Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 12 Bible Online

ኀበ ሰብእ ዕብራውያን 12 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 12

¹ ወበእንተ ዝንቱ ንሕነኒ እለ ብነ እሙንቱ ሰማዕት ኵሎሙ ዘየዐውዱነ ከመ ደመና ንግድፍ እምላዕሌነ ኵሎ ክበደ ወሁከተ ኀጢአት ወንሩጽ በትዕግሥት ኀበ ዘጽኑሕ ለነ ተስፋነ ዘሃይማኖት።

² ወንትልዎ ለፍጹም መልአክነ ኢየሱስ ክርስቶስ ዘተዐገሠ ኀፍረተ መስቀል አናሕስዮ በእንተ ፍሥሓሁ ዘጽኑሕ ሎቱ ወመነና ለኀፍረት ወነበረ በየማነ መንበረ እግዚአብሔር።

³ ኀልይዎ እስኩ ለዘከመዝ ተዐገሠ እምኃጥኣን ወተናገርዎ በበይናቲክሙ ከመ ኢትስራሕ ነፍስክሙ ወኢትድክሙ።

⁴እስመ ዓዲክሙ ኢጸናዕክሙ እስከ ለደም ትበጽሑ ተጋደልዋ ለኀጢአት ወእበይዋ ወአብድርዋ ለትምህርተ ተስፋክሙ።

⁵ እስመ ከመ ውሉድ ይብለክሙ «ወልድየ ኢታስተጽሕብ ተግሣጸ እግዚአብሔር ወኢትትገኀሥ እምኔሁ ሶበ ይዘልፈከ እምገሠጸከ።

⁶እስመ ለዘአፍቀረ እግዚአብሔር ይጌሥጽ ወይቀሥፍዎ ለኵሉ ውሉድ ዘይትፈቀድ።»

⁷ ለተግሣጽክሙ ተዐገሡ እስመ ከመ ውሉዱ ያፈቅረክሙ እግዚአብሔር መኑ ውሉድ ዘኢይጌሥጾ አቡሁ።

⁸ ወእመሰ ኢገሠጹክሙ አንደበራ አንትሙ ወኢኮንክሙ ውሉደ ወዐረይክሙ ኵልክሙ።

⁹ ወእመሰ አበዊነ እለ ወለዱነ በሥጋ ይጌሥጹነ ወነኀፍሮሙ እፎ እንከ ፈድፋደ ንግነይ ወንትአዘዝ ለአበ መንፈስነ ይደልወነ ወንሕየው።

¹⁰ ወእሙንቱሰ ለስላጤ ለኅዳጥ መዋዕል ይጌሥጹነ በከመ ፈቀዱ ወውእቱሰ ለእንተ ትኄይስ ለነ ከመ ንርከብ ቅድሳቲሁ።

¹¹ ኵሉ ተግሣጽ ኢይመስል ትፍሥሕተ ለጊዜሁ ዳእሙ ኀዘን ውእቱ ወድኅረሰ ትፈሪ ሰላመ ለእለ ተገሠጹ ወተዐስዮሙ ጽድቀ።

¹² ወበእንተዝ አርትዑ እደ ፅውስተ ወእግረ ፅቡሳተ።

¹³ ወግበሩ መንኰራኵረ ርቱዐ ለእገሪክሙ ከመ ይሕየው ሕንካሴ ልብክሙ ወኢትትዐቀፉ።

¹⁴ ወሩጹ ኀበ ሰላም ምስለ ኵሉ ወኢትኅድጉ ቅድሳቲክሙ ወዘእንበሌሁሰ አልቦ ዘይሬእዮ ለእግዚአብሔር።

¹⁵ አስተሐይጹ አልቦ ዘያሰትት ጸጋ እግዚአብሔር ወአልቦ ዘይትረከብ ሥርው መሪር እንተ ታሠርጽ ሕማመ እንተ ታስሕቶሙ ወታረኵሶሙ ለብዙኃን።

¹⁶ አልቦ ዘይከውን ዘማዌ ወርኩሰ ከመ ዔሳው ዘሤጠ ብኵርናሁ ለአሐዱ መብልዕ።

¹⁷ ተአምሩ ከመ ድኅሬሃ ፈቀደ ይረስ በረከተ ወአውፅእዎ እስመ ተስእኖ ወኀጥአ ፍኖተ በዘይኔስሕ ወኀሠሣ እንዘ ይበኪ።

¹⁸ እስመ ኢመጻእክሙ ኀበ እሳት ዘያስተርኢ ዘይነድድ ወጽልመት ግፍትዕት ወቆባር ወዐውሎ ወጣቃ።

¹⁹ ወድምፀ መጥቅዕ ወቃለ ነገር ዘሰምዑ እሙንቱ ወኢፈቀዱ ዳግመ ይትናገሮሙ።

²⁰ እስመ ስእንዎ አጽምዖቶ ለዘተናገሮሙ ወእመኒ እንስሳ ቀርቦ ለውእቱ ደብር ይዌግርዎ።

²¹ ወዝንቱ ኵሉ በእንተ ውእቱ ግሩም ዘአስተርአዮሙ ወሙሴኒ ይቤ ርዑድ ወድንጉፅ አነ።

²² ወአንትሙሰ በጻሕክሙ ኀበ ጽዮን ሀገረ እግዚአብሔር ሕያው ኢየሩሳሌም እንተ በሰማያት ወኀበ አእላፍ መላእክት ፍሡሓን።

²³ ወማኅበረ በኵር እለ ጽሑፍ አስማቲሆሙ በሰማያት ወኀበ እግዚአብሔር መኰንነ ኵሉ ወኀበ መንፈሰ ጻድቃን ፍጹማን።

²⁴ ወኀበ ኢየሱስ ኅሩይ ወመርሕ ለሐዳስ ሥርዐት ወለንዝኀተ ደም ነባቢ ዘይኄይስ ተናግሮ እምዘ አቤል ዑቁ እንከ ኢትእበይዎ ለዘተናገረክሙ እምሰማይ።

²⁵ ሶበ እሙንቱ ኢድኅኑ እስመ አበይዎ ለዘአስተርአዮሙ በደብር እፎ እንከ ፈድፋደ ንሕነ ለእመ ሜጥነ ገጸነ እምኔሁ ለዘመጽአ እምሰማያት።

²⁶ ወአድለቅለቃ ለምድር ቃሉ ይእተ አሚረ ወይእዜኒ ነገረ ወይቤ ዓዲ ምዕረ አነ አድለቅለቃ ለምድር ወአኮ ለምድር ባሕቲታ ዓዲ ለሰማይኒ።

²⁷ ወዘይቤ ዓዲ ምዕረ ያሬኢ ከመ ያፈልሶ ወያኀልፎ ለዘያንቀለቅል እስመ ፍጡራን እሙንቱ ከመ ይንበር ዘኢያንቀለቅል።

²⁸ ወበእንተዝ ንነሥእ ንሕነ መንግሥተ ዘኢያንቀለቅል ወብነ ጸጋሁ እንተ በእንቲኣሁ ንሠውዕ ለእግዚአብሔር ወናሠምሮ በጸሎት ወበስኢል ወበፍርሀት ወበረዓድ።

²⁹ እስመ አምላክነ እሳት በላዒ ውእቱ።