Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 11 Bible Online

ኀበ ሰብእ ዕብራውያን 11 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 11

¹ ሃይማኖትሰ ጥይቅት ይእቲ ለዘይሴፈዋ ሀለዉ እለ ተአመኑ ተሰፊዎሙ ንዋየ ዘኢያስተርኢ።

²ዘበእንቲኣሁ ሰማዕተ ኮኑ ሊቃውንት።

³ በሃይማኖት ነአምር ከመ ተፈጥረ ዓለም በቃለ እግዚአብሔር ወአስተርአየ ዘኢያስተርኢ ምንትኒ ዘኮነ እምኀበ ኢሀሎ።

⁴ በተአምኖ ኀየሰ መሥዋዕተ አቤል እምዘ ቃየል ዘአብአ ለእግዚአብሔር ወበእንቲኣሁ ሰማዕተ ኮኖ ከመ ጻድቅ ውእቱ ወሰማዕቱ እግዚአብሔር በተወክፎ መሥዋዕቱ ወበእንቲኣሁ መዊቶ ዓዲ ተናገረ።

⁵ በተአምኖ ፈለሰ ሄኖክ ከመ ኢይርአዮ ለሞት ወኢተረክበ እስመ ከበቶ እግዚአብሔር ወዘእንበለ ያፍልሶ ሰማዕተ ኮኖ ከመ አሥመሮ ለእግዚአብሔር።

⁶ ወዘእንበለ ተአምኖሰ ኢይትከሀል ያሥምርዎ ለእግዚአብሔር ወርቱዕሰ ይትአመን ይቅድም ዘይበውእ ኀበ እግዚአብሔር ወያእምር ከመ ሀሎ ዘይዔስዮሙ ለእለ የኀሥሥዎ።

⁷ በተአምኖ አመ ነገርዎ ለኖኅ በእንተ ዘኢያስተርኢ ግብር ዘኅቡእ ፈርሀ ወገብረ ንፍቀ ታቦት በዘያድኅን ቤቶ አመ ተኰነነ ዓለም ወኮነ ወራሲሃ ለጽድቀ ሃይማኖት።

⁸ በተአምኖ ሰምዐ ዘተሰምየ አብርሃም ወተአዘዘ ይሑር ብሔረ ኀበ ሀለዎ ይንሣእ ርስቶ ወሖረ እንዘ ኢየአምር ኀበ ይበጽሕ።

⁹ በተአምኖ ፈለሰ ወነበረ ብሔረ ዘአሰፈዎ ከመ ነኪር በሐይመታት ምስለ ይስሐቅ ወያዕቆብ እለ እሙንቱ ይወርስዋ ለተስፋሁ።

¹⁰ እስመ ኮኑ ይጸንሑ ሀገረ እንተ ባቲ መሠረት እንተ ኬንያሃ ወገባሪሃ እግዚአብሔር።

¹¹ በተአምኖ ይእቲኒ ሣራ ረከበት ኀይለ ታውፅእ ዘርዐ እንዘ መካን ይእቲ በዘረስአት እስመ ተአመነቶ ከመ ጻድቅ ዘአሰፈዋ።

¹² እንዘ ክልኤሆሙ ከመ በድን ነፍስቶሙ ከመ ይኩን ብዝኆሙ ከመ ኮከበ ሰማይ ወከመ ኆፃ ባሕር ዘኢይትኌለቍ።

¹³ እሉ ኵሎሙ እንዘ ይትአመኑ ሞቱ ወኢረከቡ ተስፋሆሙ ወባሕቱ እምርሑቅሰ ርእይዋ ወተአምኅዋ ወአእመሩ ከመ ነግድ ወፈላሲ እሙንቱ ዲበ ምድር።

¹⁴ወእለ ከመዝ ይብሉ በእንቲኣሆሙ ያሬእዩ ነገረ ከመ ሀገሮሙ የኀሥሡ።

¹⁵ወሶበሰ ይፈቅዱ ሀገረ እንተ እምኔሃ ወፅኡ እምተክህሎሙ ይግብኡ ኀቤሃ።

¹⁶ ወይእዜሰ ተዐውቀ ከመ እንተ ትኄይስ ሀገረ እንተ በሰማያት ኮኑ ይሴፈዉ ወበእንተዝ ኢየኀፍር እግዚአብሔር ከመ ይትበሀል አምላኮሙ እስመ አስተዳለወ ሎሙ ሀገረ እንተ ተሰፈዉ።

¹⁷ በተአምኖ ወሰዶ አብርሃም ለይስሐቅ ወልዱ ከመ ይሡዖ አመ አመከሮ።

¹⁸ ወአብአ ዘአሐዱ ሎቱ ዘበእንቲኣሁ አሰፈዎ ወይቤሎ «እምይስሐቅ ይሰመይ ለከ ዘርዕ።»

¹⁹ ተአሚኖ ከመ ይክል እግዚአብሔር አንሥኦቶ እሙታን ወበእንተዝ ኮነ ሎቱ ተዝካረ ውእቱ ዘተውህበ።

²⁰ በተአምኖ በዘይከውን ባረኮሙ ይስሐቅ ለያዕቆብ ወለዔሳው በእንተ ዘሀለዎሙ ይርከቡ።

²¹ በተአምኖ አመ ይመውት ያዕቆብ ባረኮሙ ለደቂቀ ዮሴፍ ለለ አሐዱ ወሰገደ ውስተ ከተማ በትሩ።

²² በተአምኖ አመ ይመውት ዮሴፍ ተዘከረ በእንተ ፀአቶሙ ለደቂቀ እስራኤል እምድረ ግብፅ ወአዘዘ በእንተ አዕጽምቲሁ።

²³ በተአምኖ ተወሊዶ ሙሴ ኀብእዎ ሠለስተ አውራኀ በቤተ አበዊሁ እስመ ርእይዎ ከመ ሠናይ ውእቱ ሕፃን ወኢፈርሁ ትእዛዘ ንጉሥ።

²⁴ በተአምኖ ልሂቆ ሙሴ ክሕደ ከመ ኢይበልዎ ወልደ ወለተ ፈርዖን።

²⁵ወአብደረ ይሕምም ምስለ ሕዝበ እግዚአብሔር እምይደለው ለሰዓት ወይኩኖ ኀጢአተ።

²⁶ እስመ አእመረ ከመ የዐቢ ትዕይርተ መስቀሉ ለክርስቶስ እምኵሉ መዛግብቲሆሙ ለግብፅ።

²⁷ በተአምኖ ኀደረ ብሔረ ግብፅ ኢፈሪሆ መዓተ ንጉሥ እስመ አብደረ ይፍርሆ ለዘኢያስተርኢ እምዘይሬኢ ጸኒሖ ዕሴቶ።

²⁸ በተአምኖ ገብረ ፍሥሐ ወነዝኀ ደመ ከመ ኢያጥፍእ ሎሙ በኵሮሙ ብድብድ።

²⁹ በተአምኖ ዐደውዋ ለባሕረ ኤርትራ ከመ ዘውስተ ምድር ይቡስ ወኮነቶሙ መከራ ለግብፅ ተሠጢሞሙ።

³⁰ በተአምኖ ወድቀ አረፋቲሃ ለኢያሪኮ አመ የዐውድዋ ሰቡዐ ዕለተ።

³¹ በተአምኖ ረአብኒ ዘማ ኢተኀጕለት ምስለ ዐላውያን እስመ ተወክፈቶሙ ለሰብአ ዐይን ወኀብአቶሙ በሰላም።

³² ወምንተ እንከ እብል፤ እስመ ሕጹር ዕለትየ ከመ እዜኑክሙ በእንተ እለ ጌዴዎን ወባርቅ ወዮፍታሔ ወሶምሶን፥ ወዳዊት ወሳሙኤል ወባዕዳንሂ ነቢያት።

³³ እለ በተአምኖ ተጋደሉ ወሞኡ ነገሥተ ወአድምዑ ፍናዊሆሙ ተገበሩ ጽድቀ ወረከቡ ተስፋሆሙ ወፈጸሙ አፈ አናብስት።

³⁴ ወአጥፍኡ ኀይለ እሳት ወድኅኑ እምአፈ ኲናት ወጸንዑ በሕማሞሙ ወኀየሉ በውስተ ጸብእ ወሰደዱ ተዓይነ ፀር።

³⁵ ወነሥኣ አንስት ምዉታኒሆን አሕዪዎሙ ከመ ዘትንሣኤ ወቦ እለ ሞቱሂ ተኰኒኖሙ እስመ ኢፈቀዱ ድኂነ ከመ ይርከቡ ሕይወተ እንተ ትኄይስ።

³⁶ ወቦ እለሂ ቀሠፍዎሙ ወተሣለቁ ላዕሌሆሙ ወኀመይዎሙ ወሞቅሕዎሙ።

³⁷ ወቦ እለ ወሰርዎሙ በሞሰርት ወወገርዎሙ ወቀተልዎሙ በአፈ መጥባሕት ወዔሉ በሠቅ ወበሐሜለት ወበዘብድወ ጠሊ ተጸነሱ ተመንደቡ ሐሙ ርኅቡ ጸምዑ።

³⁸ እሉ እሙንቱ ዘኢይደልዎሙ ዓለም ወዔሉ ውስተ ገዳም ወውስተ አድባር ወበኣታት ወግበበ ምድር።

³⁹ወኵሎሙ ሰማዕተ ኮኑ በሃይማኖት ወኢያድምዑ ዘአሰፈዎሙ።

⁴⁰ እስመ አቅደመ እግዚአብሔር ርእየ በእንቲኣነ እንተ ትኄይስ ከመ ኢይሠለጡ ዘእንበሌነ።