Read Ge'ez NT – ሐዲስ ኪዳን በልሳነ ግእዝ ኀበ ጢሞቴዎስ 2 4 Bible Online

ኀበ ጢሞቴዎስ 2 4 - Ge'ez NT – ሐዲስ ኪዳን በልሳነ ግእዝ bible

ኀበ ጢሞቴዎስ 2 4

¹ ወእኤዝዘከ በቅድመ እግዚአብሔር ወእግዚእነ ኢየሱስ ክርስቶስ ዘሀለዎ ይኰንን ሕያዋነ ወሙታነ አመ ይመጽእ በመንግሥቱ።

² ከመ ትስብክ ቃሎ ቀዊመከ በድቡት በጊዜሁ ወዘእንበለ ጊዜሁ ገሥጽ ወተዛለፍ ናዝዝ ወየውህ እንዘ ትትዔገሥ በኵሉ ወትሜህር።

³ እስመ ይበጽሕ ጊዜሁ አመ የአብይዋ ለትምህርተ ሕይወት ወየሐውሩ በፍትወቶሙ ወያመጽኡ መምህራነ ለርእሶሙ በሁከተ እዘኒሆሙ።

⁴ ወይመይጡ እዘኒሆሙ እምጽድቅ ወያመጽኡ ካልአ ትምህርተ ወይትመየጡ ኀበ መሐደምት።

⁵ ወአንተሰ ንቃህ ወጥበብ በኵሉ ወጻሙ ወግበር ምግባረ ወንጌላዌ ወኩን ወፈጽም መልእክተከ።

⁶ ወአንሰ ወዳእኩ ወሰለጥኩ ወበጽሐኒ ዕድሜየ ለአዕርፎ።

⁷ ሠናየ ገድለ ተጋደልኩ በድርየኒ ፈጸምኩ ወሃይማኖትየኒ ዐቀብኩ።

⁸ እንከሰ ጽኑሕ ሊተ አክሊለ ጽድቅ ዘየዐስየኒ ይእተ ዕለተ እግዚአብሔር መኰንነ ጽድቅ ወአኮ ለባሕቲትየ አላ ለኵሎሙ እለ ያፈቅሩ ምጽአተ ዚኣሁ።

⁹አስተፋጥን ትምጻእ ኀቤየ ፍጡነ።

¹⁰ ዴማስ ኀደገኒ ወአፍቀሮ ለዝንቱ ዓለም ዘይእዜ ወሖረ ተሰሎንቄ ወቆሬቄስኒ ገላትያ ወቲቶ ድልማጥያ።

¹¹ ሉቃስ ባሕቲቱ ምስሌየ ወአምጽኦ ምስሌከ ለማርቆስ እስመ ይበቍዐኒ ለመልእክት።

¹²ወፈነውክዎ ለጢኪቆስ ኤፌሶን።

¹³ ወፌሎነኒ ዘመጽሐፍ ዘኀደጉ በጢሮአስ ኀበ አክርጳ ተማላእ ምስሌከ አመ ትመጽእ ወዓዲ መጻሕፍተ ወረቀ።

¹⁴ እለ እስክንድሮስ ነሃቢ ብዙኀ ሣቀየኒ ባሕቱ ይፍድዮ እግዚአብሔር በከመ ምግባሩ።

¹⁵ወአንተኒ ወልድየ ተዓቀቦ እስመ ፈድፋደ ተቃወሞ ለነገርነ።

¹⁶ ወበቀዳሚ ነገርየ አልቦ ዘኀብረ ምስሌየ ዳእሙ ኵሎሙ ኀደጉኒ ወይስረይ ሎሙ ዘንተ።

¹⁷ እስመ እግዚአብሔር ቆመ ሊተ ወአጽንዐኒ ከመ ይእመኑ በስብከተ ዚኣየ ወይስምዑ ኵሎሙ አሕዛብ ከመ ድኅንኩ እምአፈ አንበሳ።

¹⁸ ወያድኅነኒ እግዚአብሔር እምኵሉ ግብር እኩይ ወያሐይወኒ ውስተ መንግሥቱ ዘበሰማያት ውእቱ ዘሎቱ ስብሐት ለዓለመ ዓለም አሜን።

¹⁹ አምኅ ጵርስቅላ፥ ወአቂላ ወቤተ ሄኔሴፎሩ።

²⁰ አርስጦስ ነበረ ቆሮንቶስ ወለጥሮፊሞስ ኀደግዎ በሀገረ መሊጡ ይደዊ።

²¹አስተፋጥን ትምጻእ ኀቤየ እምቅድመ ክረምት ይኤምኁከ ኤውግሎስ ወጱዴስ ወሊኖስ ወቀላውድያ ወኵሎሙ አኀዊነ።

²² ወእግዚእነ ኢየሱስ ክርስቶስ የሀሉ ምስለ መንፈስከ ወጸጋሁ ምስሌከ አሜን። ተፈጸመት መልእክት ካልእት ኀበ ጢሞቴዎስ ወተጽሕፈት በሮሜ ወተፈነወት በእደ አንክሮሎስ። ወስብሐት ለእግዚአብሔር አሜን።