዕቢተ ክብር ይደልዎሙ ወፈድፋደሰ ለእለ ይሰርሑ በቃል ወበምህሮ።

¹⁸ ወይብል መጽሐፍ «ኢትፍፅሞ አፉሁ ለላሕም ሶበ ታከይድ እክለከ ወይደልዎ ዐስቡ ለዘይትቀነይ።»

¹⁹ ላዕለ ልሂቅ ኢትስማዕ ውዴተ ዘእንበለ ይዝልፍዎ ክልኤቱ ወሠለስቱ ሰማዕት።

²⁰ ወለእለሂ ስሕቱ በቅድመ ኵሉ ገሥጾሙ ከመ ባዕድኒ ይፍራህ።

²¹አሰምዕ ለከ በቅድመ እግዚአብሔር ወእግዚእነ ኢየሱስ ክርስቶስ ወመላእክቲሁ ኅሩያን ከመ ትዕቀብ ዘንተ እንዘ ኢታደሉ ወኢታጽድቆ ለሰብእ ቅድመ ፍትሕ ወኢትግበር ምንተሂ በዘትትሔመይ።

²² ወኢትሢም ፍጡነ ወኢመነሂ ወኢትሳተፍ በዝ ውስተ ኀጢአተ ባዕድ ወአንጽሕ እንከ ርእሰከ።

²³ ወኢትስተይ ማየ ዕራቆ ኅዳጠ ወይነ ቶስሕ በእንተ ሕማመ ከብድከ ወበእንተ ደዌከ ዘዘልፍ።

²⁴ቦ ሰብእ ዘይትዐወቆ ኀጢአቱ ወይትባደሮ ውስተ ደይን ወቦ ዘይተልዎ ኀጢአቱ።

²⁵ ወከማሁ ዘሂ ይገብር ሠናየ ይትዐወቅ ወዘሂ ካልእ ምግባሩ ኢይትከበት።