Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 1 Bible Online

ኀበ ሰብእ ዕብራውያን 1 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 1

¹ በብዙኅ ነገር ወበብዙኅ መክፈልት አይድዐ እግዚአብሔር ለአበዊነ በነቢያቲሁ እምትካት።

² ወበደኃሪሰ መዋዕል ነገረነ በወልዱ ዘረሰዮ ወራሴ ለኵሉ ወቦቱ ፈጠሮ ለኵሉ።

³ ዘውእቱ ብርሃነ ስብሐቲሁ ወአምሳለ አርኣያሁ ዘይእኅዝ ኵሎ በኀይለ ቃሉ ወውእቱ በህላዌሁ ገብረ በዘያነጽሕ ኀጢአተነ ወነበረ በየማነ ዕበዩ በሰማያት።

⁴ ወተለዐለ እመላእክት በዘመጠነዝ ኀየሰ ወወረሰ ስመ ዘየዐቢ እምአስማቲሆሙ ወይከብር።

⁵ ለመኑ እመላእክቲሁ ይቤሎ እምአመ ኮነ «ወልድየ አንተ ወአነ ዮም ወለድኩከ» ወካዕበ ይቤ «አነ እከውኖ አባሁ ወውእቱኒ ይከውነኒ ወልድየ።»

⁶ ወአመ ካዕበ ፈነዎ ለበኵሩ[1] ውስተ ዓለም ይቤ ይሰግዱ ሎቱ ኵሎሙ መላእክተ እግዚአብሔር።

⁷ ወበእንተ መላእክቲሁሰ ይቤ ዘይሬስዮሙ ለመላእክቲሁ መንፈሰ ወለእለ ይትለአክዎ ነደ እሳት።

⁸ ወበእንተ ወልዱሰ ይቤ መንበርከ እግዚኦ ለዓለመ ዓለም በትረ ጽድቅ ወበትረ መንግሥትከ።

⁹ አፍቀርከ ጽድቀ ወዐመፃ ጸላእከ ወበእንተዝ ቀብዐከ እግዚአብሔር አምላክከ ቅብዐ ትፍሥሕት ዘይኄይስ እምእለ ከማከ።

¹⁰ወካዕበ ይቤ አንተ እግዚኦ አቅደምከ ሣርሮታ ለምድር ወግብረ እደዊከ እማንቱ ሰማያት።

¹¹እማንቱሰ ይትኀጐላ ወአንተሰ ትሄሉ ወኵሉ ከመ ልብስ ይበሊ ወከመ ሞጣሕት ትጠውሞሙ ወይጠወሙ።

¹² ወአንተሰ አንተ ክመ ወዓመቲከኒ ዘኢየኀልቅ።

¹³ ለመኑ እመላእክቲሁ ይቤሎ እምአመ ኮነ ንበር በየማንየ እስከ አገብኦሙ ለጸላእትከ ታሕተ መከየደ እገሪከ።

¹⁴ አኮኑ ኵሎሙ መላእክት መንፈስ እሙንቱ ወይትፌነዉ ለመልእክት በእንተ እለ ሀለዎሙ ይረሱ ሕይወተ ዘለዓለም።