Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 2 1 Bible Online

ኀበ ጢሞቴዎስ 2 1 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 2 1

¹ እምጳውሎስ ሐዋርያሁ ለኢየሱስ ክርስቶስ በፈቃደ እግዚአብሔር ወበተስፋ ሕይወት እንተ በኢየሱስ ክርስቶስ።

² ለጢሞቴዎስ ወልድየ ዘአፈቅር ሰላም ለከ ወሣህል ወጸጋ እግዚአብሔር አቡነ ወእግዚእነ ኢየሱስ ክርስቶስ።

³አአኵቶ ለእግዚአብሔር ዘኪያሁ አመልክ በልብ ንጹሕ እምፍጥረትየ ወዘልፈ እዜከረከ በጸሎትየ መዐልተ ወሌሊተ።

⁴ወእፈቱ እርአይከ ወእዜከር አንብዐከ።

⁵ ወእትፌሣሕ ተዘኪርየ ሃይማኖተከ ዘአልቦ ኑፋቄ፥ እንተ ኀደረት ላዕለ እምከ ኤውንቄ ወእምሔውትከ ሎይድ ወእፌጽም ፍሥሓየ ወእትአመን ከመ ላዕሌከኒ።

⁶ ወበእንተዝ እዜከረከ ከመ ይትሐደስ ጸጋሁ ለእግዚአብሔር ዘረከብከ በሢመተ እዴየ ላዕሌከ።

⁷ እስመ አኮ መንፈሰ ፍርሀት ዘወሀበነ እግዚአብሔር ዘእንበለ መንፈሰ ኀይል ወንጽሕ ወተፋቅሮ ወጥበብ።

⁸ ወኢትኅፈር እንከ በእንተ ስምዑ ለእግዚእነ ወኢታስተኀፍረኒ ኪያየ ሙቁሖ ዳእሙ ጻሙ ለምህሮ በኀይለ እግዚአብሔር ዘአድኀነነ ወጸውዐነ በጽዋዔሁ ቅዱስ።

⁹ወአኮ በከመ ምግባሪነ ዳእሙ በከመ ፈቃዱ ወጸጋሁ ዘተውህበ ለነ በኢየሱስ ክርስቶስ እምቅድመ ዓለም።

¹⁰ ወአስተርአየ ይእዜ በምጽአቱ ለእግዚእነ ኢየሱስ ክርስቶስ መድኀኒነ ዘሰዐሮ ለሞት ወአብርሃ ለሕይወት ወአሰሰለ ሙስና በትምህርተ ወንጌሉ።

¹¹ ዘሎቱ ተሠየምኩ ሐዋርያ ወዐዋዴ ወመምህረ ለአሕዛብ።

¹² ወበእንቲኣሁ አሐምም ወኢይትኀፈር እምዘ አነ ቦቱ እስመ አአምር ዘተአመንኩ ወእትአመንሂ ከመ ይክል ዐቂበ ሊተ ዘአማሕፀነኒ እስከ ይእቲ ዕለት።

¹³ወይኩን ለከ አርኣያ ውእቱ ቃለ ሕይወት ዘሰማዕከ በኀቤየ በሃይማኖት ወበፍቅረ ኢየሱስ ክርስቶስ።

¹⁴ ዕቀብ ማሕፀንተከ ሠናየ በመንፈስ ቅዱስ ዘኅዱር ላዕሌከ።

¹⁵ወዘንተኒ ተአምር ከመ ዐለዉኒ ኵሎሙ እለ በእስያ እለ ፊሎጎስ ወኤርዋኔጌስ።

¹⁶ወየሀቦ እግዚአብሔር ሣህለ ለቤተ ሄኔሴፎሩ እስመ ብዙኀ አዕረፈኒ ወኢኀፈረ በእንተ መዋቅሕትየ።

¹⁷ ወበጺሖ ኀበ ሮሜ ፍጡነ ኀሠሠኒ ወረከበኒ ሙቁሕየ።

¹⁸ የሀቦ እግዚአብሔር ይርከብ ሣህለ በኀበ እግዚእነ በይእቲ ዕለት ወመጠነ ተልእከኒ ሠናየ በኤፌሶን ለሊከ ተአምር።