Read Ge'ez NT – ሐዲስ ኪዳን በልሳነ ግእዝ ኀበ ሰብእ ዕብራውያን 2 Bible Online

ኀበ ሰብእ ዕብራውያን 2 - Ge'ez NT – ሐዲስ ኪዳን በልሳነ ግእዝ bible

ኀበ ሰብእ ዕብራውያን 2

¹ወበእንተ ዝንቱ ርቱዕ ንትዐቀብ ፈድፋደ እለ ሰማዕነ ወኢንትሀየይ ከመ ኢንደቅ።

² ወሶበኒ ኮነ ቃል ዘይቤ በእንተ መላእክት እምጸንዐ ወእምተጠየቀ ወኵሉ ዘሰምዐ ወዘዐለወ ወአበየ እምተኰነነ በርቱዕ።

³ እፎ እንከ ናመሥጥ ንሕነ ዘመጠነዝ ሕይወተ አስቲተነ እንተ ቀደመት ተነግሮ በኀበ እግዚእነ ወተጠየቀት በኀቤነ እምኀበ እለ ሰምዑ እምኔሁ።

⁴ እንዘ እግዚአብሔር ያርኢ ስምዖ ሎሙ ወያጸድቅ ነገሮሙ በትእምርት ወበመንክር ወዘዘዚኣሁ ኀይል ብዙኅ ላዕለ እደዊሆሙ ዘከመ ከፈሎሙ መንፈስ ቅዱስ በዘውእቱ ፈቀደ።

⁵ወአኮ ለመላእክት ዘአግረረ ዓለመ ዘይመጽእ ዘበእንቲኣሁ ንነግር።

⁶ ወባሕቱ በከመ ስምዐ ኮነ መጽሐፍ ወይቤ «ምንትኑ ውእቱ ሰብእ ከመ ትዝክሮ ወምንትኑ ዕጓለ እመሕያው ከመ ተሐውጾ።

⁷ሕቀ አሕጸጽኮ እመላእክቲከ ክብረ ወስብሐተ ከለልኮ ወሤምኮ ውስተ ኵሉ ግብረ እደዊከ።

⁸ወኵሎ አግረርከ ሎቱ ታሕተ እገሪሁ» ወብሂለ ቃሉሰ አግረረ ሎቱ ኵሎ እስመ አልቦ ዘኀደገ ዘኢያግረረ ሎቱ ወይእዜሰ ኢንሬኢ ከመ ኵሎ አግረረ ሎቱ።

⁹ ወዘአሕጸጾሰ ሕቀ እመላእክቲሁ ናሁ ንሬኢ ከመ ኢየሱስ ውእቱ በእንተ ሕማመ ሞቱ ክብረ ወስብሐተ ዘተከለለ እስመ በጸጋ እግዚአብሔር በእንተ ኵሉ ጥዕሞ ለሞት።

¹⁰ ወይደልዎ ለውእቱ ዘበእዴሁ ኵሉ ወዘእምኔሁ ኵሉ ወብዙኃነ ውሉደ አብአ ውስተ ስብሐት መልአከ ሕይወቶሙ ከመ ይፈጽም በሕማማት።

¹¹ እስመ ውእቱ ዘቀደሶሙ ለእሙንቱ ወእለሂ ተቀደሱ ኅቡረ እምአሐዱ ወበእንተዝ ኢየኀፍር አኀውየ ብሂሎቶሙ።

¹² ወይቤ «አየድዖሙ ስመከ ለአኀውየ ወበማእከለ ማኅበር እሴብሐከ።»

¹³ ወካዕበ ይቤ «ነየ አነ ወደቂቅ ዘወሀበኒ እግዚአብሔር።»

¹⁴ ወካዕበ ይቤ አንሰ እትዌከል ቦቱ እስመ ደቂቅ ተሳተፉ በሥጋ ወደም ውእቱኒ ተሳተፎሙ በዝንቱ ወከመ ቢጾሙ ኮነ ሎሙ ከመ በሞቱ ይስዐሮ ለመልአከ ሞት ዘውእቱ ሰይጣን።

¹⁵ ወያዕርፎሙ ለኵሎሙ እለ በፍርሀተ ሞት ተኰነኑ በኵሉ መዋዕለ ሕይወቶሙ ወተቀንዩ ለግብርናት።

¹⁶እስመ አኮ እመላእክት ዘነሥኦ ለዘነሥኦ ዘእንበለ ዳእሙ እምዘርዐ አብርሃም።

¹⁷ ወእንበይነ ዝንቱ ርቱዕ ይትመሰሎሙ ለአኀዊሁ በኵሉ ከመ ይኩኖሙ መሓሬ ወሊቀ ካህናት ምእመነ ዘመንገለ እግዚአብሔር ከመ ይስረይ ኀጢአተ ሕዝብ።

¹⁸እስመ በዘአመከርዎ ወአሕመምዎ ክህለ ረዲኦቶሙ ለሕሙማን።