Read Ge'ez NT – ሐዲስ ኪዳን በልሳነ ግእዝ ኀበ ቲቶ 2 Bible Online

ኀበ ቲቶ 2 - Ge'ez NT – ሐዲስ ኪዳን በልሳነ ግእዝ bible

ኀበ ቲቶ 2

¹ ወአንተሰ ንግር ዘይደሉ ለትምህርተ ሕይወት።

² ሊቃውንትኒ ይኩኑ ንጹሓነ እምዝሙት ወንቁሃነ ወጠቢባነ ወኢይናፍቁ በሃይማኖት ይትፋቀሩ ወይለብዉ ወይትዐገሡ።

³ ልሂቃትሂ ከማሁ ይትቀደሳ ወያሠንያ ግዕዞን ኢያስተሓውራ ነገረ ወኢይትቀነያ ለስቴ ወኢይሰጠያ ውስተ ስካር ዳእሙ ይገሥፃ ወይምሀራ ሠናየ ትምህርተ ለአንስት ከመ ያንጽሓ ርእሶን።

⁴ወንኡሳትሂ ያፍቅራ አምታቲሆን ወውሉዶን።

⁵ ኢይዘምዋ ወይግበራ ሠናየ ወያሠንያ ግዕዞን ወሥርዐተ ቤቶን ወይትአዘዛ ለአምታቲሆን ከመ ኢይፅርፍ አሐዱሂ ላዕለ ቃለ እግዚአብሔር በእንቲኣሆን።

⁶ወለወራዙትኒ ገሥጾሙ ያንጽሑ ርእሶሙ ወይኩኑ ጠቢባነ።

⁷ ወኩኖሙ አርኣያ ወአምሳለ ለኵሎሙ በምግባረ ሠናይ።

⁸ ወይኩን ነገርከ ወትምህርትከ በንጽሕ ወበሥሩዕ ነገር ዘአልቦ ነውር ዘኢይሜንኖ አሐዱሂ ከመ ይትኀፈር ጸላኢ ወይኅጣእ ዘይነብብ ላዕሌነ ሕሡመ።

⁹ ነባሪኒ ይትአዘዙ ለአጋእዝቲሆሙ ወያሥምርዎሙ በኵሉ።

¹⁰ ወኢይቅሥጡ ወኢይትዋሥኡ በኵሉ አላ ያሠንዩ በንጹሕ ሃይማኖቶሙ ከመ ይንአድዋ በኵለሄ ለትምህርተ እግዚአብሔር መድኀኒነ።

¹¹ እስመ ተዐውቀት ጸጋሁ ለእግዚአብሔር በኀበ ኵሉ ሰብእ።

¹² ወይእቲ ትሜህረነ ከመ ንትናከራ ለኀጢአት ወለፍትወተ ዓለም ወንሕየው በጽድቅ ወበንጽሕ ወበተፋቅሮ በዝንቱ ዓለም።

¹³ እንዘ ንሴፎ አብፅዖ ወምጽአተ ስብሐቲሁ ለአምላክነ ዐቢይ ወመድኀኒነ ኢየሱስ ክርስቶስ።

¹⁴ ዘመጠወ ርእሶ በእንቲኣነ ከመ ይቤዝወነ እምኀጢአት ወያንጽሕ ሎቱ ሕዝበ ሐዲሰ ዘይትቀሐው በምግባረ ሠናይ።

¹⁵ ከመዝ ንግር ወገሥጽ ወተዛለፍ እንዘ ታቴሕት ርእሰከ ለኵሉ ወአልቦ ዘያስሕተከ።