Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 10 Bible Online

ኀበ ሰብእ ዕብራውያን 10 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 10

¹ እስመ ጽላሎታ ይእቲ ኦሪት ለእንተ ትመጽእ ሠናይት እስመ ኢኮነት ለሊሃ ወበእንተ ዝንቱ አመ ያበውኡ መሥዋዕተ ዘልፈ በኵሉ ዓመት ኢይክል ለሊሁ ግሙራ ፈጽሞ ለእለ ያበውእዎ።

²ወእመ አኮሰ እምአዕረፉ እምዘይሠውዑ እስመ ይሰሪ ሎሙ ኀጢአቶሙ ለእለ ይሠውዑ ወያነጽሖሙ በምዕር።

³ አላ ዳእሙ ቦሙ ዘይገብሩ ተዝካረ ኀጢአት በበ ዓመት በውእቱ መሥዋዕት።

⁴እስመ ኢይክል ደመ ላሕም ወጠሊ ይኅድግ ኀጢአተ።

⁵ ወበእንተዝ አመ ይመጽእ ውስተ ዓለም ይቤ «መሥዋዕተ ወቍርባነ ኢፈቀድከ አላ አልበስከኒ ሥጋ።

⁶ መሥዋዕተ ዘበእንተ ኀጢአት ኢሠመርከ።

⁷ውእተ ጊዜ እቤ ነየ መጻእኩ ውስተ ርእሰ መጽሐፍ ተጽሕፈ በእንቲኣየ ከመ እግበር ፈቃደከ መከርኩ[4] አምላክየ።»

⁸መልዕልቶ ይቤ መሥዋዕተ ወቍርባነ ኢፈቀድኩ ዘበእንተ ኀጢአት ኢሠመርኩ[5] ዘይሠውዑ በሕገ ኦሪት ብሂሎ።

⁹ወእምዝ ይቤ ነየ መጻእኩ ከመ እግበር ፈቃደከ አምላኪየ ወዝ ቃል ይነሥት ቀዳማየ ከመ ያቅም ደኃራየ።

¹⁰ ከመ ንትቀደስ በሥምረቱ በቍርባነ ሥጋሁ ለኢየሱስ ክርስቶስ ዘኮነ በምዕር።

¹¹ወኵሉ ሊቀ ካህናት ይቀውም ኵሎ አሚረ ወይሠውዕ ኪያሃ ክመ መሥዋዕተ እንተ ለግሙራ ኢትክል አንጽሖ ኀጢአት።

¹² ወውእቱሰ ምዕረ ሦዐ መሥዋዕተ እንተ ለዝሉፉ በእንተ ኀጢአትነ ወነበረ በየማነ እግዚአብሔር።

¹³ወይጸንሕ እንከ እስከ ይገብኡ ጸላእቱ ታሕተ መከየደ እገሪሁ።

¹⁴ አሐተ መሥዋዕተ ገብረ እንተ ለግሙራ ለእለ ይትቄደሱ።

¹⁵ወሰማዕትነ መንፈስ ቅዱስ።

¹⁶ እምድኅረ ይቤ ዛቲ ሥርዐት እንተ እሠርዕ ሎሙ እምድኅረ እማንቱ መዋዕል ይቤ እግዚአብሔር «እወዲ ሕግየ ውስተ ልቦሙ ወእጽሕፎ ውስተ ኅሊናሆሙ።»

¹⁷«ወኢይዜከር እንከ ኀጢአቶሙ ወአበሳሆሙ።»

¹⁸ ወእምከመሰ ይትኀደግ ከመዝ አልቦ እንከ መሥዋዕት በእንተ ኀጢአት።

¹⁹ ብነ አኀዊነ ሞገስ ውስተ በኣትነ ቤተ መቅደስ በደሙ ለኢየሱስ ክርስቶስ።

²⁰ እስመ ሐደሰ ለነ ፍኖተ ጽድቅ ወሕይወት ግብተ በመንጦላዕተ ሥጋሁ።

²¹ ካህን ዐቢይ ለቤተ እግዚአብሔር።

²² ንቅረብ እንከ በልበ ጽድቅ ወበሃይማኖት ፍጹም ምእመን እንዘ ንጹሕ ልብነ ወንጹሓን ንሕነ እምግባረ እከይ ወኅፁብ ሥጋነ በማይ ንጹሕ።

²³ ናጽንዕ እንከ አሚነ ወተስፋነ ዘኢያንቀለቅል፥[6] ዘእንበለ ነውር እስመ ጻድቅ ዘአሰፈወነ።

²⁴ ወንትቀሐው ምስለ ቢጽነ በተፋቅሮ ወበምግባረ ሠናይ።

²⁵ ወኢንኅድግ ማኅበረነ ዘከመ ይለምዱ ካልኣን ዳእሙ ንትገሠጽ እስመ ንሬኢ ዘከመ ትቀርብ ዕለት።

²⁶ ወለእመ በግብር ንኤብስ እምድኅረ አእመርናሃ ለጽድቅ አልቦ እንከ መሥዋዕት በእንተ ኀጢአት።

²⁷ አላ ጽኑሕ ግሩም ደይን ወእሳት ዘቅንአት ዘይበልዖሙ ለከሓድያን።

²⁸ ወለእመ ቦ ዘስሕተ እምኦሪተ ሙሴ እምከመ ክልኤቱ ወእመ አኮ ሠለስቱ ሰማዕት ዘለፍዎ ይመውት ወኢይምሕርዎ።

²⁹ እፎ እንከ ፈድፋደ ይደልዎ ይትኰነን ዘተካየዶ ለወልደ እግዚአብሔር ወአርኰሰ ደመ ሥርዐት ዘቦቱ ተቀደሰ ከመ ደመ ኵሉ ሰብእ ወዘጸአለ መንፈሰ ጸጋሁ።

³⁰ ነአምሮ ለዘይቤ «አነ እትቤቀል ወአነ እትፈደይ ይቤ እግዚአብሔር» ወካዕበ ይቤ «እስመ ይኴንን እግዚአብሔር ሕዝቦ።»

³¹ወጥቀ ግሩም ወዲቅ ውስተ እደ እግዚአብሔር ሕያው።

³² ተዘከሩ መዋዕለ ዘቀዲሙ ዘአመ አጥመቁክሙ ዘከመ ተዐገሥክሙ ብዙኀ ሕማመ።

³³ወተጽእልክሙ ወሣቀዩክሙ ወተሣለቁ ላዕሌክሙ ወቦ ዘተሳተፍክምዎሙ ምስለ እለ ከመዝ ኮኑ።

³⁴ ወኀበርክሙ ሕማመ ምስሌየ በመዋቅሕትየ ወበተበርብሮ ንዋይክሙ በትፍሥሕት ዘተወከፍክሙ እስመ ተአምሩ ከመ ብክሙ ንዋይ ዘይኄይስ ዘይነብር ለዓለም በሰማያት።

³⁵ ኢትግድፉ እንከ ሞገሰክሙ እንተ ባቲ ትረክቡ ብዙኀ ዕሴተክሙ ዐቢየ።

³⁶ ወባሕቱ ትዕግሥተ ትፈቅዱ ከመ ገቢረክሙ ፈቃደ እግዚአብሔር ትርከቡ ተስፋክሙ።

³⁷ እስመ ዓዲ ኅዳጥ መዋዕል ወይበጽሕ ዘይመጽእ ወኢይጐነዲ።

³⁸ ወጻድቅሰ በአሚን የሐዩ ወእመሰ ተመይጠ ኢትሠምሮ ነፍስየ።

³⁹ ንሕነሰ ኢይደልወነ ንትመየጥ ድኅሬነ ለሕርትምና ዘእንበለ ለሃይማኖት እንተ ይእቲ ሕይወተ ነፍስነ።