Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 1 6 Bible Online

ኀበ ጢሞቴዎስ 1 6 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 1 6

¹ ወኵሉ ነባሪ ወቅኑይ አክብሩ አጋእዝቲክሙ በኵሉ ከመ ኢይፅርፉ ላዕለ ስመ እግዚአብሔር ወላዕለ ትምህርቱ።

² ወእለሰ ቦሙ አጋእዝት መሃይምናን ኢያስተሐቅሩ እስመ አኀዊሆሙ እሙንቱ በሃይማኖት ዓዲ ፈድፋደ ይትቀነዩ ሎሙ እስመ ምእመናን ወፍቁራን እሙንቱ ወለእሉ ይትወከፉ ወይትለአኩ በፍሥሓ ሎሙ ከመዝ መሀር ወገሥጽ ወአስተብቍዖሙ።

³ ወእመሰ ቦ ዘይሜህር ካልአ ወኢይገብእ ኀበ ትምህርተ ነገረ ሕይወት ዘውእቱ ቃለ እግዚእነ ኢየሱስ ክርስቶስ ወኀበ ትምህርተ ጽድቅ።

⁴ ውእቱኬ ዘይትዔበይ እንዘ አልቦ ዘየአምር ዘእንበለ መቅሠፍተ ዘየኀሥሥ ወነገረ ጋዕዝ ዘእምኔሁ ይመጽእ ተሓምሞ ወተቃንኦ ፀሪፍ ወምክር እኩይ ወአስተዳጕጾ ሰብእ።

⁵ ወእሉ ሙሱናን ወውፁኣን እምጽድቅ ወይሬስይዎ ለጽድቀ እግዚአብሔር ተግባረ ተገኀሦሙ ለእሉ።

⁶ እስመ ለነሰ ተግባርነ ዐቢይ ውእቱ ፈሪሀ እግዚአብሔር።

⁷ እስመ አልቦ ዘአምጻእነ ውስተ ዓለም ወአልቦ ዘንክል ነሢአ እምኔሁ።

⁸ እምከመ ረከብነ ሲሳየነ ወዐራዘነ የአክለነ።

⁹ ወእለሰ ይፈቅዱ ይብዐሉ ይወድቁ ውስተ መንሱት ወብዙኅ መሣግረ ፍትወት ዘእበድ ዘይብእሶሙ ወዘያሠጥሞሙ ለሰብእ ውስተ ተሠርዎ ወሞት።

¹⁰ እስመ ሥርዉ ለኵሉ እኩይ አፍቅሮ ንዋይ እስመ ብዙኃን እለ በዛቲ ስሕቱ ወዐለዉ ሃይማኖቶሙ ወኀሠሡ ለርእሶሙ ብዙኀ መቅሠፍተ።

¹¹ ወአንተሰ ብእሴ እግዚአብሔር ጕየይ እምዝ ወዴግን ጽድቀ ወምሂረ ወሃይማኖተ ወተፋቅሮ ወትዕግሥተ ወትሕትና።

¹² ተጋደል ሠናየ ገድለ በሃይማኖት ለተመጥዎ ሕይወት ዘለዓለም ዘሎቱ ተጸዋዕከ ወአመንከ ሠናየ አሚነ በቅድመ ብዙኃን ሰማዕት።

¹³ ከመዝ እኤዝዘከ በቅድመ እግዚአብሔር ዘኵሎ ሙታነ ያሐዩ ወኢየሱስ ክርስቶስ ዘኮነ ሰማዕተ በቅድመ ጲላጦስ ጴንጤናዊ።

¹⁴ በሠናይ አሚን ከመ ትዕቀብ ዘንተ ትእዛዘ በንጽሕ እንዘ ኢታደሉ እስከ ምጽአቱ ለእግዚእነ ኢየሱስ ክርስቶስ።

¹⁵ ዘያስተርኢ በዕድሜሁ ዘባሕቲቱ ብፁዕ ወኀያል ንጉሠ ነገሥት ወእግዚአ አጋእዝት።

¹⁶ ውእቱ ባሕቲቱ ዘኢይመውት ወቦቱ ብርሃን ዘኢይጠፍእ እምቅድመ ዓለም ዘአልቦ ዘርእዮ ሰብእ ወአልቦ ዘይክል ርእዮቶ ዘሎቱ ክብር ወስብሐት ወኀይል ለዓለመ ዓለም አሜን።

¹⁷ ለአብዕልተ ዝንቱኒ ዓለም አዝዞሙ ከመ ኢይትዐበዩ ወኢይትአመንዎ ለብዕሎሙ ኀላፊ ዘእንበለ በእግዚአብሔር ሕያው ዘውእቱ ይሁበነ በብዝኀ ብዕሉ ኵሎ ከመ ንትፈሣሕ።

¹⁸ከመ ይግበሩ ግብረ ሠናየ ወይብዐሉ በገቢረ ጽድቅ ወይኩኑ ራትዓነ፥ ወጸጋውያነ ወሱቱፋነ።

¹⁹ ወይሣርሩ ለርእሶሙ መሠረተ ሠናየ ለዘይመጽእ ዓለም ከመ ይርከቡ ሕይወተ ዘበአማን።

²⁰ ኦ! ጢሞቴዎስ ዕቀብ ማሕፀንተከ ተገኀሦሙ ለርኩሳን እለ ያመጽኡ ነገረ ከንቶ ወያሴስልዋ ለጽድቅ በሐሰት።

²¹ እስመ እሉ ስሕቱ እምተስፋ ሃይማኖት ጸጋ ምስሌከ አሜን። ተፈጸመት መልእክት ቀዳማዊት ኀበ ጢሞቴዎስ ወተጽሕፈት በአቴና ወተፈነወት በእደ ቲቶ። ወስብሐት ለእግዚአብሔር አሜን።